IKA ka tuppwöl ngeni Kot, epwe awöüöchük? Eli, nge neman esap ren wöün pisek. Ekieki mwo usun pworausen Meri, inen Jises we. Ewe chonläng Kapriel a pwä ngeni me ereni pwe i emön mi ‘fokkun feiöch’ me ren Kot pwe epwe pwopwo o nöünatiw Nöün Kot we. (Luk 1:28, 30-32) Nge Meri ese pisekisek pun lupwen a eäni asor mwirin än Jises uputiw, a chök uwato “ruoman lisom are ruoman apansüsün lisom,” pwe ina ewe eöreni fän iten ekkewe mi osupwang lupwen repwe asor ngeni Jiowa.​—Luk 2:24; Lifitikos 12:8.

Nge weween pwe Kot ese efeiöchü Meri pokiten an wöüngaw? Aapwi, pun lupwen a feilo chuuri Elisapet aramasan we, “Elisapet a ur ren Ngünmifel o a apasa fän leüömong, ‘Ka fokun feiöch me lein fefin meinisin, a pwal feiöch ewe mönükol kopwe nöünätiu.’” (Luk 1:41, 42) Meri a fokkun feiöch pun a wiliti inelapen Nöün Kot we mi ächengicheng.

Jises pwisin esap emön mi pisekisek. Ese chök uputiw lon eü famili mi osupwang me määritä lon eü leeni mi wöüngaw, nge unusen manauan woon fönüfan a wöüngaw. Iei alon Jises ngeni emön mwän a mochen epwe emön nöün chon käeö: “Ekewe foks a wor pwanger, ekewe machang a wor faser, nge Nöün Aramas esap wor eu leni ia epwe konola ie o asösö.” (Luk 9:57, 58) Iwe nge, än Jises feito fönüfan a atufichi ekkewe chon käeö ar repwe eäni eü wöü mi lap. Ewe aposel Paul a makkeei: “A wöüngauela fän itemi, pwe ämi oupwe pisekisekila ren an wöüngau.” (2 Korint 8:9) Met sokkun wöü Jises a ngeni nöün kewe chon käeö? Nge ifa ussun ikenäi, met sokkun wöü a nom rech?

Met Sokkun Wöü?

Wöün pisek ina ewe minen eppet ngeni ach lükü pokiten emön mi pisekisek epwe eäni lükülük woon nöün moni lap seni Kot. Iei alon Jises: “A men fokun weires ngeni ekewe aramas mi pisekisek ar repwe tolong lon Mwün Kot.” (Mark 10:23) A enlet pwe ewe wöü Jises a awora ngeni nöün kewe chon käeö ese weneiti wöün pisek are moni.

Ren enletin, lap ngeni chon Kraist lon fansoun ekkewe aposel iir mi wöüngaw. Lupwen emön mwän mi pechemä seni uputiwan a tingorei Piter nöün moni, iei met Piter a apasa: “Esap wor moni rei, nge mine a wor rei üpwe ngonuk: Fän iten Jesus Kraist seni Nasaret üpwe ürenuk kopwe ütä o fetal!”​—Fofor 3:6.

Ewe chon käeö Jemes a pwal apasa pwe lap ngeni chon lon ewe mwichefelin chon Kraist, iir mi osupwang. A makkeei: “Ämi pwii kana mi achengicheng, oupwe aüseling! Ifa usun, Kot esap filätä ekewe aramas mi wöüngau won ei fanüfan pwe repwe pisekisek lon ar lükülük o feiöchüni feiöchün ewe Mwün Kot, i a pwon ngeni chokewe mi echeni?” (Jemes 2:5) Pwal och, ewe aposel Paul a apasa pwe esap chommong me leir “mi tipachem” are “pochokun” are “aramas tekia” nge ra wiliti chon ewe mwichefelin chon Kraist.​—1 Korint 1:26, Ewe Kapasen God.

Ika pwe ewe wöü Jises a ngeni nöün kewe chon käeö esap wöün pisek, iwe epwe met sokkun chök ewe wöü a ngeniir? Lon nöün Jises we taropwe ngeni ewe mwichefelin Smirna a erä: “Üä silei om kewe riaföü. Üa silei pwe ka wöungau, nge ka wesewesen pisekisek.” (Pwarata 2:8, 9) Ekkewe chon Kraist lon Smirna ra osupwang nge ra wöüöch ren eü mettoch mi kon aüchea lap seni kolt me  silfer. Ra wöüöch pokiten ar lükü me tuppwöl ngeni Kot. Mi aüchea ena lükü “pun sap aramas meinisin ra lükü ewe kapas.” (2 Tesalonika 3:2) Chokkewe rese eäni lükü ra wesewesen wöüngaw mwen mesen Kot.​—Pwarata 3:17, 18.

Wöü mi Pop Seni Lükü

Ikkefa ekkewe feiöch chokkewe mi eäni lükü repwe küna? Chokkewe mi lükü Kot ra feiöch seni “an kirikiröch mi fokun lapalap, an songomang me tongotam.” (Rom 2:4) Ra pwal pwapwa pun ‘ar kewe tipis ra musala’ ren ar lükü än Jises we möön kepich. (Efisus 1:7) Pwal och, ra pwal eäni ewe sokkun tipatchem seni “än Kraist kapas” mi fang ngeni chokkewe mi eäni lükü. (Kolose 3:16) Lupwen ra iotek ngeni Kot ren lükü “an Kot we kinamwe, ewe mi somelo seni ach ekiek meinisin” epwe tümünü ekiekiir me letiper, me atoto ngeniir menemenöch me pwapwa.​—Filipai 4:7, TF.

Me lukun ekkena feiöch, chokkewe mi eäni lükülük woon Kot ren nöün we Jises Kraist repwe eäni ewe äpilükülükün manau esemuch mi amwarar. Sia silefichi alon Jises Kraist keei: “Pun iei usun Kot a echeni chon fanüfan, pwe a fangala Nöün Aleman, pwe meinisin mi lükü i resap pöütmwälila, pwe repwe eäni manau esemüch.” (Jon 3:16) Ena äpilükülük mi aüchea epwe pöchökkülelo lupwen emön epwe akkangei ewe sile ussun ewe Sam me nöün we, pun iei met Jises a pwal erä: “Iei manau esemüch: Ar repwe silei en, ewe eman chök Kot mi let, repwe pwal silei Jesus Kraist, ewe ka tinato.”​—Jon 17:3.

Pwüngün pwe än Kot efeiöchükich a weneiti ach riri ngeni, iwe nge, sia pwal feiöch lon pekin memmeef me aion. Äwewe chök, sipwe nengeni pworausen Dalidio seni Brazil. Me mwen an silei ewe enlet usun än Kot kokkot, i emön mi sou sakau. Ena mettoch a ataielo ewe riri lefiler me an famili. Pwal eü, ese lükülüköch lon an angangen moni.  Nge mwirin a poputä le käeö Paipel ren Chon Pwäratä Jiowa, a küna watteen siwil mi amwarar lon manauan.

Met Dalidio a käeö seni Paipel a amwökütü i le pöütalo an kewe föfför mi efeiengaw. A fokkun feffeitä lon an apwönüetä alon Paipel, me iei met a apasa: “Ua eöreni le feffeilo ngeni eü me eü ekkewe leenien ün sakau, nge iei ua kan feffeilo imw me imw.” A wiliti emön pioneer mi awora watteen an fansoun le afalafala än Kot kapas. Ena sokkun siwil ese chök apöchökkulalo inisin nge a pwal amürinnölo an angangen moni. Pwal iei alon: “Ewe moni ua kan möön ngeni ünümei sakau me loom, iei ua nöünöü fän iten ai upwe älisi ekkewe ekkoch are fän iten piseki mi lamot ngeniei.” Ren an chiechi ngeni chokkewe mi eäni än Kot ekiek, a achommongaalo chiechian kewe mi mürinnö. Iei Dalidio a kerän meefi alolloolun kinamween an ekiek me menemenöch lon manauan.

Pwal iei pworausen Renato, emön mi küna feiöch lon manauan ren an ämääraatä an lükülük woon Jiowa Kot. Lupwen sipwe küna wopwapwaan woon mesan, mi weires ach sipwe lükü pwe a fis eü mettoch ese fokkun pwüng lon manauan. Lupwen a kerän uputiw, inan we a pöütalo. A walong lon eü pwotou fän efoch sea, inisin a totomurar me nunupuchon, me a chüen pachetä puan we. Rüüemön fefin ra feito ünükün ewe sea ra küna ewe pwotou mi mwökütüküt. Akkomw ra ekieki pwe emön a likitalo nöün kättu lon ena pwotou. Nge lupwen ra küna pwe emön ät mi kerän uputiw, ra mwittir uwealo ngeni ewe pioing mi kkan ngeniir pwe epwe säfei.

Emön me lein ekkewe fefin i Chon Pwäratä Jiowa, a ereni Rita pwal emön Chon Pwäratä pworausen ena mönükol. A wor emön chök nöün Rita nengngin pun meinisin nöün kewe ra chök mä me lon lukan mwen esaamwo nöüniiretiw, ina popun a mmen mochen epwe wor emön nöün ät. Iwe a filatä pwe epwele mwuti Renato.

Rita a fen ereni Renato me le kükkünün pwe i esap wesewesen inan, nge a fokkun tümünü me tongei me äiti ngeni än Paipel kapasen emmwen. Nge lupwen a wattetä, a poputä le pwapwaiti ewe Paipel. A pwal wattelo an kilisou ren amwararen an küna manau. A ssür mesan iteiten an älleani alon ewe sou köl Tafit ei: “Inamwo ika semei me inei ra likitieila, nge ewe Samol mi Lapalap epwe tümwünuei.”​—Kölfel 27:10.

Ren än Renato pwäratä an kilisou ren meinisin met Jiowa a fen föri fän itan, a papataiselo lon 2002 me mwirin eü ier a wiliti emön pioneer mi awora watteen an fansoun le afalafal. Tori iei ese mwo silei iö wesewesen seman me inan me neman esap fen tongeni silei. Iwe nge, Renato a meefi pwe eü me lein ekkewe liffang mi aüchea a fen angei, ina an silei me eäni lükülük woon Jiowa, Seman we mi wesewesen tongei me tüttümünü.

Neman ka pwal mochen kopwe arap me ririöch ngeni Kot, ena mettoch a tongeni amürinnölo manauom. Ena sokkun pacheöch ngeni Kot me Nöün we, Jises Kraist a suuk ngeni meinisin mi wöüöch me mi wöüngaw. Eli esap tongeni wato wöün pisek nge epwe atoto eü kinamwe mi alollool me menemenöch, ewe esap mö ren moni meinisin woon ei fönüfan. A mmen pwüng ekkeei kapas lon Än Salomon Fos 10:22: “Feiöch seni ewe Samol mi Lapalap a awöüükich, nge i esap apacha och riaföü ngeni.”

Jiowa Kot a fokkun pwapwaiti ekkewe aramas mi mochen arap ngeni, iei alon: “Amwo kopwe aüselinga ai kewe allük! Mürin om kinamwe epwe wewe ngeni eu chanpupu, nge om pwüng epwe wewe ngeni nomongun lematau.” (Aisea 48:18) Me a pwon ngeni ekkewe mi arap ngeni I ren eü ekiek me letip mi pwüng pwe repwe fokkun feiöch: “Wöü me iteüöch me manauatam, iei ewe liwin fän iten eman mi tipetekison o niuokusiti ewe Samol mi Lapalap.”​—Än Salomon Fos 22:4.

[Sasing lon pekin taropwe 5]

Inaamwo ika än Jises famili woon fönüfan a wöüngaw nge Jiowa a efeiöchüür