Mei Wor Iten Kot?
Pölüwan me ren aramas:
▪ “Iten Kot, Kot.”
▪ “Esor itan.”
Met Jises a apasa?
▪ “Iwe, iei usun ämi oupwe iotek: ‘Semem mi nonnom läng, itom epwe fel.’” (Mattu 6:9, TF) Jises a lükü pwe mei wor iten Kot.
▪ “Ngang üa asile ngeniir itom, nge üpwe sopwela ai föri iei usun, pwe ewe chen ka eäni ngeniei epwe nonom lor, pwal ngang üpwe nonom lor.” (Jon 17:26) Jises a pwäratä iten Kot we ngeni aramas.
▪ “Ousap chüen künaei, tori oupwe apasa, ‘A feiöch ätewe a feito fän iten [Jiowa].’” (Luk 13:35; Kölf. 118:26) Jises a nönnöünöü iten Kot we.
KOT a pwisin esile ngenikich itan we. A mak pwe a apasa: “Ngang [Jiowa], iei chök itei.” a (Ais. 42:8) Ewe it Kot a eita ngeni pwisin I lon fosun Ipru a afföü ngeni Jiowa lon fosun Chuuk. Eli kopwe mäirü le silei pwe iten Kot lon fosun Ipru a mak fän fite ngeröü lon ekkewe taropween Paipel minen loom loom. Lon Paipel, ena it a mak fän chommong lap seni it meinisin.
Ekkoch repwe pölüweni ewe kapas eis, “Ifa iten Kot?” ren ar apasa, “ewe Samol.” Iwe nge, epwe ussun chök ach sipwe pölüweni ewe kapas eis, “Iö a win lon ewe üttüt?” ren ach apasa, “Ewe chon ssä ngeni ewe wis.” Ese ffat pölüwen ekkena ruu kapas eis, pun “Samol” me “chon ssä” esap iir wesewesen it.
Pwata Kot a pwär ngenikich itan we? A erenikich fän iten ach sipwe tongeni silefichi i. Awewe chök, emön epwe tongeni iteni Samol, Meilap, Papa, are Papa chi ika mi fich ngeni. Ekkena itelap ra affata pworaus ussun emönnewe. Nge pwisin itan we a ächchema ngenikich mettoch meinisin minne sia silei ussun i. Iwe, pwal ina chök ussun, lupwen sia älleani ekkoch itelapan kewe, awewe chök, Samol, Ewe mi Lapalap seni Meinisin, Semach, me Chon Föratä, sia ekieki ussun eü me eü föfförün are napanapen Kot kewe mi sokkopat. Nge pwisin iten Jiowa chök epwe ächchema ngenikich ussun meinisin minne sia silei ussun i. Ifa ussun kopwe wesewesen silei Kot ika kese silei itan?
Sisap chök silei itan, nge a lamot sipwe pwal pappani. Pwata? Pun ewe Paipel a erenikich: “Iteiten aramas mi köri iten ewe Samol epwe küna manau.”—Rom 10:13; Sowel 2:32.
[Footnote]
a Ren weween iten Kot we, ppii pekin taropwe 24-27 lon ewe puk Sile Mi Emmwen Ngeni Manau Esemuch, förien Chon Pwäratä Jiowa.
[Ekis Pworous lon pekin taropwe 6]
Emön epwe tongeni iteni Samol, Meilap, Papa, are Papa chi ika mi fich ngeni. Nge pwisin itan we a ächchema ngenikich mettoch meinisin minne sia silei ussun i.