LÓN Keneses 22, ewe Paipel a erá pwe Kot a ereni Apraham an epwe sái ngeni eú leeni mi towau seni leenian we pwe epwe eáni eú asor ngeni. A erá: “Apraham a angei ewe mwüchün asoren kek o isetä won afaren Isaak nöün we. Nge ewe ekkei me ewe naif a püsin uwei. Iwe, . . . ra mwinemwinela.”​—Ken. 22:6.

Ewe Paipel ese áweweei ifa usun aramas lóóm lóóm ra ékkú ekkei. Iwe met, Apraham me Isaak ra ékkú ar we ekkei me uwei ngetan atun ra sái? Emén sou sile usun Paipel a erá pwe ngeten eú ekkei esap tongeni “tikeri ewe leeni mi towau ra sái ngeni.” Ina minne, eli Apraham me néún we ra uwei mettóch meinisin mi lamot fán iten kékkúún eú ekkei.

Nge ekkóch aramas ra erá pwe lón ena atun ese mecheres án emén epwe ékkú eú ekkei. Ina minne, aramas ra kan ékkú ekkei ren ar angei och moochan seni pwal eú ekkei ika mi tufich, neman repwe angei seni án chón órur kewe. Chómmóng sou tipachem ra lúkú pwe Apraham a uwei lón an sái och moochen ekkei mi kkúú a angei seni pwal eú ekkei me mwen an sái. A tongeni waalong lón och mettóch, áwewe chék lón eú nape mi wor chúchúnan seni sein, me uwei lón an sái. (Ais. 30:14, Kapasen God) Mwirin a tongeni áeá ena moochen ekkei me ekkóch péré le ékkú an ekkei ineet chék a mochen.