Lón ewe lesen mwen ei, sia pwóróus usun ewe esissil Jesus a kapas usun. Ena esissil a pwáraaló pwe Kot a poputááni an we Mwú lón láng nge Jesus Kraist i ewe King lón.

Ewe Paipel a apasa pwe atun Jesus a poputá lón wisan we, i a atowu Satan me néún kewe timon seni lón láng. Ina popun, iei ra chék tongeni féri ar angang wóón fénúfan, ina eú me lein ekkewe popun a ngangngawoló nónnómun fénúfan seni ewe ier 1914.​—Pwärätä 12:7, 9.

Inaamwo ika a ngangngawoló napanapen ei fénúfan, nge Jesus, lón an Kingen án Kot we Mwú, a fen álisi aramas wóón unusen fénúfan. Ren ewe angangen asukula aramas ewe Paipel mi fis wóón unusen fénúfan, ewe Jesus a oesini usun, chómmóng ra káé me apwénúetá ekkewe kapasen emmwen seni Paipel lón manawer. (Aisea 2:2-4) Fite million aramas ra fen káé ifa usun ar famili epwe pwapwa me resap mut ngeni ar angangen moni are mettóchun aion an epwe akkomw lón manawer. Ekkeei aramas ra káé ifa usun repwe ámúrinnééló manawer lón ei fansoun me wiliti ewe esin aramas Kot a tipeni an epwe nóm fán nemenien an we Mwú.

Inaamwo ika Jesus a fen nemenem lón láng, nge mwúún aramas ra chúen nemenem wóón fénúfan. Iwe nge, iei met Kot a ewisa ngeni Jesus: “Kopwe nemenem won chon oputom.” (Kölfel 110:2) Ekiseló chék Jesus epwe unusen okkufaaló meinisin chón oputa i me atoto kinamwe ngeni chókkewe mi tipemecheres le álleasochisi Kot.

Lón ena fansoun, án Kot we Mwú epwe angolong me

• Ataieló lamalam chofona. Ekkewe lamalam mi áiti ngeni aramas minne mi chofona fán iten Kot me efisi weiresin manawen aramas resap chúen nóm. Paipel a eita ngeni ekkewe lamalam mi chofona emén fin lisowu. Katalóón lamalam chofona epwe fókkun ámáirú ngeni chómmóng aramas.​—Pwärätä 17:15, 16.

• Ataieló án aramas nemenem. Án Kot we Mwú epwe mwékút me ataieló án aramas nemenem meinisin.​—Pwärätä 19:15, 17, 18.

• Arosaló aramas mi ngaw. Nge ifa usun chókkewe mi chúen sópweló le féri minne mi ngaw me rese mochen álleasochisi Kot? Paipel a apasa: “Ekewe aramasangau repwe kärila seni ewe fanü.”​—Än Salomon Fos 2:22.

• Amóeló Satan me ekkewe timon. Satan me ekkewe timon resap “chüen tongeni tufichin atupu chon ekewe mwü.”​—Pwärätä 20:3, 10.

Met lamoten ekkeei mettóch ngeni chókkewe mi onómuur fán nemenien án Kot we Mwú?

Minne Jesus epwe féri lón an nemenem seni lón láng epwe fókkun watte lap seni met ekkewe sounemenemen fénúfan ra tongeni féri. Ekkewe 144,000 mi kefil seni wóón fénúfan repwe eti Jesus le nemenem. (Pwärätä 5:9, 10; 14:1, 3) I epwe fókkun apwénúetá minne Kot a tipeni wóón fénúfan. Met án Kot we Mwú epwe féri fán iten chókkewe mi nóm wóón fénúfan?

• Amóeló semmwen me máló. “Esap wor eman chon ewe fanü epwe apasa pwe a samau.” Esap pwal “chüen wor mäla.”​—Aisea 33:24; Pwärätä 21:4.

• Awora enletin kinamwe me núkúnúkéch. “Üpwe awöüür o fang ngeniir kinamwe,” me “eman me eman epwe nom lon an tanipin wain me fän an irä fiik fän kinamwe, nge esap wor eman epwe eniuokusu.”​—Aisea 54:13; Mika 4:4.

• Awora angang mi múrinné. “Nei chon fil repwe pwapwaiti feiöchün angangen pöür fansoun langatam.” Me ekkewe angang ra féri epwele pwénúetá.​—Aisea 65:22, 23.

• Fénúfan epwe múrinné. “Ewe fanüapö me ewe fanüpwas repwe pwapwa, ewe fanüapö epwe mwänek o afisätä pön irä usun chök ekewe rous.”​—Aisea 35:1.

• Asukula ngeni aramas minne repwe féri pwe repwe kúna manaw tori feilfeiló. “Iei manau esemüch: Ar repwe silei en, ewe eman chök Kot mi let, repwe pwal silei Jesus Kraist, ewe ka tinato.”​—Johannes 17:3.

Kot a mochen óm kopwe kúna ekkena feiéch. (Aisea 48:18) Ewe lesen mwirin ei epwe fós usun met ka tongeni féri iei pwe kopwe tongeni kúna ekkena mettóch mi amwarar.