A WEIRES óm kopwe káé ewe Paipel iteiten wiik? Fán ekkóch, ka meefi pwe a echchipwang? Oukich meinisin sia kan meefi ena fán ekkóch. Nge ekieki ussun ekkewe ekkóch mettóch sia kan féri iteitan, áwewe chék ren ach tútú. Mi lamot sipwe awora fansoun le tútú, nge sia fókkun meefi kinamwe mwirilóón. Pwal ina chék ussun ren ach káéén Paipel, a tongeni ekinamwekich. (Efi. 5:26) Sipwe ppii ekkóch mettóch epwe álisikich le pwapwaiti ach pwisin káéén Paipel.

• Féri óm schedule. Ach pwisin káéén Paipel ina eú me lein “ekkewe mettóch mi fókkun aúchea” Chón Kraist resap túmúnúngaw ngeni. (Fil. 1:10) Ren óm kopwe fitipachei óm schedule fán iten káéén Paipel, mi éch kopwe pacheetá ikewe kopwe kan kúkkúna me ie. Are ka tongeni féri óm alarm wóón noum phone iká tablet pwe epwe áchchema ngonuk kulókun óm káé.

• Anapanapa óm káé. A mecheres ngonuk óm kopwe nefótófót wóón och pwóróus atun ka attama are amwocha óm kewe fansoun káé? Iwe, kopwe anapanapa óm káé lón ewe napanap epwe mecheres ngonuk. Iká ka meefi chipwang atun a tori fansoun óm kopwe káé, iwe ka tongeni káé ren chék engol minich. Inaamwo iká mi mwoch ena úkúúkún, nge a wor met ka tongeni káé mi aúchea. Nge mwirin óm poputá, neman kopwe fen pwapwaiti me mochen attamaaló.—Fil. 2:13.

• Filaatá me mwan minne kopwe káé. Iká a tori fansoun óm káé, nge kesaamwo filaatá menni pwóróus kopwe káé, iwe epwe weires óm kopwe ‘alamotaéchú óm fansoun.’ (Efi. 5:16) Neman ka tongeni isoni eú list ussun ekkewe pwóróus kopwap káé. Atun a ppiitá och óm kapas eis, mwittir makkeetiw. Lemuchúlóón óm káé, neman epwe pwal wor ekkóch pwóróus ka mochen pwal makkeetiw pwe kopwap káé.

• Tipemecheres le féri ekkesiwil. Ewe mettóch mi kon aúchea, ina an a fis iteiten wiik óm káé. Ren an epwe fis ena, neman mi lamot kopwe tipemecheres le siwili ránin me kulókun óm káé, úkúúkún ttamen óm káé, are masouen óm káé.

Sia kúna feiéch ren ach káé iteitan. Sia akkarap ngeni Jiowa, sia káé le eáni kefil mi múrinné, me sia meefi kinamwe.—Jos. 1:8.