Itá mi Ngaw Ach Sipwe Kapas Eis Ngeni Kot?

EKKÓCH ra erá pwe mi mwáál ach sipwe kapas eis ngeni Kot. Eli ra meefi pwe mi ésúfélúngaw ach sipwe eis ika pwata Kot a mut ngeni, are ese mut ngeni, ekkóch mettóch ar repwe fis. Ina met ka pwal ekieki?

Ika ina, iwe, eli kopwe máirú le silei pwe chómmóng aramas mi múrinné ra kapas eis ngeni Kot. Ekieki ekkeei kapas eis ekkóch aramas ra eáni:

Ewe mwán mi tuppwél itan Hiop: “Pwota ekewe aramasangau ra manau o tori chinlap, nge ar nemenem a wattela?”​—Hiop 21:7.

Ewe soufós itan Apakuk: “Pwota ka tipeeu ngeni ekei aramas mi eäni rawangau? Pwota ka fanafanala, lupwen ekewe aramasangau ra arosala chokewe mi pwüng seniir?”​—Apakuk 1:13.

Jesus Kraist: “Ai Kot, ai Kot, pwota ka likitieila?”​—Mateus 27:46.

Ika ka álleani ekkewe wokisin mwan me mwirin ekkena wokisin, kopwe kúna pwe rese fósun án Jiowa * Kot song lupwen aramas ra eis ekkena esin kapas eis seni wenecharen letiper. Pwúngún pwe an mosonottam esap eú minen ámáirú. Áwewe chék, Kot esap mángaw rech ika sia tingorei an epwe awora ngenikich mettóchun aion mi álisatá péchékkúlen inisich. A pwapwa le ngenikich minne sia tingorei. (Mateus 6:11, 33) Pwal ina chék usun, a tipemecheres le awora ekkewe pwóróus epwe tongeni apéchékkúla ekiekich me meefiach. (Filipi 4:6, 7) Jesus a ereni néún kewe chón káé: “Oupwe titingorei, o epwe ngenikemi; oupwe kukutta, o oupwe kuna; oupwe fifichifich, o epwe suuk ngenikemi.” (Mateus 7:7, TF) A ffat pwe Jesus ese chék fósun mettóchun aion, nge a pwal fósun ekkewe kapas eis usun mettóchun lúkú.

Ika a suuk ngonuk óm kopwe kapas eis ngeni Kot, menni lein ekkeei kapas eis kopwe eáni?

● A wor popun ai manaw wóón ei fénúfan?

● Met epwe fis lupwen ua máló?

● Pwata ka mut ngeniei ai upwe riáfféú?

Pokiten “ekewe Toropwe mi Pin meinisin” ra pop seni Kot, iwe, ka tongeni kúna pélúwen óm kewe kapas eis Kot a awora lón an we kapas ewe Paipel. (2 Timoty 3:16) Ekieki met a efisi án ekkóch repwe eáni ekkena kapas eis mi mak asan me pélúwer kewe seni ewe Paipel.