“Iwe, ämi chiechiei kana, are oupwe apwönüetä mine üa allük ngenikemi.”​—JON 15:14.

1, 2. (a) Mei fet angangen me nonnomun chiechien Jises kewe? (b) Pwata a lamot sipwe wiliti chiechien Jises?

 A SOKKOPAT angangen me nonnomun ekkewe mwän mi mot ren Jises lon eü ruumw asan. Ekkewe pwipwi, Piter me Antru, iir chon attaw. Mattu, i emön chon angei takises akkomw, nge ina eü angang chon Jus ra wesewesen oput. Ekkoch leir, usun Jemes me Jon, ra silei Jises seni chök le kükkünür. Eli ekkoch, äwewe chök, Nataniel, ra silei Jises fitu chök ier. (Jon 1:43-50) Iwe nge, meinisin mi nom lon Jerusalem lon ewe pwinin Pasofer ra lükülük pwe Jises, i ewe Messaia mi pwonetiw, Nöün ewe Kot mi manau. (Jon 6:68, 69) Ese mwääl ra meefi än Jises tonger atun a ereniir: “Üa aita ngenikemi chiechiei, pun üa asile ngenikemi meinisin mine üa rongorong me ren Semei.”​—Jon 15:15.

² Alon Jises kana ngeni nöün kewe aposel mi tuppwöl ra pwal weneiti meinisin chon Kraist mi kepit ikenäi me pwal ekkewe “ekkoch siip.” (Jon 10:16, TF) Ese lifilifil nonnomuch, nge sipwe tongeni küna feiöchün ach sipwe wiliti chiechien Jises. A fokkun lamot ena, pun ren ach chiechi ngeni, sipwe pwal chiechien Jiowa. Pwüngün pwe sisap tongeni arap ngeni Jiowa ika sise akkomw arap ngeni Kraist. (Älleani Jon 14:6, 21.) Iwe, met sipwe föri pwe sipwe wiliti chiechien Jises me pacheöch ngeni? Me mwen ach sipwe käeö usun ena pworaus mi lamot, sipwe akkomw ppii ewe leenien äppirü usun chiechiöch Jises a isetiw, me käeö seni alon me föfförün nöün kewe chon äppirü pokiten an chiechi ngeniir.

Jises Emön mi Chiechiöch

3. Met Jises a sillelo ren?

³ King Salomon a makkeei: “Eman chon wöümong a wor chomong chiechian.” (SalF. 14:20) A ikkina usun napanapen aramas rese unusöch, ar repwe chiechi ngeni aramas fän iten pwisin feiöchür nge sap feiöchün chiechier kewe. Jises ese ina usun. Ese chök chiechi ngeni chokkewe mi pisekisek are iteföülo. Pwüngün pwe Jises a tongei emön sou nemenem mi pisekisek me a etiwa pwe epwe nöün chon käeö. Iwe nge, Jises a ereni ena mwän an epwe amömölo pisekin me liffang ngeni chon wöüngaw. (Mark 10:17-22; Luk 18:18, 23) Jises ese sillelo ren an chiechi ngeni ekkewe mi wöüöch me itefoulo, nge ren an chiechi ngeni aramas tekisosson me sochoul.​—Mt. 11:19.

4. Pwata sipwe tongeni erä pwe chiechien Jises kewe rese unusöch?

⁴ Enlet, chiechien Jises kewe rese unusöch. Fän ekkoch, ekiekin Piter ese tipeeü ngeni ekiekin Kot. (Mt. 16:21-23) Jemes me Jon ra ekis lamalam tekia atun ra tingorei Jises pwe repwe mot ünükün lon ewe Mwu. Ar tingor a asonga ekkewe ekkoch aposel, me ra äkkäninifengen ika iö leir a lapalap. Iwe nge, Jises a mosonottam le äwenechara ekiekin chiechian kewe me ese mwittir mängaweitiir.​—Mt. 20:20-28.

5, 6. (a) Pwata Jises a chüen chiechi ngeni lap ngeni nöün kewe aposel? (b) Pwata Jises ese chüen chiechi ngeni Jutas?

⁵ Sap minne Jises a chiechi ngeni ekkena mwän rese unusöch pokiten an ese äfänni are küna ar kewe apwangapwang. Iwe nge, a chök afota ekiekin woon öchün ekiekin letiper  me napanapöchür kewe. Äwewe chök, lupwen a tori Jises ewe sossot mi weires seni meinisin, Piter, Jemes, me Jon ra annut, nge rese älisi. Iwe, sia weweiti pwata Jises a lichippüng rer. Iwe nge, a küna pwe a öch ekiekin letiper, ina popun, a apasa: “Ewe ngün a mochen pwora, nge ewe fituk a apwangapwang.”​—Mt. 26:41.

⁶ Iwe nge, Jises ese chüen chiechi ngeni Jutas Iskariot. Inaamwo ika Jutas a tipin chiechi ngeni, nge Jises a esilla pwe Jutas a mut ngeni letipan an epwe ngawolo. Pokiten Jutas a chiechi ngeni fönüfan, a wiliti emön chon oput Kot. (Jem. 4:4) Ina minne, Jises a akkomw ereni Jutas pwe epwe lo seniir, iwe mwirin, a pwäratä an chiechi ngeni ekkewe 11 lusun aposel mi tuppwöl.​—Jon 13:21-35.

7, 8. Ifa usun Jises a pwäratä an tong ngeni chiechian kewe?

⁷ Jises ese afota ekiekin woon apwangapwangen chiechian kewe mi tuppwöl, nge a chök föri met epwe öchitiir. Äwewe chök, a iotek ngeni Seman we pwe epwe tümünüür lon ar kewe sossot. (Älleani Jon 17:11.) A ekieki osupwanger lon pekin aion. (Mark 6:30-32) Ese chök ereniir met i a ekieki, nge a pwal mochen rongorong me weweiti ekiekiir me meefier.​—Mt. 16:13-16; 17:24-26.

⁸ Jises a manau me mälo fän iten feiöchün chiechian kewe. A silei pwe epwe fangolo manauan me ren pwüngün allük pwe epwe pwönütä än Seman we pwüng. (Mt. 26:27, 28; Ipru 9:22, 28) Iwe nge, Jises a asoresini manauan pwe epwe pwäratä an tong. A apasa: “Esor an emon och tong epwe lap seni ei tong, pwe epwe fangelo manauan fan iten chienan.”​—Jon 15:13, TF.

Met ekkewe Chon Käeö Ra Föri Pokiten Jises A Chiechi ngeniir?

9, 10. Aramas ra fet ren kisäseün Jises?

⁹ Jises a kisäseü le fangolo an fansoun, tong, me pisek. Ina popun, aramas ra mochen chieneni me fang ngeni. (Luk 8:1-3) Seni minne a pwisin küna lon manauan, Jises a tongeni apasa: “Oupwe fangafangöch ngeni aramas, pun Kot epwe fangafangöch ngenikemi. Ewer, oupwe angei eu aükük mi unusöch, mi itelong o chachelong o säsewu, epwe urourela me le pöümi. Pun ewe chök aükük oua aea le aükük ngeni aramas, Kot epwe pwal aea ngenikemi.”​—Luk 6:38.

¹⁰ Pwüngün pwe ekkoch ra sotun chiechi ngeni Jises pokiten chök ekkewe feiöch repwe angei seni. Ekkena chiechi mi chofona ra likitalo Jises lupwen ra wewengaweiti alon. Rese lükülük woon Jises atun rese weweiti alon, nge ra mwittir ekiekmwääl me kul seni. Iwe nge, ekkewe aposel ra sokkolo pun ra tuppwöl. Fän chommong, ar chiechi ngeni Kraist a sossot, nge ra achocho le peni lon fansoun kinamwe me weires. (Jon 6:26, 56,  60, 66-68) Lon ewe säingoon pwinin manauan woon fönüfan, Jises a pwäratä an kilisou ngeni chiechian kewe, a ereniir: “Ämi oua etiei lon ai kewe riaföü meinisin.”​—Luk 22:28.

11, 12. Met Jises a alükülükü ngeni nöün kewe chon käeö, iwe, met ra föri pokiten ena?

¹¹ Ekiselo chök mwirin än Jises kilisou ngeniir ren ar tuppwöl, chokkana ra likitalo i. Ren ekis fansoun, ra mut ngeni ar niuokkusiti aramas an epwe akkufu ar tongei Kraist. Jises a pwal omuserelo. Mwirin an mälo me manausefäl, a pwä ngeniir me alükülükü ngeniir pwe iir chiechian. A pwal awisa ngeniir eü wis mi fokkun aüchea ar repwe föralo chon käeö seni “mwü meinisin” me repwe chon pwäratä usun “tori lon unusen fanüfan.” (Mt. 28:19; Fof. 1:8, TF) Iwe, pokiten föfförün kana, met ekkewe chon käeö ra föri?

¹² Iwe, ekkewe chon käeö ra achocho ükükün ar tufich le esilefeili pworausen ewe Mwu. Ren älillisin än Jiowa ngün mi fel, ra achöüfetälei ar afalafal lon Jerusalem. (Fof. 5:27-29) Sap mwo nge ar repwe tongeni mälo a erikiirelo seni ar älleasochisi än Jises allük ngeniir ar repwe föralo chon käeö. Fite ier mwirin ar angei än Jises we allük, ewe aposel Paul a tongeni makkeei pwe ewe kapas allim a fen esilefeil “ngeni aramas meinisin won fanüfan.” (Kol. 1:23) Ekkena chon käeö ra änneta pwe ra aücheani ar chiechiöch ngeni Jises!

13. Ifa usun nöün kewe chon käeö ra apwönüetä äitien Jises kewe lon pwisin manauer?

¹³ Chokkewe mi wiliti nöün kewe chon käeö ra apwönüetä äitien Jises kewe lon pwisin manauer. A wewe ngeni watteen ekkesiwil lon föfförür me napanaper. Ekkoch mineföön chon käeö, iir mi piin chon föri tipisin Sotom, chon lisowu mwääl, chon sakau, are chon solä. (1 Kor. 6:9-11) A lamot ekkoch repwe siwili ekiekiir usun chon ekis. (Fof. 10:25-28) Iwe nge, ra chüen chök älleasochisi Jises. Ra likitalo napanaper kewe me loom me pwilitalong ewe napanap mi fö. (Ef. 4:20-24) Ra sileelo “ekiekin Kraist,” weween, ra weweiti me eörenalo ar repwe äkkäppirü napanapen ekiekin me föfförün Jises.​—1 Kor. 2:16.

Ach Chiechi ngeni Kraist Ikenäi

14. Met Jises a pwon pwe epwe föri lon ewe “fansoun sopolan”?

¹⁴ Chommong ekkewe popun Chon Kraist ra fen silei Jises are küna i mwirin an we a manausefäl. Nge ese nom rech ena feiöch. Epwe ifa usun sipwe tongeni wiliti chiechien Kraist? Sipwe tongeni älleasochisi emmwenien ewe chon angang mi tuppwöl me tipatchem, weween, pwiin Jises kewe mi kepit ra chüen manau woon fönüfan. Jises a pwon pwe lon ewe “fansoun sopolan,” epwe seikatä nöün we chon angang woon “pisekin meinisin.” (Mt. 24:3, 45-47, TF) Ikenäi, lap ngeni chokkewe mi mochen chiechi ngeni Kraist rese kapachelong lon ena ‘chon angang.’ Ifa usun epwe kküü ar chiechi ngeni Kraist minne ra föri ngeni ewe emmwen seni ena chon angang mi tuppwöl?

15. Än emön wiliti emön siip are siike epwe alongolong woon met?

¹⁵ Älleani Mattu 25:31-40. Jises a kör ngeniir pwiin ekkewe mi kapachelong lon ena mwichen aramas mi iteni nöün we chon angang. Lon ewe kapas monomon usun an epwe äimufeseni siip me siike, Jises a affata pwe minne sia föri ngeni pwiin kewe a usun itä nge sia föri ngeni pwisin i. A pwal mwo nge affata pwe än emön iteni siip are siike  epwe alongolong woon an föfför ngeni emön me lein pwiin kewe mi “kisifochofoch.” Ina minne, chokkewe mi äpilükülükü manau esemuch woon fönüfan repwe pwäratä ar mochen chiechi ngeni Kraist ren ar äkkälisi ewe chon angang mi tuppwöl me tipatchem.

16, 17. Ifa usun sipwe tongeni pwäratä ach chiechi ngeni pwiin Jises kewe?

¹⁶ Ika ka äpilükülükü om kopwe manau woon fönüfan fän än Kot we Mwu, ifa usun kopwe tongeni pwäratä om chiechi ngeni pwiin Jises kewe? Sipwe chök apasa ülüngät mettoch kopwe tongeni föri. Äeüin, kopwe fiffiti ewe angangen afalafal ren unusen letipom. Kraist a allükü ngeni pwiin kewe ar repwe afalafala ewe kapas allim woon unusen fönüfan. (Mt. 24:14) Iwe nge, epwe weires ngeni lusun pwiin Jises kewe woon fönüfan ikenäi ar repwe apwönüetä wiser na ika ekkewe ekkoch siip rese äkkälisiir. Iteiten fansoun ekkewe ekkoch siip ra afalafal, ra älisi pwiin Jises kewe ar repwe apwönüetä wiser mi fel. Kraist me nöün chon angang mi tuppwöl me tipatchem ra wesewesen kilisou ren ach chiechi ngeniir le föri ena angang.

¹⁷ Oruuan, ekkewe ekkoch siip ra tongeni älisi pwiin Jises kewe ren ar awora monien älillis pwe epwe feffeitä ewe angangen afalafal. Jises a pesei nöün kewe chon äppirü ar repwe äeä wöün fönüfan “ese pwüng” pwe epwe wor chiechier. (Luk 16:9, TF) Sap minne sipwe tongeni mööni ach chiechi ngeni Jises are Jiowa. Iwe nge, ren ach äeä pisekich le äfeffeitääi angangen ewe Mwu, sia ännetatä ach chiechiöch me tong, sap chök lon kapas, pwe pwal “lon ach föför mi let.” (1 Jon 3:16-18) Sia föri ena atun sia akkafalafal, awora monien älillis fän iten kaütään me tümünün ach kewe leenien mwich me ewe angangen afalafal woon unusen fönüfan. Jiowa me Jises ra aücheani ach pwapwaiti liffang, ese lifilifil ika a watte are kükkün ewe moni sia fangolo.​—2 Kor. 9:7.

18. Pwata sipwe älleasochisi ewe kapasen emmwen seni Paipel mi kawor me ren ekkewe elterin mwichefel?

¹⁸ Aülüngätin, sipwe änneta pwe kich chiechien Kraist ren ach älleasochisi än ekkewe elterin mwichefel emmwen. Ra kefilitä me ren ngün mi fel fän än Kraist emmwen. (Ef. 5:23) Ewe aposel Paul a makkeei: “Oupwe aleasochisi nöümi kewe souemwen o föri mine ra allük ngenikemi.” (Ipru 13:17) Fän ekkoch, esap mecheres ach sipwe älleasochisi ekkewe emmwen seni Paipel mi kawor me ren ekkewe elter. Ach silei pwe rese unusöch epwe tongeni ämwääli ach ekiek usun ar fön. Iwe nge, Kraist, Möküren ewe mwichefel, a pwapwa le nöünöü ekkena mwän rese unusöch. Ina minne, föfförüch ngeni ar emmwen epwe kküü ach chiechi ngeni Kraist. Sia ännetatä ach tongei Kraist ren ach sisap afota mwäällin ekkewe elter, nge sipwe pwapwa le älleasochisi ar emmwen.

 Sipwe Tongeni Küna Chiechiöch me Ikena Ie

19, 20. Met sipwe tongeni küna lon ewe mwichefel, iwe, met sipwap käeö lon ewe lesen mwirin ei?

¹⁹ A chök afaün än Jises tümünükich ren nöüch kewe elter me pwal ren an awora inach, pwiich, mwongeach, me fefinach lon ewe mwichefel. (Älleani Mark 10:29, 30.) Lupwen ka kerän poputä le chiechi ngeni än Jiowa we mwicheich, met märärum kewe ra föri? Amwo ra pwapwa ren om achocho le arap ngeni Kot me Kraist. Nge Jises a öüröüra pwe fän ekkoch, “chon le imwen emon mwan repwe chon oput i.” (Mt. 10:36) A fokkun aururukich pwe sipwe tongeni küna chiechiach kewe lon ewe mwichefel mi pach ngenikich lap seni wesewesen pwiich!​—SalF. 18:24.

²⁰ Ren än Paul kewe kapongen le sopwoloon lon nöün we taropwe ngeni ewe mwichefel lon Rom, sia silei pwe a wor chommong chiechian kewe mi ächengicheng. (Rom 16:8-16) Ewe aposel Jon a asopwalo nöün we aülüchöön taropwe ren ekkeei kapas: “Kopwe kapong ngeni chienach kena, emon me emon.” (3 Jon 15, TF) A ffat pwe a pwal wor chommong chiechian kewe. Epwe ifa usun sipwe äkkäppirü Jises me ekkewe popun chon käeö ren ach ämääraatä me tümünü ach chiechi ngeni pwiich kewe chon lükü lon ewe mwichefel? Ewe lesen mwirin ei epwe pölüweni ei kapas eis.

Ifa Pölüwen Ekkeei Kapas Eis?

• Ifa usun Jises a isetiw eü leenien äppirü usun chiechi mi mürinnö?

• Pokiten än Jises chiechi ngeniir, met nöün kewe chon käeö ra föri?

• Ifa usun sipwe ännetatä pwe kich chiechien Kraist?

[Ekkewe Kapas Eis fan Iten ewe Lesen]

[Sasing lon pekin taropwe 23]

Jises a äfänni ekiekin me meefien chiechian kewe

[Sasing lon pekin taropwe 25]

Ifa usun sipwe pwäratä pwe sia mochen wiliti chiechien Kraist?