A Sókkóló Aúchean Paipel Seni Ekkóch Puk?

‘Kapasen lon ekewe Toropwe mi Pin meinisin ra pop seni än Kot we manaman mi fel, ra aüchea . . . pwe ewe aramas mi angang ngeni Kot epwe fokun tufich o lipwäköch ngeni sokun angang mürina meinisin.’​—2 TIMOTY 3:16, 17.

ESAP aramas meinisin ra tipeeú ngeni ena wokisin. Nge en, met meefiom? Menni lein ekkeei ekiek fan usun ewe Paipel ka pwal eáni?

• Eú puk mi amwarar masouan, makkan me ekkewe kapas lón

• Eú me lein ekkewe pukepin mi lamot

• Eú puken tutulap mi masou ren ekkewe lesen fán itach

• Án Kot we Kapas

Pwal eú kapas eis: Mi fen lamot met ka lúkú? Nengeni met ewe Paipel a apasa: “Meinisin mine a mak lon ekewe Toropwe mi Pin a mak fän iten ach sipwe kaiö seni, pwe epwe wor ach apilükülüköch ren ach likitü pwal ren ach küna pöchökülen letipach mi torikich seni ekewe Toropwe mi Pin.” (Rom 15:4) Iwe, me ren ei wokisin, ewe Paipel a mak fán iten an epwe apéchékkúla letipach me ngenikich ápilúkúlúkéch.

Iwe nge, ika ewe Paipel eú chék puk mi amwarar makkeien aramas are eú chék me lein ekkewe puken lamalam mi pin, kopwe lúkúlúk wóón an epwe asukulók me emmweni om famili ákkáeúin ika áitian a sókkóló seni minne ka fen ekieki pwe mi pwúng? Ika ewe Paipel puken tutulap chék, an kewe pwon ra tongeni apéchékkúla letipom me ngonuk ápilúkúlúkéch?

Nge, chómmóng mi fen káé ewe Paipel ra lúkú pwe ina Án Kot we Kapas mi kkóló aúchean. Met popun? Met a asókkaló ewe Paipel seni ekkewe ekkóch puk? Lón ekkewe pwóróus mwirin ei, sipwe ppii nimu mettóch mi áweweei ifa usun ewe Paipel a sókkóló seni ekkóch puk.