EKKEWE chón Israel lóóm ra fókkun sani kél me nikáttik. A mak lón ewe Paipel pwóróusen chókkewe mi ettik nikáttik me kél. A wor chómmóng kinikin lón Paipel iir kél, áwewe chék ren ekkewe puken Kölfel, Än Salomon Köl, me Kölün Kechü. Ina popun ewe puk itelapan Music in Biblical Life, a erá pwe ewe Paipel a affata pwe ekkewe chón Israel ra kan kél me ettik nikáttik atun ra féri sókkopaten mettóch rán me rán.

Kél me nikáttik rán me rán. Ekkewe chón Israel ra pwáári meefier atun ra ettik nikáttik me kél. (Ais. 30:29) Ekkewe fefin ra ettik pisekin ettik me ra kél fán pwapwa me pwérúk atun emén a wiliiti king, atun fansoun fetellap, me atun soufiu ra okkufu pwal eú mwú lón maun. (Souk. 11:34; 1 Sam. 18:​6, 7; 1 King 1:​39, 40) Ekkewe chón Israel ra pwal kélú ekkewe kélún kechiw atun fansoun letipechou. (2 Kron. 35:25) A ffat pwe ekkewe chón Israel ra fókkun aúcheani kél me nikáttik.

Ekkewe kingen Israel ra pwapwaiti kél me nikáttik. King Saul a ewisa ngeni Tafit an epwe kél me ettik pisekin ettik lón imwan we. (1 Sam. 16:​18, 23) Mwirin, atun Tafit a pwal wiliiti king, a féri sókkopaten pisekin ettik, makkeei ekkewe kél mi múrinné, me akkóta ewe kúmien chón kél me ettik lón án Jiowa we imwenfel. (2 Kron. 7:6; Am. 6:5) Lón imwen King Salomon we, a wor ekkewe mwán me fefin mi sipeéch le eáni kél.—SalAf. 2:8.

Kél me nikáttik atun ar fel ngeni Jiowa. Ekkewe chón Israel ra kél me ettik nikáttik atun ra fel ngeni Jiowa. Ren enletin, 4,000 aramas ra ettik nikáttik lón ewe imwenfel Jerusalem. (1 Kron. 23:5) Ra ettiki pisekin kaktai, kitar, úkúlele, me rappwa. (2 Kron. 5:12) Nge esap chék ekkena mi lipwákéch ra fel ngeni Jiowa ren kél me nikáttik. Chómmóng chón Israel ra kélú ekkewe kélún feitá atun ra fetál ngeni Jerusalem fán iten ekkewe fetellap iteiten ier. (Kölf. 120-134) Pwal och, me ren makkeien ekkóch soumak iir chón Jus, ekkewe chón Israel ra kélú ekkóch ekkewe kél lón Kölfel a atun mwéngéén ewe Pasofer.

Kél me nikáttik ra fókkun aúchea me ren néún Kot kewe aramas lón ei fansoun. (Jem. 5:13) Kél, ina kinikinin ach fel ngeni Jiowa. (Efi. 5:19) Ach kewe kél ngeni Jiowa ra etipeeúfengenikich. (Kol. 3:16) Me ra apéchékkúlakich atun sia nóm fán watteen weires. (Féf. 16:25) Ach eáni kél me ettik nikáttik, ina eú alen ach sipwe tongeni pwáári ach lúkúlúk wóón Jiowa me tongei.