Tong a wewe ngeni alóllóólun ach echeni aramas. Emén mi tong epwe pwáraatá an tong ngeni chókkewe a echeniir ren an kewe féffér me kapas, inaamwo ika an féri ena epwe wewe ngeni an epwe pennúkúoló och mettóch lón manawan.

Moses a pwáraatá an tong ngeni Kot. Ifa usun? Chechchemeni ewe wokisin lón 1 Johannes 5:3: “Wewen ach echeni Kot pwe sia aleasochisi an kewe allük.” Iwe, pokiten Moses a tongei Kot a álleasochisi an kewe allúk. A féri meinisin minne Kot a allúk ngeni an epwe féri, inaamwo ika a eniwokkus are mecheres nge a chék álleasochis, áwewe chék ren an epwe ló chúri ewe Farao mi manaman are an epwe chék eitieló wokun we wóón ewe Setipar. “Moses a föri meinisin usun mine ewe Samol mi Lapalap a allük ngeni.”​—Ekistos 40:16.

Moses a tongei pwiin kewe chón Israel. Iir ra mirititi pwe Jiowa a nénnéúnéú Moses le emmweni néún kewe aramas, ina popun ra chuuri Moses ren ar kewe sókkópaten osukosuk. Iei met a mak: “Ekewe aramas ra ütä ünükün Moses seni lesosor tori lekuniol.” (Ekistos 18:13-16) Anchangei ápekkusun ena angang, iteiten kulók Moses a akkaúseling ngeni ar kana osukosuk! Nge, i a tongei ekkena aramas, a pwapwa le álisiir.

Me lúkún án Moses aúseling ngeniir, i a pwal iótek fán iten chókkewe a tonger. A pwal mwo nge iótek fán iten chókkewe ra tipis ngeni! Áwewe chék, lupwen Miriam, fefinan we a ngúnúngúnúngaw ngeni Moses, Jiowa a apwúngú Miriam, iwe, a úri rupun pwétúr. Sanne Moses a pwapwa ren án Miriam kúna kapwúng, nge a fen mwittir iótek ngeni Jiowa fán iten Miriam, iei met a apasa: “Üa tüngor ngonuk ai Kot, kose mochen kopwe apöchöküla neminei.” (Numperis 12:13) A fókkun watte án Moses tong, ina popun a eáni ena iótek.

Sia tongeni áppirú Moses ren ach ámááraatá tong mi alóllóól ngeni Kot. Ena esin tong a amwékútúkich le álleasochisi an kewe allúk ‘ren unusen letipach.’ (Rom 6:17) Lupwen sia álleasochisi Jiowa seni letipach, sia apwapwaai i. (Än Salomon Fos 27:11) Sia pwal pwisin kúna feiéch. Pún lupwen sia angang ngeni Kot seni ach enletin tongei i, sise chék féri minne mi pwúng nge sia pwal pwapwa lón ach apwénúetá!​—Kölfel 100:2.

Sia pwal tongeni áppirú Moses ren ach ámááraatá ewe esin tong mi pennúkúoló pwisin mochenich fán iten aramas. Lupwen chienach are chón ach famili ra erenikich ar osukosuk, tong epwe amwékútúkich le: (1) aúselingéch ngeniir; (2) achocho le meefieni meefier; me (3) ámmeef ngeniir pwe sia tonger.

Usun chék Moses, sia tongeni iótek fán iten chókkewe sia tonger. Fán ekkóch eli sipwe meefi letipechou lupwen ra erenikich ar osukosuk pún sise tufichin álisiir. Eli sipwe ereniir, “Omusaaló esor met upwe tongeni álisuk wóón me lúkún chék ai upwe iótek fán itom.” Nge chechchemeni pwe “än eman chon pwüng iotek a manaman.” (James 5:16) Eli ach iótek epwe amwékútú Jiowa le féri och mettóch fán iten eménna nge ese mwo fen ekiekin féri me mwan. Ina minne a fókkun éch ach sipwe iótek fán iten chókkewe sia tonger. *

Ka tipeeú ngeni pwe sia tongeni káé chómmóng mettóch seni Moses? Inaamwo ika i emén chék aramas usuch, nge a isetiw leenien áppirú mi fókkun múrinné ren an lúkú, tipetekison, me tong. Ach alapaaló le áppirú an leenien áppirú, pwal ina lapólóón ekkewe feiéch epwe torikich me pwal ekkewe ekkóch.—Rom 15:4.