“Iei i nei we chon angang, . . . üa unusen pwapwa ren.”​—AIS. 42:1.

1. Ifa ewe pesepes fän iten nöün Jiowa kewe aramas pokiten a arapakkan ewe Ränin Ächechchem, me pwata?

 POKITEN a arapakkan ewe Ächechchemenien än Jises mälo, a öch ren nöün Jiowa kewe aramas ar repwe aüseling än ewe aposel Paul pesepes “nenengeni Jesus ewe chon popuetä me chon awesala ach lükülük.” Paul a pwal apasa: “Oupwe ekieki usun watten an riaföü pokiten ekewe chon tipis mi oput i! Iei mine ousap apilükingau o fangatä.” (Ipru 12:2, 3) Ach nengeni unusen manauan Jises, ewe mi tuppwöl tori än mälo, epwe älisi meinisin ekkewe chon kepit me chiener kewe pwal ekkoch siip ar repwe sopwelo ar angang ngeni Jiowa fän tuppwöl nge resap “fangatä.”​—Apöpööü Kalesia 6:9.

2. Met sipwe tongeni käeö seni än Aisea kewe oesini mi weneiti nöün Kot we?

² Me ren ewe soufos Aisea, Jiowa a fen apasa chommong oesini ussun Nöün we. Ekkeei oesini repwe älisikich le “nenengeni Jesus ewe chon popuetä me chon awesala ach lükülük.” a Ra äiti ngenikich napanapan kewe, an kewe riäfföü, me an tekiatä ussun ach King me Chon Amanau. Repwe alapalo ach weweöchiti ewe Ränin Ächechchem epwe fis lon ei ier, lon Arüänü, April 9, mwirin tuputiuen ewe akkar.

A Sillelo Ewe Chon Angang

3, 4. (a) Lon puken Aisea, ewe kapas “chon angang” a weneiti iö? (b) Ifa ussun ewe Paipel a pwäralo ika iö ewe Chon Angang lon Aisea sopwun 42, 49, 50, 52, me 53?

³ Ewe kapas “chon angang” a mak fän chommong lon ewe puken Aisea. Fän ekkoch a pwisin weneiti ewe soufos Aisea. (Ais. 20:3; 44:26) Nge pwal fän ekkoch a pwal weneiti ewe mwuun Israel are Jakop. (Ais. 41:8, 9; 44:1, 2, 21) Nge ren ekkewe oesini ussun ewe Chon Angang lon Aisea sopwun 42, 49, 50, 52, me 53 a wewe ngeni iö? Ewe Tesin Krik a fokkun pwäralo ngenikich iö na nöün Jiowa we Chon Angang ewe puken Aisea a fos ussun. Lon puken Fofor, a mak pworausen ewe re Itiopia a äkkälleani eü me lein ekkena oesini lon puken Aisea, iwe ewe ngün mi fel a emmweni Filip an epwe afalafal ngeni. Ewe meilapen Itiopia a kerän wes le ällea ewe pworaus a mak lon Aisea 53:7, 8, nge a eisini Filip: “Kose mochen üreniei, iö ewe soufos a kapas usun? A kapas usun i  ika usun eman?” Mwittir chök, Filip a aweweei pwe Aisea a kapas ussun Jises, ewe Messaia.​—Fof. 8:26-35.

⁴ Le mönükolun Jises we, emön mwän mi pwüng itan Simeon a oesini fän emmwenien ewe ngün mi fel pwe Jises ‘epwe eü saram mi pwäralo letipan [Jiowa] ngeni ekkewe chon lükün Israel.’ Ei oesini a fen mak lon Aisea 42:6 me 49:6. (Luk 2:25-32) Aisea 50:6-9 a pwal oesini pwe Jises epwe küna riäfföü mi ässäü lon ewe pwinin a kapwüng. (Mt. 26:67; Luk 22:63) Mwirin ewe ränin Pentikos 33 C.E., ewe aposel Piter a wesewesen pwäralo pwe Jises, nöün Jiowa we “Chon Angang.” (Ais. 52:13; 53:11; älleani Fofor 3:13, 26.) Met sia käeö seni ekkeei oesini ussun ewe Messaia?

Jiowa A Asukula Nöün Chon Angang

5. Ifa ewe asukul ewe Chon Angang a angei?

⁵ Eü me lein än Aisea kewe oesini ussun nöün Kot Chon Angang a äiti ngenikich ussun ewe ririöch lefilen Jiowa me nöün we mwänichi mwen an feitiu fönüfan. (Älleani Aisea 50:4-9.) Ewe Chon Angang a pwisin pwäratä pwe Jiowa a akkasukula i ren an apasa: “Iteiten lesosor a föngüniei, a suki selingei pwe üpwe tufichin aüseling usun eman chon kaiö a aüseling.” (Ais. 50:4) Lon ekkena fansoun, nöün Jiowa na Chon Angang a aüselingöch me käeö seni Seman, ussun emön chon käeö mi älleasochis. A ifa me watteen aücheaan an epwe käeö me ren Jiowa, ewe Chon Föratä mettoch meinisin!

6. Ifa ussun ewe Chon Angang a pwäratä an unusen anomu manauan fän nemenien Seman we?

⁶ Lon ei oesini, ewe Chon Angang a kapas ussun Seman pwe I ewe “Samol mi Lapalap.” Ei mettoch a pwäratä pwe ewe Chon Angang a mirititi pwe Jiowa ina i ewe Epinkepiisom. A pwäratä an unusen anomu manauan fän nemenien Seman we ren an a apasa: “Iwe, Kot ewe Samol mi Lapalap a suki selingei, nge üsap lükümach ngeni, üsap pwal sap seni.” (Ais. 50:5) A “nom ren Kot usun eman sousile angang” atun a föratä unuselapen läng me aramas. Ei “sousile angang” a ‘meseik me fän mesan [Jiowa] fansoun meinisin, a meseikeiti unusen an we fanüfan, a pwapwa ren ekewe aramasen fanüfan.’​—SalF. 8:22-31.

7. Met a änneta pwe ewe Chon Angang a unusen lükü än Seman we älillis lon fansoun sossot?

⁷ Lamoten ewe asukul ewe Chon Angang a angei me an pwapwaiti chon fönüfan ra atufichi i le mmolnetä ngeni an epwe feitiu fönüfan me küna koput. A chök pwapwa le föfföri letipen Seman inaamwo ika a küna riäfföü mwääl. (Kölf. 40:8; Mt. 26:42; Jon 6:38) Lon meinisin an kewe sossot woon fönüfan, Jises a unusen lükü pwe Seman we a pwapwaiti me älisi i. Ussun met Aisea a fen oesini, Jises a tongeni apasa: “Kot a arap ngeniei o peniei. Iö epwe anini ngeniei? . . . Nengeni, Kot ewe Samol mi Lapalap a alisiei.” (Ais. 50:8, 9) Pwal eü oesini me ren Aisea a affata pwe Jiowa a fokkun älisi nöün we Chon Angang mi tuppwöl le föri an angang meinisin woon fönüfan.

Än ewe Chon Angang Afalafal woon Fönüfan

8. Met a ännetatä pwe Jises, ina i ewe Jiowa a “afili” me ren ewe oesini lon Aisea 42:1?

⁸ Iei alon Paipel met a fis ngeni Jises lupwen a papatais lon 29 C.E.: “O ewe Ngünmifel a feitiu won . . . iwe, eu möngüngü a feitiu seni läng a apasa, ‘En nei mi fokun achengicheng, üa unusen pwapwa reöm.’” (Luk 3:21, 22) Ina minne, Jiowa a affata iö ewe a “afili” me ren an Aisea oesini. (Älleani Aisea 42:1-7.) Lon an angang woon fönüfan, Jises a unusen apwönüetä ei oesini. Ewe Kapas Allim me ren Mattu a aloni ekkewe kapas mi mak lon Aisea 42:1-4 me affata pwe a pwönüetä ren Jises.​—Mt. 12:15-21.

9, 10. (a) Ifa ussun Jises a apwönüetä Aisea 42:3 lon an angangen afalafal? (b) Ifa ussun Kraist a “awora pwüng” atun a nom woon fönüfan? Ineet epwe “anüküchara pwüng won fanüfan”?

⁹ Ekkewe aramas kisikis lein ekkewe chon Jus ra änioput me ren ekkewe nouwisen lamalamen  Jus. (Jon 7:47-49) Ra eriäfföüü ekkewe aramas mi wewe ngeni ‘ekkewe äsät mi puopu’ are ‘ekkewe wiik’ repwele kululo. Iwe nge, Jises a kirekiröch ngeni ekkewe mi osupwang me küna weires. (Mt. 9:35, 36) A etiwer fän kirekiröch me a erä: “Oupwe feito rei ämi meinisin mi weiresikis o uwochou, ngang üpwe asösökemi.” (Mt. 11:28) Pwal och, Jises a “awora pwüng” ren an asukula aramas ussun an Jiowa kewe allük ussun minne mi pwüng me mwääl. (Ais. 42:3) A äiti ngeniir lamoten ar repwe apwönüetä än Kot kewe allük fän pwüng me kirekiröch. (Mt. 23:23) Jises a pwal pwäratä pwüng ren an afalafal ngeni aramas ese lifilifil ika iir mi wöüöch are wöüngaü.​—Mt. 11:5; Luk 18:18-23.

¹⁰ Aisea a pwal oesini pwe ewe Jiowa a “afili” epwe “anüküchara pwüng won fanüfan.” (Ais. 42:4) Ekiselo epwele mwöküt lon wisan we wisen Kingen ewe Mwuun Messaia, iwe, epwele ataielo mwuun ekkewe king me föratä an we nemenem mi pwüng. Epwele poputääni ewe otot mi fö “ia pwüng epwe chöchöla ie.”​—2 Pit. 3:13; Tan. 2:44.

“Eü Saram” me “eü Pwon”

11. Ifa ussun Jises eü “saram ngeni chon ekewe mwü” lon fansoun ekkewe aposel me pwal tori ikenäi?

¹¹ Ren pwönüetään ewe oesini lon Aisea 42:6 Jises a änneta pwe i ewe “saram ngeni chon ekewe mwü won fanüfan.” Atun an we angang woon fönüfan, a uwato saramen ewe enlet, äkkäeüin ngeni ekkewe chon Jus. (Mt. 15:24; Fof. 3:26) Nge Jises a erä: “Ngang ewe saramen fanüfan.” (Jon 8:12) A wiliti eü saram fän iten chon Jus me chon ekkewe mwu esap chök ren an asaramer ren ewe enlet nge pwal ren an awora ewe möön kepich me fangolo manauan mi unusöch fän äsengesin aramas meinisin. (Mt. 20:28) Mwirin an we manausefäl, a awisa ngeni nöün kewe chon künö ar repwe pwäratä ussun “lon unusen fanüfan.” (Fof. 1:8) Lupwen Paul me Parnapas ra afalafal, ra aloni alon ewe mwuten kapas ussun ewe “saram ngeni chon ekewe mwü” me ra aweweei pwe ena oesini a weneiti ar angangen afalafal ngeni ekkewe chon lükün Israel. (Fofor 13:46-48; apöpö ngeni Aisea 49:6.) Tori iei, nöün Jises kewe mi kepit me chiener kewe ra chüen föri ei angangen afalafala ewe kapas allim me älisi ekkewe aramas ar repwe lükü pwe Jises i ewe “saram ngeni chon ekewe mwü.”

12. Ifa ussun Jiowa a föri “eu pwon ngeni aramasen fanüfan” ren nöün we Chon Angang?

¹² Lon pwal ena chök oesini, Jiowa a apasa ngeni nöün we Chon Angang mi fil: “Üa . . . tümwünuk. Iwe, üpwe föri reöm eu pwon ngeni aramasen fanüfan meinisin.” (Ais. 42:6) Setan a kon achocho an epwe nielo Jises me eppeti i pwe esap tongeni awesalo an angang woon fönüfan, nge Jiowa a tümünü i tori ewe fansoun mi affat an epwe mälo. (Mt. 2:13; Jon 7:30) Iwe, Jiowa a amanauatä Jises me a föri ren “eu pwon” ngeni aramas woon fönüfan. Ena pwon mi fel eü minen alükülük pwe nöün Kot we Chon Angang mi tuppwöl epwe sopwelo wisan an epwe eü “saram ngeni chon ekewe mwü,” me epwe angasalo iir kewe  ra nom lon rochopwak pun rese silei Kot.​—Älleani Aisea 49:8, 9. b

13. Ifa ussun Jises a epichalo “chokewe mi nom lon rochopwak” lupwen a nonnom woon fönüfan? Ifa ussun a chüen föfföri ena ikenäi?

¹³ Ren pwönütään ei pwon, nöün Jiowa Chon Angang epwe “anelai mesen chon chun,” “angasa chon fötek seni lon imwen fötek,” me epichalo “chokewe mi nom lon rochopwak.” (Ais. 42:7) Lupwen Jises a nom woon fönüfan, a pwäralo mwäälin eörenien lamalam mi chofona me a esilefeili ewe kapas allim ussun ewe Mwu. (Mt. 15:3; Luk 8:1) Ina minne, a angasalo iir kewe ra wiliti nöün chon käeö seni lamalam mi chofona. (Jon 8:31, 32) Pwal ina chök ussun ikenäi, Jises a fen angasalo fite million chon lükün Israel ren ewe enlet. A pwal allükü ngeni nöün kewe chon käeö pwe repwe ‘feinno ren aramas meinisin won fonufan o repwe ewinireno pwe repwe nöün chon kaeo.’ (Mt. 28:19, 20, Ewe Kapasen God) Seni läng, Jises Kraist a kan emmweni ewe angangen afalafal woon unusen fönüfan.

Jiowa a Atekiatääi ewe “Chon Angang”

14, 15. Pwata me ifa ussun Jiowa a ätekiatääi nöün we Chon Angang?

¹⁴ Iei alon Jiowa lon pwal eü oesini ussun nöün Chon Angang, ewe Messaia: “Nengeni, nei chon angang epwe lipwäköch, epwe seikitä o ling, epwe pwal fokun tekiatä.” (Ais. 52:13) Pokiten Jises a anomu unusen manauan fän än Jiowa we nemenem me tuppwöl fän ewe sossot mi lap, Jiowa a ätekiatääi i.

¹⁵ Ewe aposel Piter a makkei ussun Jises: “I ewe mi feitä läng, a nonom lepelifichin Kot o a nemeni ekewe chon läng meinisin, pwal ekewe ngün mi wor ar nemenem me manaman.” (1 Pit. 3:22) Pwal ina chök ussun Paul lupwen a makkei: “A püsin atekisonatiu o eäni aleasochis tori mäla . . . Iei mine Kot a atekiatai won eu leni mi fokun tekia, a pwal ngeni eu it mi iteföüla seni it meinisin. Iwe, chokewe meinisin mi nom won läng me fanüfan pwal failol repwe fotopwäsuk o asamolu ewe it iten Jesus, nge ir meinisin repwe pwärätä pwe Jesus Kraist i Samol, pwe Kot Sam epwe ling ren.”​—Fil. 2:8-11.

16. Ifa ussun Jises a “fokun tekiatä” lon 1914, me met a fen föri seni ena ier?

 ¹⁶ Lon 1914, a lapolo än Jiowa ätekiatääi Jises. A kon “fokun tekiatä” lupwen a seikitä lon wisan we Kingen ewe Mwuun Messaia. (Kölf. 2:6; Tan. 7:13, 14) Seni ena atun, Kraist a poputä le ‘nemenem woon chon oputan.’ (Kölf. 110:2) A akkomw akkufu Setan me nöün kewe timon me otururetiü woon fönüfan. (Pwar. 12:7-12) Iwe, ussun Sirus mi Lap, Kraist a angasalo lusun pwiin kewe mi kepit woon fönüfan seni fötekin “Papilon mi lapalap.” (Pwar. 18:2; Ais. 44:28) A emmweni ewe angangen afalafal woon unusen fönüfan, iwe, ei angang a ionfengenni ekkewe “lusun mwirimwirin” pwiin Jises kewe lon pekin lükü me ekkewe fite million pwal “ekoch sip,” chienen ewe “mwich mi kisikis.”​—Pwar. 12:17; Jon 10:16; Luk 12:32.

17. Met sia silei iei ren ach käeö än Aisea kewe oesini ussun ewe “chon angang”?

¹⁷ Enlet, ach käeö ekkeei oesini mi amwarar lon puken Aisea a alapalo ach aücheani ach we King me Chon Amanau, Jises Kraist. Än Jises unusen älleasochisi Kot lupwen a nom woon fönüfan, a pwäratä met a käeö seni Seman mwen an feitiu fönüfan. A fen ännetatä pwe i ewe “saram ngeni chon ekewe mwü,” ren an pwisin afalafala aramas me an emmweni ewe angangen afalafal tori ikenäi. Iwe, lon ewe lesen mwirin ei, sipwap käeö pwal eü oesini ussun ewe Chon Angang me Messaia pwe epwe küna riäfföü me fangolo manauan fän itach. Ikkeei ekkewe mettoch mi lamot sipwe fokkun “ekieki” lon ei fansoun a arapoto ewe ränin Ächechchemenien än Jises we mälo.​—Ipru 12:2, 3.

[Footnote]

Enniwili Pworaus

• Iö na ewe “chon angang” ekkewe oesini lon Aisea ra kapas ussun, me pwata sia silei?

• Ifa ewe asukul ewe Chon Angang a angei seni Jiowa?

• Ifa ussun Jises eü “saram ngeni chon ekewe mwü”?

• Ifa ussun Kot a ätekiatääi ewe Chon Angang?

[Ekkewe Kapas Eis fan Iten ewe Lesen]

[Sasing lon pekin taropwe 21]

Filip a affata pwe ewe “chon angang” Aisea a kapas ussun, ina i Jises, ewe Messaia

[Sasing lon pekin taropwe 23]

Jises, nöün Jiowa we Chon Angang mi fil, a kirekiröch ngeni ekkewe mi osupwang me weiresikis

[Sasing lon pekin taropwe 24]

Jiowa a ätekiatääi Jises me a seikatä i pwe epwe wisen Kingen ewe Mwuun Messaia