Chommong ekkewe mi letip wenechar ra tipeni pwe attonger kewe repwe pwal silei än Kot kokkot me küna pwapwa lon manauer. Pokiten föfföröchün ekkewe kükkün me ekkewe watte a tongeni älisi emön an epwe tipatchem le filatä an epwe fangolo manauan ngeni Kot. Ina met a fis ngeni Jearim, emön sarafö lon Mexico. A makkeei och taropwe me a ngeni ekkewe sou emmwenin ewe eü rän mwichelap, än Chon Pwäratä Jiowa. Iei makkeian:

“Ua mochen apworausa met popun ua pwapwa. Engol me walu ier loom, lupwen usaamwo uputiu, inei me semei ra käeö ewe enlet. Inei we a feffeitä me papataiselo, ekiselo mwirin pwal ngang me mongeei we. Äm me ülümön aua iotek ngeni Jiowa pwe semem epwe pwal aleni ewe alen manau. Engol me walu ier a lo, nge ikenäi iei ewe rän mi kkolo aüchean ngenikem, pun semem epwele papatais. Ua kilisou ngeni Jiowa pun esaamwo amoielo ei otot mi ngaü me mwen ei fansoun semem a papatais. Kilisou chapur, Jiowa!”

Seni loom tori ikenäi, ena famili a amwöchü ekkewe kapasen emmwen mi mak lon 1 Piter 3:1, 2: “Ämi fefin kana, oupwe fokun aleasochisi pwülüemi kana, pun ika ekoch me leir resap lükü än Kot kapas, repwe tongeni lükü Jesus ren ämi föför. Ousap wisen apasatä och kapas, pun repwe chök soulängila ren ar küna ämi föför mi limöch me ämi sile menin.” Ese mwääl, Jearim a apwönüetä met a mak lon Tuteronomi 5:16: “Kopwe asamolu semom me inom, usun ngang ewe Samol mi Lapalap om Kot üa allük ngonuk.” Pokiten ra apwönüetä ekkena kapasen emmwen me likiitü le witi Jiowa, Jearim me an famili ra küna chommong feiöch.