Eáni ewe Sókkun Manaw mi Wor Aúchean—Ren Óm Áppirú Jesus
“Föföri usun mine Jesus a föföri.”—1 Johannes 2:6.
EWE pwóróus mwen ei a áweweei pwe Jesus a eáni ewe sókkun manaw mi wor aúchean. Ina popun, ika sia mochen an epwe pwal wor aúchean manawach, sipwe feiéch ika sipwe áppirú án Jesus leenien áppirú me aúseling ngeni.
Jiowa a pesekich ach sipwe féri ena, usun met ewe wokisin asan lón 1 Johannes 2:6 a apasa. Ach féfféri usun minne Jesus a féri a wewe ngeni ach sipwe ákkáppirú manawan me akkapwénúetá áitian kewe lón unusen manawach. Ika sia féri ena, Kot epwe pwapwaitikich me sipwe eáni ewe sókkun manaw mi wor aúchean.
A kapachelong lón áitien Jesus kewe ekkewe kapasen emmwen epwe álisikich le tapweló mwirin ipwan. Chómmóng lein ekkena kapasen emmwen ra kapachelong lón án Jesus we Afalafal Wóón ewe Chuuk. Sipwe nengeni ekkóch leir me ppii ifa usun sipwe apwénúretá lón manawach.
KAPASEN EMMWEN: “Ra feiöch chon silei pwe ra wöüngau lon pekin ngünür.”—Mateus 5:3.
IFA USUN A ÁLISIKICH LE EÁNI EWE SÓKKUN MANAW MI WOR AÚCHEAN:
Jesus a erá pwe a pwúkún nóm ren aramas “wöüngau lon pekin ngünür,” weween a lamot ngeniir ar repwe angei ewe sile usun Kot. Sia mochen silei pélúwen ekkeei esin kapas eis mi weneiti ena mettóch: Met popun sia nónnóm wóón fénúfan? Pwata a watte riáfféú wóón fénúfan? Kot a wesewesen chúngúkich? Manawen aramas a chék sópwósópwóló mwirin ar máló? A lamot sipwe silei pélúwen ekkena esin kapas eis ren ach sipwe eáni ewe sókkun manaw mi wor aúchean. Jesus a silei pwe mi chék wor eú puk sipwe tongeni lúkúlúk wóón epwe pélúweni ekkena kapas eis, ina án Kot we Kapas. Lón án Jesus iótek ngeni Seman we, a erá: “Om kapas a let.” (Johannes 17:17) Án Kot we Kapas a wesewesen tongeni ataweei minne mi lamot ngenikich ren ach sipwe angei ewe sile usun Kot?
PWÓRÓUSEN MANAWEN EMÉN:
Esa i ewe chón kél lón eú band mi iteféúló, a feffeitá ngeni an epwe emén chón kél mi wesewesen iteféúló. Inaamwo ika Esa a ina usun, nge a meefi pwe manawan ese unus. A erá: “Inaamwo ika ua pwapwaiti ai we band, nge ua tipeni an epwe pwal wor aúchean manawei.” Iwe, mwirin och fansoun, Esa a chuuri emén Chón Pwáraatá Jiowa. Esa a erá: “Ua eisini chómmóng kapas eis. Iwe, a pélúweni seni lón Paipel nge a mmen weweéch me ra luki letipei, iwe ua tipeeú ngeni an epwe káé ewe Paipel ngeniei.” Minne Esa a káé seni an káéén Paipel a achchúngú letipan me amwékútú an epwe fangóló manawan ngeni Jiowa. Iei met a erá: “Lón manawei me lóóm, ua kan chék chuchchuuri osukosuk me fitikoko, nge iei a wor wesewesen lamoten manawei.”
KAPASEN EMMWEN: “Ra feioch ir ekkewe mi umöumöch ngeni aramas.” —Mateus 5:7, Kapasen God.
IFA USUN A ÁLISIKICH LE EÁNI EWE SÓKKUN MANAW MI WOR AÚCHEAN:
Úméúméch a wewe ngeni ach sipwe tongei, kirekiréch ngeni aramas me áfánniir. Jesus a úméúméch ngeni ekkewe mi osupwang. Ren alóllóólun an tong, a mwékút le álisi chókkewe mi riáfféú. (Mateus 14:14; 20:30-34) Lupwen sia áppirú án Jesus úméúméch, sipwe meefi pwe mi wor aúchean manawach pún ach úméúméch ngeni aramas a kan atoto pwapwa. (Föför 20:35) Sia tongeni pwáraatá úméúméch ngeni ekkewe ekkóch ren ach kapas me féffér mi kirekiréch mi asésééi chókkewe mi osupwangen ach álillis. Ach pwáraatá úméúméch a wesewesen amúrinnéló manawach?
PWÓRÓUSEN MANAWEN EMÉN:
Maria me pwúlúwan we Carlos, iir eú leenien áppirú ren ar úméúméch. Semen Maria we, a má seni pwúlúwan, nge kukkuto chék a apwangapwangoló me itiló lón kiekien samau. Iwe, Maria me Carlos ra uwei ngeniir lón imwer pwe repwe túmúnú. Fán chómmóng rese tongeni annut lepwin, me a pwal mwo nge wor atun ra cheraló pioing pwe a osukosuk ren an semwenin suke. Carlos me Maria ra erá pwe fán ekkóch ra fókkun pekkus, nge usun met Jesus a erá, ra pwapwa pún ra silei pwe ra álisi semer na lón an osupwang.
KAPASEN EMMWEN: “Ra feiöch chon afisätä kinamwe, pun ir repwe iteni nöün Kot.”—Mateus 5:9.
IFA USUN A ÁLISIKICH LE EÁNI EWE SÓKKUN MANAW MI WOR AÚCHEAN:
Ifa usun án emén “afisätä kinamwe” a álisatá an eáni ewe sókkun manaw mi wor aúchean? Lupwen sia achocho le álisatá ewe kinamwe lefilach me ekkewe ekkóch, epwe péchékkúleló ach ririéch ngeniir. Mi múrinné ach sipwe álleasochisi ei kapasen emmwen lón Paipel, a erá: “Oupwe föri mine oupwe kinamwefengen me aramas meinisin ren ükükün ämi tongeni.” (Rom 12:18) Ena kapas “aramas meinisin” lón ei wokisin, a kapachelong chón le imwach kewe me pwal ekkewe ekkóch eli rese lúkú minne sia lúkú. Ach efisatá kinamwe lefilach me “aramas meinisin” a tongeni álisatá ach eáni ewe sókkun manaw mi wor aúchean?
PWÓRÓUSEN MANAWEN EMÉN:
Nengeni pwóróusen emén fefin itan Nair. Lón fite ier a kúna chómmóng sóssót ren ifa usun epwe amwéchú kinamwe ákkáeúin lón an famili. Orun15 ier lóóm, seni ewe fansoun pwúlúwan we a péútaaló, a pwisin foleni néún kewe. Emén néún kewe át a áeámwáálli ekkewe sáfei mi efeiengaw, me fán chómmóng a umwesiló me afanga i me néún we nengngin. Nair a lúkú pwe minne a káé seni Paipel a apéchékkúla i le efisi kinamwe inaamwo ika nónnómun a fókkun weires. A achocho an esap ánini wóón mettóch. A pwal achocho le pwáraatá kirekiréch, áfánni me weweiti meefien ekkewe ekkóch. (Efisos 4:31, 32) A fókkun lúkú pwe an káé ifa usun epwe emén chón efisatá kinamwe a apéchékkúlaló an ririéch ngeni chón leimwan me ekkewe ekkóch.
EKIEKI USUN MWACHKKAN
Ika sipwe álleasochisi án Jesus kapasen fén, sipwe kúna pwapwa me lamoten manawach. Iwe nge, ren ach sipwe eáni wesewesen ewe sókkun manaw mi wor aúchean, mi lamot sipwe pwal silei met epwe fis lón mwachkkan. Pún ifa usun an epwe wor aúchean manawach ika sia silei pwe sipwe chék chinnapeló, semmwen me máló? Nge ina chék usuusun fetálin manawen aramas.
Iwe nge, a wor pwóróus allim! Jiowa epwe efeiéchú chókkewe mi “föföri usun mine Jesus a föföri.” Jiowa a pwonei pwe ekiseló epwele wor ewe fénúfan sefé mi pwúng, ikewe ekkewe aramas mi pwúng repwe unuséchúló me manaw ie tori feilfeiló chék. Ina ewe sókkun manaw Jiowa a tipeni fán iten aramas. Iei met án Kot we Kapas a erá: “Nengeni, imwen Kot a nom lein aramas! Iwe, Kot epwe nonom lefiler o ir repwe aramasan, nge püsin Kot epwe etiir pwe epwe ar Kot. Epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.”—Pwärätä 21:3, 4.
Maria, ewe fefin 84 ierin, ewe sia fen pwóróus usun lón ewe áeúin lesen, a pwapwaiti an ápilúkúlúk an epwe kúna pwénúetáán masouen ena wokisin. Nge ifa usun en? En mi mochen alapaaló óm sile usun ewe “enletin manau,” ewe epwele pwénútá fán án Kot we Mwú? (1 Timoty 6:19) Ika ina, ka tongeni kapas eis ngeni ekkewe Chón Pwáraatá Jiowa lón leeniom we are mak ngeni chón féri ei puk. *
^ Ewe puk itelapan, Met ewe Paipel A Wesewesen Apasa?, férien Chón Pwáraatá Jiowa, a fen álisi chómmóng aramas le káé sókkópaten itelap lón Paipel.
