1. Lón Pwúpwúlú

A sókkofesen án aramas ekiek ussun ewe mettóch pwúpwúlú, me met a lamot ren an epwe wor pwapwa lón pwúpwúlú.

WEWEEN: Ewe kókkótun pwúpwúlú, a pop seni Kot, ina popun a silei met a lamot ngeni eú pean pwúpwúlú ren ar repwe pwapwa. (Mark 10:​6-9) Epwe wor pwapwa iká iir me rúúemén ra nefótófót wóón met repwe féri ren an epwe núkúcharoló ar we pwúpwúlú, nge esap wóón pwisin iir. Emén mwán mi tongei pwúlúwan, epwe pwáári an tong ren féfférún ngeni. Me emén fefin mi súféliti pwúlúwan, epwe pwáári ren napanapen an fós me féffér ngeni.

ÁLILLISÉCHÚN ÁN PAIPEL EMMWEN: Quang me Thi, seni Vietnam, ra lúkú pwe esap fókkun tufich an epwe wor pwapwa lón ar we pwúpwúlú. Fán chómmóng, Quang ese kan pwáári kirekiréch. A erá: “Úse pwal ekieki meefien Thi, me fán chómmóng úa kan eletipengawa.” Thi a mochen museni Quang. A erá: “Úa meefi pwe úse chúen tongeni lúkúlúkú are súféliti pwúlúwei na.”

Ekiseló mwirin, Quang me Thi ra káé met Paipel a eáni káit, me ifa ussun repwe apwénúetá Efisus 5:33 lón ar pwúpwúlú. Quang a apasa: “Ena wokisin a álisiei le silei lamoten ái úpwe eáni kirekiréch me ámmeef ngeni Thi pwe úa tongei me mochen túmúnú lón pekin áion, pekin inis, me pekin memmeef. Atun úa féri ena, a lapóló an tongeei me súfélitiei.” Me Thi a erá, “Lapólóón ái apwénúetá Efisus 5:​33, me pwáári ái súféliti pwúlúwei we, pwal ina lapólóón an tongeei, túmúnúei, me efisi ái úpwe meefi kinamwe.”

 2. Ussun Féfférúch Ngeni Aramas

Fán chómmóng, aramas ra kan kirikiringaw ngeni ekkewe ekkóch pokiten ar lewo, fénúer, napanaper, ar lamalam, are pokiten iir mwán mi sani mwán, are iir fefin mi sani fefin.

WEWEEN: Ewe Paipel ese áiti ngenikich ach sipwe oput aramas pokiten fénúer, ar lewo, are iká iir mwán mi sani mwán, are iir fefin mi sani fefin. Nge a fen pesekich ach sipwe súféliti aramas meinisin, ese lifilifil ia ra feito me ie, ar lewo, are nónnómur. (Féffér 10:34) Inaamwo iká sise tipeeú ngeni met aramas ra eáni lúkú are ar féffér, nge sia chúen tongeni kirekiréch ngeniir me súfélitiir.—Mattu 7:12.

ÁLILLISÉCHÚN ÁN PAIPEL EMMWEN: Daniel a káé an epwe ekieki pwe aramas seni Asia iir mi efeiengaw ngeni fénúan we. A oputa meinisin chón Asia, me fán chómmóng a kan esiiter lein aramas. Daniel a erá: “Tittipei pwe úa álisaatá fénúei we. Me úse pwal mwo nge ekieki pwe a ngaw napanapen ái ekiek me féffér.”

Mwirin, Daniel a káé met Paipel a asukula. A erá: “A lamot ái úpwe siwili unusen ái ekiek, me eáni án Kot ekiek ussun aramas, weween pwe aramas meinisin léllé chék ese lifilifil ia sia feito me ie.” Daniel a áweweei meefian iei atun a kan chuuri aramas. A erá: “Lape ngeni, úse pwal mwo nge ekieki ia ra feito me ie. Iei úa tongei sókkopaten aramas me a wor chiechiei seni ekis meinisin.”

 3. Lón Pekin Moni

Chómmóng aramas ra achocho ngeni ar repwe pisekisekiló pwe repwe pwapwa me epwe núkúnúkéch manawer lón fansoun mwer.

WEWEEN: A lamot ngenikich moni, nge ese tongeni wesewesen atoto ngenikich pwapwa me núkúnúkéch lón fansoun mwach. (Än Salomon Fos 18:11; 23:​4, 5) Nge pwapwa mi enlet, me manaw mi núkúnúkéch lón fansoun mwach, a lóngólóng wóón ach apwénúetá ewe tipáchem seni Kot mi nóm lón ewe Paipel.—1 Timoty 6:​17-19.

ÁLILLISÉCHÚN ÁN PAIPEL EMMWEN: Cardo, emén mwán lón Indonesia, a nefótófót wóón an akkomwa wéú. A erá: “A wor rei meinisin ekkewe mettóch lape ngeni aramas ra mochen. Úa tongeni sáifetál me kamé ekkewe pisek mi fókkun múrinné, tarakú, me imw.” Nge ese nómottam néún moni. Cardo a erá: “Emén a otupuei, me angei seniei unusen ewe moni úa angang weires le angei. Úa angang weires ren fite ier pwe úpwe pisekisekiló, nge mwirin úa letipengaw pwe ese chúen wor rei piseki kena, me úa meefi pwe ese chúen wor lamoten manawei.”

Cardo a poputá le apwénúetá án Paipel kapasen emmwen ussun moni. Ese chúen unusen áeá péchékkúlan le alapaaló wéún, nge a filaatá le eáni eú manaw mi menemenéch. A erá: “Iei úa meefi pwe a nóm rei ewe wéú mi enlet pokiten úa ririéch ngeni Kot. Me a kinamwe ái méúr iteiten pwiin, me úa enletin pwapwa.”

 4. Lón Pekin Lisowu

A fókkun sókkopat án aramas ekiek ussun met sókkun féfférún lisowu a ketiw.

WEWEEN: Ewe Paipel a apasa ié kewe chék ra tongeni féri ewe féfférún lisowu. Ewe kapas “lisowumwáál” a kapachelong lisowu lúkún pwúpwúlú, án emén amémé inisin, féfférún lisowu lefilen ekkewe rese pwúpwúlú, lisowu lefilen mwán me mwán, fefin me fefin, me lisowu ngeni man. (1 Korint 6:​9, 10) Ewe féfférún lisowu, ina eú liffang seni Kot fán iten chék emén mwán me emén fefin iir pwúpwúlú.—Än Salomon Fos 5:​18, 19.

ÁLILLISÉCHÚN ÁN PAIPEL EMMWEN: Emén fefin seni Australia itan Kylie a apasa: “Pokiten ngang emén lipich, úa ekieki pwe iká úa féri féfférún lisowu, úpwe meefi pwe a wor tongei me úpwe meefi núkúnúkéch. Nge esap ina met a fis. Úse fén meefi núkúnúkéch, me úa meefi letipengaw.”

Mwirin, Kylie a káé me apwénúetá met Paipel a apasa ussun lisowu. A apasa: “Úa tongeni weweiti pwe án Kot kapasen emmwen a túmúnúei seni letipechou me feiengaw. Iei, úa meefi núkúnúkéch me meefi pwe a wor tongei pokiten úa féri ekkewe mettóch lón ewe napanap Jiowa a mochen ach sipwe féri. Ái apwénúetá án Paipel kapasen emmwen, a túmúnúei seni watteen letipechou!”