Ra Tipeeúfengen Ekkewe Puk Lón Paipel

‘Esap wor och kapasen osuni a feito seni letipen aramas, nge ekkewe aramas ra nom fän nemenien än Kot we manaman mi fel ra apasatä ewe kapas a feito seni Kot.’​—2 PETRUS 1:21.

IFA USUN EWE PAIPEL A SÓKKÓLÓ? Fán chómmóng ekkewe puken lóóm mi mak pwal mwo nge lón eú chék fansoun, ra ú fengen. Ekkewe sókkun puk, makkeien sókkópaten mwán lón sókkópaten leeni me fansoun, lap ngeniir rese unusen tipeeúfengen. Nge ewe Paipel a erá pwe meinisin ekkewe 66 puk lón, án chék Emén ekiek, ina popun unusen ewe Paipel a tipeeú le menlapei eú chék pwóróus.​—2 Timoty 3:16.

PISEKIN ÁNNET: Moses, emén chón masen siip 1,500 ier mwen Kraist, a makkeei ewe áeúin puk lón Paipel usun ewe ‘mwirimwir’ epwe feito me amanawa aramas. Mwirin, ena puk a pwal oesini pwe ena mwirimwir epwe feito seni Apraham, Isaak, me Jakop. (Keneses 3:15; 22:17, 18; 26:24; 28:14) Órun 500 ier mwirin ena, ewe soufós Natan a pwáraaló pwe ewe mwirimwir epwe feito seni ewe tettelin king seni Tafit. (2 Samuel 7:12) Engeréú ier mwirin ena, ewe aposel Paulus a áweweei pwe ena mwirimwir a weneiti Jesus me eú mwichen néún chón káé mi filitá. (Rom 1:1-4; Kalatia 3:16, 29) Iwe sáingolóón, le muchulóón fansoun ekkewe aposel, ewe sáingoon puk lón Paipel a oesini pwe chón ena mwirimwir repwe pwáraatá usun Jesus wóón fénúfan, repwe manawsefálitá láng, me fiti Jesus le nemenem úkúkún 1,000 ier. Ena mwirimwir, weween Jesus me chienan kewe, epwe nieló ewe Tefil me amanawa aramas.​—Pwärätä 12:17; 20:6-10.

ALÓN EKKEWE SOU KÁÉ PWÓRÓUS USUN PAIPEL: Mwirin án Louis Gaussen etittinafichi ekkewe 66 puk lón Paipel, a makkeei pwe a ingeiti pwe “a fókkun tipeeúfengen me a chómmóng sou mak ra makkeei ren úkúkún 1,500 ier . . . nge emén me emén leir a fiti eú chék kókkót me menlapei eú chék itelap, ina án aramas chásefál ngeni Kot me ren néún we, usun itá ra fen weweiti.”​—Theopneusty​—The Plenary Inspiration of the Holy Scriptures.

MET KA EKIEKI? Ka ekieki pwe eú puk 40 mwán ra makkeei úkúkún lap seni 1,500 ier epwe tongeni wesewesen tipeeúfengen? Are ewe chék Paipel a sókkóló aúchean?

[Ekis Pwóróus lón pekin taropwe 7]

“A fókkun tipeeúfengen ei puk seni Keneses ngeni Pwärätä. . . . Ese pwal wor eú puk epwe akkarap ngeni.”​—THE PROBLEM OF THE OLD TESTAMENT, ME REN JAMES ORR