Mei wor emön chienom a fen apworausok mettoch mi ngaü ussun emön kesaamwo sissilei? Lupwen ka chuuri emönnewe ka fen piin rong pworausan akkomw, eli kopwele chök ekieki ekkewe mettoch mi ngaü chienom we a apasa ussun. Met ka fen rongorong a eppeti om sileöchü än emönna tufich mi mürinnö me napanapöchün kewe. Pwal ina ussun met epwe fis ngenikich ren ewe Paipel.

EWE aposel Paul a öüröürakich ren met epwe fis ika sise älleani ewe Paipel fän eü ekiek mi tekison are sisap etiwa met ewe Paipel a wesewesen apasa. Iei makkeian ussun chon Jus lon an we fansoun: “Üa tongeni pwärätä usur, pwe ra fokun tiliken le angang ngeni Kot, nge ar tiliken le angang esap longolong won ar silei usun mine a let.”​—Rom 10:2.

Ekkewe chon Jus lon fansoun ekkewe aposel rese mochen lükü pwe Jises ewe Messaia inaamwo ika ewe Tesin Ipru a fen affata pwe i Jises seni Nasaret, i ewe a weneiti ekkewe oesini ussun ewe Messaia lon ewe Tesin Ipru, me a fen apwönüetä meinisin ekkewe oesini ussun met ewe Messaia epwe itä föri. Nge pokiten ekkewe chon Jus ra kon kamwöchünnük woon ar ekiek mi eipö me lükü esor longolongun, ina met a eppetiir le weweiti än Kot Kapas.

Met sia käeö seni ei pworaus? Mi lamot ach sipwe älleani ewe Paipel ren ekiek mi tekison.  Eü ekiek mi aapap me lükü ekkewe pworaus esor longolongun ina met epwe eppeti emön chon ällea Paipel an epwe weweiti ewe enlet.

Ren chök äwewe, emön senseen lamalam lon Merika a erä pwe ewe Paipel “förien me ekiekin aramas chök.” A pwal apasa pwe ekkewe chon makkeei ra sokkofesen woon ar ekiek me met ra apasa esap unusen emmweniöchü manauach. Ika emön epwe älleani ewe Paipel me eäni ewe ekiek pwe “forien me ekiekin aramas chök” nge esap seni Kot, iwe epwe tunalo ekkewe kapasen emmwen ese kan sani.

Mi sokkolo seni ena pwe ewe Paipel a pesei ngenikich ach sipwe tinikken le käeö. Iei met a apasa ussun ekkewe chon Perea lon fansoun Paul: “Ra etiwa ewe afalafal fän mochenin letiper. Iteiten rän ra kaiö lon ekewe Toropwe mi Pin o kütta are met Paulus a apasa a wesewesen pwüng.” (Fofor 17:11) Mi lamot kopwe pwal ussun ekkewe chon Perea le pöütalo meinisin ekiekin aapap are esiita Paipel mi atoputopu om weweiti ewe enlet. Älleani ewe Paipel ren eü ekiek mi tekison me mwasangasang le kütta än Kot Kapas mi amwarar.