Ewe soufós Moses a apasa pwe sia feiéch ika sipwe álleasochisi án Kot kewe allúk. (Tuteronomi 10:13; 11:27) Ach álleasochisi Kot esap pokiten ach niwokkusiti an epwe apwúngúkich. Nge napanapan kewe mi múrinné ina met a amwékútúkich le álleasochisi i pokiten sia tongei me sise mochen féri met epwe letipechou ren. “Pun wewen ach echeni Kot pwe sia aleasochisi an kewe allük.”​—1 Johannes 5:3.

Nge ifa usun sia feiéch ren ach álleasochisi Kot? Sipwe ppii ruu popun.

“Ngang ewe Samol mi Lapalap [Jiowa] om we Kot. Üa aiti ngonuk mine kopwe feiöch ren, üa pwal emweni ngonuk ewe al kopwe fetal won.”​—AISEA 48:17.

Jiowa Kot, ewe Chón Fératá, a silefichiikich me a awora emmwen mi lamot fán itach. Ika sia mochen áitian kewe repwe álisikich le féri kefil mi múrinné, a lamot sipwe káé seni Paipel met a mochen sipwe féri me apwénúetá lón manawach.

“Ra feiöch chokewe mi rong kapasen Kot o aleasochis ngeni.”​—LUKAS 11:28.

Lón ach ei fansoun, million aramas mi álleasochisi án Kot Kapas ra enletin pwapwa. Áwewe chék, ren pwóróusen emén mwán lón Spein mi nisossong me arochongaw ngeni aramas, pwal ngeni pwúlúwan we. Eú rán a álleani met ewe soufós Moses a apasa usun mosonosonun Josef, néún Jakop we. Josef a wiliti emén slave me a kalapus ren och popun ese pwúng. Inaamwo ika ina, nge a chúen amwéchú an kinamwe, a mosonoson, me omusaaló tipisin aramas. (Keneses, sópwun 37-45) Ena mwán lón Spein a erá: “Ai ekieki usun án Josef leenien áppirú a amwékútúei le ámááraatá mosonoson, kirekiréch, me nemeni pwisin meefiei. Iwe iei, ua pwapwa lón manawei.”

Ewe Paipel a awora pwal ekkóch emmwen usun féfférúch ngeni ekkewe ekkóch. Ppii tichikin pwóróusan lón ewe lesen mwirin ei.