Mut Ngeni Jiowa An Epwe Emmwenuk Ngeni ewe Ngaseló mi Enlet

“Nenelong lon ewe allük mi unusöch, ewe a angasakich.”​—JAS. 1:25.

KA TONGENI ÁWEWEEI?

Menni ewe allúk mi emmwen ngeni ewe ngaseló mi enlet, me ié kewe repwe kúna feiéch seni ena allúk?

Met a lamot sipwe féri pwe sipwe wesewesen ngaseló?

Menni ngaseló chókkewe mi ákkálleasochisi Jiowa repwe angei?

1, 2. (a) Ren minne a fiffis wóón fénúfan iei, met aramas ra meefi? Pwata? (b) Néún Jiowa kewe chón angang ra ápilúkúlúkú menni ngaseló?

 SIA nonnom lón ei fansoun a lallapoló tipemmong, féfférún akkachofesá me súfélúngaw ngeni allúk. (2 Tim. 3:1-5) Pokiten ena, ekkewe mwú ra achómmóngaaló allúk me apéchékkúla angangen polis me néúnéú camera le nennengeni mwékútúkútún aramas. Lón ekkóch fénú, aramas ra néúnéú alarm lón imwer, ákkáfiteféú lokun imwer pwal mwo nge áeá tittin imw mi fiifi ren ar repwe túmúnú pwisin iir. Chómmóng aramas ra meefi núkúnúkúngaw ina popun rese mochen towu lepwin are mut ngeni néúr kewe ar repwe kukkunou lúkún nge iir chék. A ffat pwe aramas ra meefi pwe usun itá ra kan fétek me epwe fen wekkeiresiló ar repwe meefi ngaseló.

² Lón ewe málámálen Eten, Satan a erá pwe aramas repwe chék enletin ngaseló ika repwe imuló seni Jiowa. Nge minne a fis mwirin a ánneta pwe ina eú wesewesen kapas chofona. Lapolóón án aramas féri pwisin mocheniir me tunaló alón Kot, pwal ina lapolóón ar riáfféú. Pokiten ena, néún Jiowa kewe aramas ra pwal riáfféú. Iwe nge, sia ápilúkúlúkú ewe fansoun sipwe ngaseló seni fétekin tipis me minne mi limengaw, me angei minne ewe Paipel a erá án néún Kot kewe “ngas mi ling.” (Rom 8:21, TF) Pwal mwo iei Jiowa a akkammolnatá néún kewe chón angang ar repwe angei ena ngaseló. Ifa usun a féri ena?

3. Ifa ewe allúk Jiowa a ngeni néún kewe chón angang? Ikkefa ekkewe kapas eis sipwe káé usun?

³ Pélúwen ena kapas eis a nom lón alón ewe sou makken Paipel James, a apasa pwe “ewe allük mi unusöch, ewe a angasakich.” (Álleani James 1:25.) Nge lón ekkóch afféún Paipel ra néúnéú ekkeei itiitin kapas, “ewe allúk mi angasakich” me ren The New English Bible,  me “alluk mi unusoch, ewe allukun ngaselo,” me ren Testament Mi Fö Pwal Kol Fel. Pwúngún lupwen aramas ra rongorong ewe kapas allúk ra ekieki pwe ina och minen eppeti aramas, nge esap fen angasereló. Iwe, met weween “ewe allük mi unusöch, ewe a angasakich”? Ifa usun ena allúk epwe angasakich?

EWE ALLÚK MI ANGASAKICHELÓ

4. Menni “ewe allük mi unusöch, ewe a angasakich”? Ié kewe repwe kúna feiéch seni?

⁴ “Ewe allük mi unusöch, ewe a angasakich,” esap ina ewe Allúkún Moses. Jiowa a awora ewe Allúkún Moses ngeni Israel pwe epwe áiti ngeniir pwe iir chón tipis me ena Allúk a pwénútá ren Kraist. (Mat. 5:17; Kal. 3:19) Iwe, menni chék ewe allúk James a fós usun? A fós usun “än Kraist allük.” (Kal. 6:2.) Ina minne ewe “allük mi unusöch” a weneiti mettóch meinisin Jiowa Kot a mochen sipwe féri. Ekkewe Chón Kraist mi kepit me ekkewe ‘ekoch sip’ ra kúna feiéch seni.​—Joh. 10:16.

5. Pwata ese weires ach sipwe álleasochisi ewe allúkún ngaseló?

⁵ “Ewe allük mi unusöch” a sókko seni allúkún mwúún aramas. Pun ekkewe allúk lón ra ffat me a mak lón ekkewe kapasen emmwen mi lamot, ese weires án aramas repwe weweiti me álleasochisi. (1 Joh. 5:3) Jesus a erá: “Ai we waas üpwe anomu womi a mecheres, nge wosemi we üpwe ngenikemi a pän.” (Mat. 11:29, 30) Pwal och, ese pwal lamot ngeni ewe “allük mi unusöch” epwe tichikietiw chómmóng allúk pun a lóngólóng wóón tong me a mak lón ekiekin me letipen aramas, nge esap wóón ekkewe faw mi chépép.​—Álleani Ipru 8:6, 10.

IFA USUN “EWE ALLÜK MI UNUSÖCH” A ANGASAKICH

6, 7. Met sia tongeni erá usun án Jiowa kewe allúk? Met sia tongeni féri fán ewe allúkún ngaseló?

⁶ Ekkewe minen aúkúk Jiowa a isetiw fán iten aramas, ina fán iten feiéchúr me túmúnúúr. Áwewe chék, ekieki usun ekkewe allúk mi nemeni mettóchun fénúfan, usun chék ewe allúkún weiwei (gravity). Aramas rese ngúnúngúnúngaw pwe usun itá ekkewe allúk ra fen áweiresiir, nge ra fen kilisou pwe ra mirititi pwe a kawor fán iten feiéchúr. Pwal ina usun, án Jiowa kewe allúk ren met mi pwúng me mwáál, ekkewe sia káé seni ewe “allük mi unusöch,” án Kraist, ra kawor fán iten feiéchún aramas.

⁷ Ewe allúkún ngaseló a eú minen túmún fán itach. Fán ena allúk sia pwal tongeni pwapwa le apwénúetá mochenich mi pwúng, nge sisap efeiengawa pwisin kich are angolong lón án ekkóch pwúngún filatá. Ach sipwe enletin ngaseló, weween ach sipwe tufichin féri minne sia tipeni, a wewe ngeni ach sipwe etipeeúfengeni mochenich ngeni napanapen me ekiekin Jiowa. Weween, sipwe káé le tongei minne Jiowa a tongei me oput minne a oput. Ewe allúkún ngaseló a álisikich le féri ena.​—Am. 5:15.

8, 9. Ifa usun sipwe feiéch seni ach álleasochisi ewe allúkún ngaseló? Áweweei mwo.

⁸ Pokiten sise unuséch, a mmen weires ach sipwe nemeni ach kewe mocheniaingaw. Nge ika sia tuppwél le álleasochisi ewe allúkún ngaseló, sia tongeni ngaseló pwal mwo nge iei. Áwewe chék, emén mwán itan Jay mi umwesin úkkún suupwa. Lupwen a poputá le káé Paipel a kúna pwe Kot ese pwapwaiti ena mettóch. A lamot epwe filatá ika epwe chúen nom fán nemenien suupwa are epwe álleasochisi Jiowa. A mirit le filatá an epwe angang ngeni Kot inaamwo ika a mmen weires an epwe úkútiw seni an úkkún suupwa. Met meefian mwirin an a úkútiw? A erá “ua fókkun ngaseló me unusen pwapwa.”

⁹ Ekkewe sókkun ngaseló seni ei fénúfan, ra atufichi aramas le apwénúetá pwisin mocheniir. Nge Jay a mirititi pwe fen iir ra nom fán fétekin tipis. Chókkewe mi filatá  le álleasochisi án Kot we allúkún ngaseló ra anomuur fán nemenien án Kot we manaman mi fel, iwe mwirilóón ra ngaseló, me eáni “manau me kinamwe.” (Rom 8:5, 6) Ia Jay a angei me ie ewe péchékkúl le úkútiw seni an féffér mi mwáál? Esap seni pwisin péchékkúlan nge seni Kot. A káé Paipel iteitan, iótek fán iten án Kot we manaman me etiwa álillis seni pwiin kewe lón ewe mwichefel. Ikkeei met repwe pwal álisikich meinisin le eáni ewe ngaseló mi enlet. Sipwe ppii ifa usun.

NENELONG LÓN ÁN KOT WE KAPAS

10. Met weween án emén nenelóng lón án Kot we allúk?

¹⁰ Lón James 1:25 a erá pwe emén mi “nenelong lon ewe allük mi unusöch, ewe a angasakich, o sopwela le föri ei . . . epwe feiöch lon met a föri.” Ewe kapasen Krik mi afféú “nenelong” a wewe ngeni án emén epwe pworetiw ren an epwe nengeniéchú och mettóch. Weween a lamot an epwe achocho. Ina minne, ren án ewe allúkún ngaseló epwe etipetipa ekiekich me letipach, mi lamot sipwe angang weires le káéfichi ewe Paipel iteitan me ekilonei fán iótek minne sia fen álleani.​—Jos. 1:8.

11, 12. (a) Ifa usun Jesus a menlapei lamoten ach sipwe mut ngeni ewe enlet an epwe emmweni manawach? (b) Ifa ewe mettóch mi efeiengaw ákkáeúin ekkewe kúkkún me sáráfé repwe túmúnúúr seni?

¹¹ A pwal lamot sipwe ‘sopwela,’ are likiitú le akkapwénúetá án Kot we Kapas. Mi lamot ewe enlet epwe unusen emmweni manawach. Jesus a pwal eáni ekkeei esin kapas ngeni chókkewe mi lúkú i: “Are  oupwe aleasochisi ai kewe kapas, oupwe wesewesen nei chon kaiö. Oupwe silei ewe let, nge ewe let epwe angasakemi.” (Joh. 8:31, 32) Ika sia mut ngeni ewe enlet an epwe emmweni unusen manawach, sipwe tongeni erá pwe sia unusen silei ewe enlet. Iwe, ewe “kapasen Kot” epwe “angang” wooch. Epwe álisikich le ekkesiwili napanapach pwe sipwe áppirúfichi Semach we lón láng.​—1 Tes. 2:13.

¹² Pwisin eisinuk, ‘Ua wesewesen silei ewe enlet? Ua fen manaweni manawei me ren? Are ua chúen tipeni ekkewe sókkun ngaseló, án ei fénúfan?’ Iei pwóróusen emén pwiich fin Kraist, seni le kúkkúnún seman kewe me inan ra emiriti usun emén Chón Kraist. Me le kúkkúnún a lúkú Jiowa nge ese wesewesen silefichi i usun emén chiechian. A makkeei: “Use káé ai upwe oput minne a oput. Use lúkú pwe a áfánni ai kewe féffér. Me use fen káé ai upwe kútta an álillis lupwen ua nom lón osukosuk. Ua chék lúkúlúk wóón pwisin ai sile, nge iei ua mirititi pwe ngang mi fen tiparoch pun use fókkun silei och mettóch.” Sia pwapwa pwe pwiich ei a mirititi mwáállin an ekiek, iwe a féri watteen siwil lón manawan, a pwal mwo nge fiti ewe angangen regular pioneer.

ÁN KOT WE MANAMAN MI FEL A TONGENI ÁLISIKICH LE KÚNA NGASELÓ

13. Ifa usun án Kot we manaman mi fel a álisikich ach sipwe ngaseló?

¹³ Lón 2 Korint 3:17 a mak: ‘Ia an Kot we manaman a nom ie, ikenan a wor ngasala.’ Ifa usun án Kot we manaman mi fel a álisikich le ngaseló? A álisikich le napanapeni ekkewe napanap “chen, pwapwa, kinamwe, mosonotam, kirikiröch, aramasöch, allükülük, tipetekison me tipepwora.” (Kal. 5:22, 23) Aramas rese tongeni wesewesen ngaseló ika rese eáni ekkeei napanap, ákkáeúin ewe napanap tong. Minne a fiffis lón ei fénúfan a ánnetatá enletin ei pwóróus. Mwirin án aposel Paulus eiteita uwaan án Kot we manaman mi fel, a makkeei: “Esap wor och allük a ü ngeni ekei sokun föför.” Met weween alón na? Uwaan án Kot we manaman mi fel ese kaúk ren och allúk. Esap tongeni wor och allúk epwe pinei mámmááritáán ekkeei napanap lón manawach. (Kal. 5:18) Jiowa a mochen ach sipwe ákkámááraatá me pwápwáraaló ekkeei napanap feilfeiló.

14. Ifa usun ekiekin ei fénúfan a fétekini chókkewe mi anomuur fán nemenian?

¹⁴ Chókkewe mi nom fán nemenien ei fénúfan ra apwénúetá pwisin mocheniir, iwe eli ra ekieki pwe iir mi ngaseló. (Álleani 2 Petrus 2:18, 19.) Nge rese silei pwe ren enletin fen iir slave. Mi lamot ekkewe mwú repwe fératá chómmóng allúk ren ar repwe nemeni mochenin me féfférún aramas. Paulus a erá pwe ekkewe allúk “resap för fän iten ekewe chon pwüng, nge ra för fän iten ekewe chon atai allük me chon ü ngeni mwü.” (1 Tim. 1:9, 10) Iir ra pwal nom fán fétekin tipisin futuker pun ra chék apwénúetá ‘mochenin inisir,’ me ina ewe masta mi kirikiringaw. (Ef. 2:1-3) Usun chék án ekkewe nikukutong fitaaló ar mwoneiti ngaren ewe sirap lón eú sepi, iwe ra tolong lón me mwéchúló, ina usun án ekkewe aramas fitaaló ar kewe mocheniaingaw me mwéchúló fán fétekin tipis.​—Jas. 1:14, 15.

EWE NGASELÓ LÓN ÁN CHÓN KRAIST MWICHEFEL

15, 16. Ikkefa ekkewe feiéch sipwe angei lupwen sia chóni án Chón Kraist kewe mwichefel? Ifa ewe sókkun ngaseló sia angei lón ewe mwichefel?

¹⁵ Ka chóni ewe mwichefelin Chón Kraist pokiten Jiowa a lukeukoto, nge esap ren om amasoua taropwe om kopwe chóni. (Joh. 6:44) Pwata a filukketá? A kúna pwe en emén mi múrinné mi niwokkusiti Kot? Eli kopwe apasa “aapwi!” Iwe, met chék  Kot a kúna? A kúna pwe kopwe tipemecheres le álleasochisi an kewe allúk me etiwa an kapasen emmwen. Seni ewe atun ka fiti ewe mwichefel, Jiowa a túttúmúnuk ren an akkasukulok an we Kapas. A angasakeló seni án ekkewe lamalam chofona afalafal me eéreni mi mwáál. A pwal áiti ngonuk ifa usun kopwe áppirú napanapen Kraist kewe. (Álleani Efisos 4:22-24.) Iwe iei, ka feiéch pwe ka chóni ewe mwichen aramas, iir kewe chék wóón ei fénúfan mi angei ewe enletin ngaseló.​—Jas. 2:12.

¹⁶ Ekieki mwo ei: Ka meefi niwokkus lupwen ka nom lein chókkewe mi tongei Jiowa ren unusen letiper? Lupwen oua fósfengen me chón ewe mwichefel lón ewe leenien mwich, ka lólilen ika emén epwe soláái pisekum kewe? Aapwi! Ka meefi núkúnúkéch me kinamwe. A pwal ina usun meefiom ika ka nom lein pwal ekkóch mwichen aramas lón ekkóch leeni? Aapwi! Nge ewe sókkun ngaseló ka meefi me lein néún Jiowa kewe aramas ina chék eú liosun ewe sókkun ngaseló kopwe pwapwaiti lón mwachkkan.

ÁN NÉÚN KOT KEWE NGASELÓ MI LING

17. Ifa usun án Kot “pwärala nöün kana” epwe álisatá án aramas ngaseló?

¹⁷ Paulus a mak usun ewe sókkun ngaseló Jiowa epwe ngeni néún kewe aramas wóón fénúfan. A erá: “Förien Kot kewe meinisin ra fokun ösüküsükü pwe Kot epwe pwärala nöün kana.” A pwal erá pwe férien Kot kewe “repwe fakkun ngaseseni fan nemenien limengau, o repwe eti noun Kot kewe lon ewe ngas mi ling.” (Rom 8:19, 20; Rom 8:21, TF) “Förien Kot kewe” a wewe ngeni ekkewe aramas mi eáni ewe ápilúkúlúkún manaw esemuch wóón fénúfan me kúna feiéch seni án Kot “pwärala nöün kana” mi kepit. Pwálóón néún kana, ekkewe mi kepit lón láng, epwe poputá lupwen ra álisi Kraist le nieló meinisin aramas mi ngaw me amanawa ewe “mwich mi fokun chocho” lón ewe otot sefé.​—Pwär. 7:9, 14.

18. Ifa usun epwe lapoló án ekkewe aramas mi álleasochis ngaseló? Menni ngaseló aramas repwe eáni lesopwolóón?

¹⁸ Lón ena fansoun ekkewe aramas repwele eáni ewe sókkun ngaseló mi kkóló aúchean. Repwe ngaseló seni etipetipaen Satan me néún kewe chónláng mi ngaw. (Pwár. 20:1-3) A ifa me múrinnéén ena! Seni ena fansoun, ekkewe 144,000 king me samol fel repwe áeá manamanen ewe asorun méén kepich le álisi aramas tori ar repwe unusen ngaseló seni tipis. (Pwár. 5:9, 10) Iwe repwe kúna eú sóssót mi sótuni ar lúkú, iwe, chókkewe mi álleasochis repwe kúna ewe sókkun ngaseló mi unuséch Jiowa a fen tipeni fán iter, ina án néún kewe “ngas mi ling.” Ekieki mwo! Esap chúen weires om kopwe féri minne Kot a apasa pwe mi pwúng. Letipom, ekiekum me inisum repwe unuséch, me kopwe tongeni unusen áppirú napanapen Kot kewe.

19. Met a lamot sipwe féfféri ika sia mochen angei án néún Kot kewe “ngas mi ling”?

¹⁹ En mi mochen angei án néún Kot kewe “ngas mi ling”? Ika ina, mut ngeni ekiekum me letipom ar repwe nonnom fán emmwenien “ewe allük mi unusöch, ewe a angasakich.” Káéfichi ewe Paipel iteitan. Mut ngeni ewe enlet an epwe emmweni unusen manawom. Tingor án Kot we manaman mi fel. Alamotaéchú ekkewe álillis seni án Chón Kraist we mwichefel me ekkewe mwéngé lón pekin lúkú Jiowa a awora ngenikich. Kosap mut ngeni Satan an epwe otupuk om kopwe ekieki pwe án Kot kewe allúk ra kon tichik, usun chék an otupu Efa. Inaamwo ika Satan a tipachem solá, nge mi tufich ach sipwe pworacho ngeni pun “sia silei an ekiek.” Ina met sipwe káé lón ewe lesen mwirin ei.​—2 Kor. 2:11.

[Ekkewe sasing lon pekin taropwe 14]

Ua chúen tipeni ekkewe sókkun “ngaselo” án ei fénúfan?

[Ekkewe sasing lon pekin taropwe 14]

Ua mut ngeni ewe enlet an epwe emmweni unusen manawei?