Älillisfengen lon Famili A Älisatä Ar Angang ngeni Kot

A MMEN lamot än ewe famili älillisfengen pwe epwe pöchökkületä ar tong me ririöch ngeni Kot. Lupwen Jiowa a föratä ewe äeüin pean pwüpwülü, a menlapei lamoten ewe mettoch älillisfengen. Wisen If pwe epwe ‘eman alisien’ Atam. (Ken. 2:18) Ewe kokkotun pwüpwülü, ina eü riri lefilen mwän me fefin mi akkangangfengen. (SalAf. 4:9-12) Ren än chon ewe famili repwe apwönüetä wiser kewe me ren Jiowa, a lamot ar repwe pwal älillisfengen.

Än Ewe Famili Fel Ngeni Jiowa

Barry me Heidi a wor nimmön nöür. Ra küna pwe ar achocho le käeöfengen ewe Paipel iteitan a älisiir ar repwe feffeitä. Barry a apasa: “Lon äm famili käeö, ua kan ngeni nöüm kewe wiser. Ua ewiser ar repwe ammolnatä meefier seni ekkewe Awake! Aua pwal praktisfengen fän iten ewe angangen afalafal pwe repwe silei met repwe apasa.” Heidi a pwal apasa: “Emön me emön leim a kan makketiw met epwe achocho ngeni, iwe, fän ekkoch atun äm famili käeö, aua cheki ifa usun äm feffeitä.” Ekkeei pwüpwülü ra küna pwe ar akkota ekkoch pwinin ar resap katol TV a älisi unusen ewe famili an epwe wor fansoun ar ällea.

Än ewe Mwichefel kewe Mwich

Mike me Denise mi wor fömön nöür. Ifa usun ar famili a küna feiöch seni ar angangfengen? Mike a apasa: “Aua akkota pwe aupwe mwittir ngeni mwich, nge fän ekkoch ese pwönütä, nge äm älillisfengen a älisikem le warekkäi ngeni mwich.” Denise a erä: “Lupwen nöüm kewe ra mämmääritä, a kan wor en me wisan. Nöüm we nengngin itan Kim a kan wisen kuk me ammolnatä ewe chepelin möngö.” Nöür we ät Michael a chechchemeni: “Pwinin Oruu a wor äm mwich lon imwem we. Ina popun aua limeti ikewe aupwe mwich ie me ätetteli ekkewe sea.” Pwal emön nöür itan Matthew a apasa: “Lon ekkewe pwinin epwe wor äm mwich, Papa a kan mwittiriti leimw särin an angang pwe epwe älisikem le molnetä le lo mwich.” Met mwiriloon ar achocho?

Achocho A Fokkun Uwaöch

Mike a apasa: “Lon 1987, äm me Denise aua poputä le pioneer. Lon ena atun, nöüm kewe ülümön ra chüen nonnom rem. Rüüemön me leir ra pwal wiliti pioneer me ekkewe ekkoch ra fiti ewe angangen kaü imw lon Bethel. Pwal och, aua pwapwa pun äm famili a fen älisi 40 aramas ar repwe fangolo manauer ngeni Kot me papatais. Aua pwal feiöch pun unusen äm famili aua älillis lon kaütään ekkoch leenien mwich, pwal mwo nge lon ekkoch fönü.”

Pwüngün, än famili älillisfengen a fokkun uwaöch. Mei pwal wor ekkoch mettoch ka tongeni föri pwe oupwe älillisfengen me chon om famili? Kopwe lükülük pwe ämi angangfengen epwe älisatä än om famili angang ngeni Kot.

[Sasing lon pekin taropwe 10]

Praktisfengen a älisi feffeitään ewe famili lon ewe angangen afalafal