Oesini Lón Paipel Ra Pwénúetá Fansoun Meinisin
Oesini Lón Paipel Ra Pwénúetá Fansoun Meinisin
“Iteiten ekewe pwon a eäni ngenikemi ra pwönüetä, nge esap wor eu me leir esap pwönüetä.”—JOSUA 23:14.
IFA USUN EWE PAIPEL A SÓKKÓLÓ? Ekkewe oesini, án ekkewe soufósun lóóm lúkún Israel, ra silleló ren ffatangawer me orukoruker, sise tongeni lúkúlúk woor. Pwal ina usun ekkewe horoscope lón ei fansoun. Ekkewe sou káé pwóróusen mwachkkan mi chék lóngólóng wóón met a kan fiffis, rese mwo nge oesini usun met epwe wesewesen fis fitepúkú ier me mwen an epwe fis. Nge ekkewe oesini lón Paipel ra sókkóló pun ra tichik me pwénúetá fansoun meinisin, pwal mwo nge “seni ekewe fansoun lom mettoch resamwo fis.”—Aisea 46:10.
PISEKIN ÁNNET: Nimepúkú ier mwen Kraist, ewe soufós Taniel a kúna eú lángipwi mi oesini usun án mwúún Kriis epwe mwittir akkufu Metia me Persia. A fós usun ewe Kingen Kriis pwe lón chék ewe atun “an nemenem a senüküla,” iwe, an nemenem epwe “kup.” Nge ié epwe siwili? Taniel a makkeei: “Rüanü mwü repwe ütä seni ewe mwü, nge pöchöküler esap wewe ngeni pöchökülen ewe aeuin mwü.”—Taniel 8:5-8, 20-22.
ALÓN EKKEWE SOU URUWO: Lap seni 200 ier mwirin fansoun Taniel, Alexander mi Lap a wiliti kingen Kriis. Lón úkúkún engol ier, Alexander a akkufu nemenemen Metia me Persia me nemenien Kriis a chéúló tori ewe chanpupu Indus, ewe fénú Pakistan lón ach ei fansoun. Nge Alexander a mwittir máló atun a 32 chék ierin. Lo, lo, lo a tatiw ewe nemenemen Kriis lón eú maun mi fis kan ngeni Ipsus lón Asia Minor. Ekkewe fémén meilapen sounfiu mi win lón ena maun ra eineti lefiler ewe nemenemen Kriis. Iwe nge, esor emén me leir a péchékkúl an nemenem usun án Alexander.
MET KA EKIEKI? Mei pwal wor eú puk mi masou ren chómmóng oesini nge ra pwénúetá? Are ewe chék Paipel a sókkóló aúchean?
[Ekis Pwóróus lón pekin taropwe 4]
“Ren chómmóngun án Paipel kewe oesini, itá emén esap ekieki pwe ra tongeni chék pwénútá ren sereseran.”—A LAWYER EXAMINES THE BIBLE, ME REN IRWIN H. LINTON
[Credit Line]
© Robert Harding Picture Library/SuperStock
