“EKKEWE watte ra tipatchem, nge ekkewe semirit a pwal pwisin wor ar tipatchem,” iei alon eü mwitün lon Nigeria. Edwin, emön elter lon ena fönü a küna pwüngün ei pworaus.

Eü rän, Edwin a küna eü pwoor mi fför seni mechä fän an we chepel lon imwan.

Edwin a eisini nöün kewe ülümön semirit, “Än iö ei pwoor?”

“Ai,” alon Emmanuel, ewe a ier walu. A pwal sopwelo le apasa pwe ena kükkün pwoor mi paarang a wor pwang asan, a fför fän iten leenien an asor ren ewe angangen afalafal woon unusen fönüfan, än Chon Pwäratä Jiowa. A äweweei, “Pokiten use kan lo Kingdom Hall iteiten rän, ua ekiekin föri ei pwoor pwe upwe tongeni walong nei moni ika use möön ngeni anei.”

Semen Emmanuel we a pwisin wor an pwoor a kan isoni moni lon pwe repwe tongeni fiti mwichelap. Nge lupwen a fis osukosuk mi weiweitä lon ar famili, iwe ra nöünalo ewe moni mi iseis lon ewe pwoor. Emmanuel a angei eü tin me walo ren emön chon iosechu pwe epwe föri an esap tongeni suuk pwe ewe moni a isoni lon epwe chök fän iten ewe angangen afalafal. Lupwen ewe chon iosechu a silei popun an walo ren ewe tin, iwe a föri eü än Emmanuel pwoor mi fför seni mechä. Pwiin Emmanuel we, Michael nimu ierin, a pwal tingor eü an.

Edwin a mäirü ren met nöün kewe ra föri me a eisiniir ika pwata ra föri ekkewe pwoor. Michael a erä: “Ua mochen iselong ai asor lon!”

Semer me iner kewe rese silei pwe Emmanuel, Michael, me Uchei, fefiner we tiu ierin, ra kan ikkisoni lon ar kewe pworun asor ekkoch itä möön aner möngöön leolowas lon sukul. Ra käeö me ia ena ekiek? Seni le kükkünür, semer me iner kewe ra fen äiti ngeniir ar repwe walong ar asor lon ewe pworun asor lon ewe Kingdom Hall. Mei pwüng, pwe ekkewe semirit ra apwönüetä met ra käeö.

Lupwen a ur ar kewe pwoor, ra ngerei pwe epwe suuk. Ükükün masouan $3.13, a watte ena ükükün moni pun lon Nigeria peioffur lon unusen eü ier a chök orun $300. Ena sokkun monien asor a älisatä än Chon Pwäratä Jiowa angangen afalafal a fiffis lon 235 fönü woon unusen fönüfan.