FÄN fitu ka kan ooruk lon kilas? Lap ngenikich meinisin sia kan föri ena fän fitu iteiten rän. Pwata? Pun sia ekieki napanapen inisich.

Sia tongeni apöpöfengeni ach äkkälleani ewe Paipel me ach oorikich lon kilas. (Jemes 1:23-25) Manamanen ewe pworaus lon än Kot we Kapas a tongeni älisikich le weweiti wesewesen napanapach. “A tililong lon manauach o aimwüfeseni letipach me ngünüch.” (Ipru 4:12) Weween, a äimufeseni napanapach mi pwä me lükün seni wesewesen napanapach me lon. A äiti ngenikich met a lamot sipwe siwili, usun chök met ewe kilas a äiti ngenikich.

Ewe Paipel ese chök pwäri met sokkun siwil mi lamot sipwe föri, nge a pwal älisikich le angang woon. Ewe aposel Paul a makkeei: “Iwe, kapasen lon ekewe Toropwe mi Pin meinisin ra pop seni Ngünün Kot, ra aüchea fän iten afalafala ewe kapas mi let, ra amiritikich, ra apwüngükich o aiti ngenikich usun ach sipwe manau fän pwüng.” (2 Timoti 3:16, 17) Nengeni, ekkeei wokisin ra menlapei rüanü feiöch. Iwe, ülüngät me leir ra affata lamoten ach sipwe siwili ach ekiek me föfför, pun a erä pwe Paipel a fönökich, apwüngükich, me emiritikich fän pwüng. Ika pwe a lamot ach okoorikich lon kilas pwe sipwe nengeniöchü napanapen inisich, iwe, epwe fen ina me lapoloon aücheaan ach äkkälleani ewe Paipel iteitan!

Lupwen Josua a kefilitä pwe epwe emmweni mwuun Israel, Jiowa Kot a ereni: “Kosap ükütiu le apworausa masouen ei puken allük, kopwe ekieki usun lerän me lepwin, pwe kopwe tümwünüöchü om kopwe apwönüetä meinisin mine a mak lon. Mürin kopwe feiöch o fefeitä lon meinisin mine kopwe föri.” (Josua 1:8) Ewer, ren än Josua epwe sopwöch lon an emmweni Israel, a lamot epwe wor an kokkotun älleani än Kot we Kapas “lerän me lepwin.”

Ewe äechöön kölfel a menlapei feiöchün ach äkkälleani Paipel iteitan, ren an apasa: “Ra feiöch ekkewe aramas resap fetan fän öüröüren aramasangau, resap appirü föförün ekkewe chon tipis, resap pwal nom ren ekkewe chon turunufas, nge ra pwapwaiti än ewe Samol mi lapalap alluk o ekieki usun lerän me lepwin. Ätekewe ra wewe ngeni irä mi mär ünükün ekkewe chanpupu, ra uwa lon fansoun räs, nge chör resap aiolol. Meinisin minne ra föri a fisiöch.” (Kölfel 1:1-3) Sipwe pwal fokkun ina usun.

 Chommong aramas ra eöreni le älleani Paipel iteiten rän. Lupwen aramas ra eisini emön Chon Kraist ika pwata a kan äkkälleani Paipel iteiten rän, iei alon: “Ika ua kan ikkiotek ngeni Kot iteitan me mochen epwe aüselingaei, itä pwata usap pwal aüseling ngeni ren ai äkkälleani an we Kapas iteiten rän? Ika sia mochen emön epwe chiechiöch ngenikich, iwe, sipwe pwal aüseling ngeni meefian.” A pwüng alon na. Ach älleani ewe Paipel usun itä nge sia kan aüseling ngeni Kot pun sia käeö an ekiek.

Akkotaöchü Om Älleaan Paipel

Eli ka fen poputääni om kokkot le älleani ewe Paipel. Ka fen älleani unusan? A fokkun mürinnö ei sokkun kokkot pwe sipwe tongeni sileöchü masouan. Ekkoch ra sotun poputä fän chommong, nge rese äwesalo. Ka pwal ina usun? Ifa usun ka tongeni älleani unusen ewe Paipel? Pwata kese sotuni ekkeei ruu mettoch?

Akkota om kokkotun älleaan Paipel iteitan. Filatä kulokun om äkkälleani Paipel iteiten rän. Ika ese tongeni fis lon ena kulok, filatä pwal eü fansoun ren siwilin pwe kosap etiwalo fän eü. Epwe ina usun om kopwe äppirü chon Perea loom. Iei alon Paipel usur: “Ra fakkun etiwa ewe kapas ren pwichikaren letiper, o ra kukuttafichi ran me ran seni lon Paipel, are ekkeei mettoch mi iei usun.”​—Fofor 17:11, TF.

Filatä met kopwe achocho ngeni. Äwewe chök, ika kopwe älleani ülüngät ngeni nimu sopwun iteiten rän, ka tongeni älleani unusen ewe Paipel lon eü chök ier. Pwata kese achocho le sotuni ei sokkun kokkot?

Ika ka fen älleani unusen ewe Paipel, kosap ükütiw, kopwe chök sopwelo. Ka tongeni älleani unusan iteiten ier, iwe mwirin, neman kopwe tongeni poputä seni pwal eü kinikin. Ika ka mochen ammanga om ällea, kopwe tongeni älleani eü ika ruu sopwun iteiten rän.

Iteiten fansoun kopwe älleani Paipel, eli kopwe kerän tepereni ekkoch pworaus mi weneiti manauom. Napanapen ei otot me nonnomuch ra chök sissiwil. Kopwe tipeppos le ooruk iteitan lon än Kot we Kapas, ewe Paipel. Epwe ina usun om mut ngeni Kot an epwe fos ngonuk iteiten rän.​—Kölfel 16:8.

[Sasing lón pekin taropwe 32]

Ka tongeni akkota kulokun om älleaan Paipel iteiten rän?