1, 2. Ekkewe lángipwi usun án Jiowa we mwicheich wóón unuselapen láng me fénúfan ra amwékútúkich le féri met?

 A MMEN amwarar ach sipwe ekieki pwe kich sia kapachelong lón án Jiowa we mwicheich lón unuselapen láng me fénúfan. Pwóróusen ekkewe lángipwi lón Isikiel sópwun 1 me Taniel sópwun 7 ra áweweéchú ifa usun Jiowa a akkangang pwe epwe apwénúetá minne a tipeni. Jesus a wisen emmweni kinikinin án Jiowa we mwicheich wóón fénúfan. A emmweni ewe mwicheich le féri ewe angangen afalafal, asukula me álisi chókkewe ra féri ei angang me pwal álisi ekkewe ekkóch ar repwe wiliti chón fel ngeni Jiowa. Ei mettóch a amwékútúkich ach sipwe lúkúlúk wóón án Jiowa we mwicheich!​—Mat. 24:45.

² Ka fitipachei án Jiowa we mwicheich ren óm akkachocho lón óm angang ngeni i? Eli ka meefi pwe a poputá le patapateló óm tinikken. Ei mettóch a fis ngeni ekkewe popun Chón Kraist. Iwe a lamot ngeni aposel Paulus an epwe áchema ngeniir án Jesus leenien áppirú ren an tinikken. Paulus a erá pwe ei mettóch epwe álisiir ar resap “apilükingau o fangatä.” (Ipru 12:3) Lón ewe lesen mwen ei, sia káé usun ewe angang mi amwarar án Jiowa we mwicheich a féfféri ikenái. Án Jesus leenien áppirú a apéchékkúla ekkewe popun Chón Kraist, nge ewe leenien áppirú án Jiowa we mwicheich a isetiw fán itach ikenái epwe pwal tongeni álisikich le likiitú lón ach angang ngeni Kot me akkamwéchú ach tinikken.

3. Met a lamot sipwe féri pwe sisap achanú? Met sipwe káé lón ei lesen?

³ Iwe nge, ren ach sisap “achanü,” are patapateló ach tinikken, mi pwal wor och mettóch sipwe féri me lúkún ach ekieki usun ewe leenien áppirú án Kot we mwicheich a isetiw. Paulus a erá pwe mi lamot sipwe “föföri mine a mürina.” (Kal. 6:9) Sipwe káé usun nimu mettóch mi lamot sipwe féri pwe sipwe akkamwéchú ach tinikken me fitipachei emmwenien án Jiowa  we mwicheich. Iwe mwirin, sia tongeni apwungalo ika epwe lamot ngenikich are ach famili ach sipwe angang wóón eú me lein ekkena mettóch.

4. Pwata sia tongeni erá pwe ekkewe fansoun mwich ra fókkun lamot lón ach fel mi enlet?

⁴ Seni lóóm tori ikenái, ekkewe fansoun mwich ra fókkun lamot ngeni néún Jiowa kewe chón angang. Lón láng, Jiowa me néún kewe chónláng ra mwichfengen. (1 King 22:19; Hiop 1:6; 2:1; Tan. 7:10) Lón fansoun lóóm, Kot a ereni ekkewe chón Israel ar repwe mwichfengen “pwe meinisin repwe rongorong o kaiö.” (Tut. 31:10-12) Lón fansoun Jesus we, ekkewe chón Jus ra mwichfengen lón ekkewe sinakok iteitan pwe repwe álleani Án Kot we Kapas. (Luk. 4:16; Föf. 15:21) A chúen lamot ekkewe fansoun mwich fán iten néún Kot kewe chón angang lupwen a fférútá ewe mwichefelin Chón Kraist. Me ra chúen fókkun lamot tori ikenái. Ekkewe Chón Kraist mi enlet ra ‘ekiekifengeni usun ar repwe tongeni alollolätai chiener ren ar eäni chen me föför mürina.’ A lamot sipwe “apöchökülafengenikich,” ákkáeúin lón ekkeei ránin lesópwólóón sia manaw lón.​—Ipru 10:24, 25.

5. Ifa usun sipwe tongeni apéchékkúlafengenikich atun ach kewe mwich?

⁵ Ach uwawu meefiach atun ekkewe mwich, ina eú alen ach sipwe tongeni apéchékkúlafengenikich. Áwewe chék, sia tongeni pélúweni ekkewe kapas eis seni lón ewe parakraf, áweweei eú wokisin lón Paipel are apwóróusa ifa usun ekkewe kapasen emmwen lón Paipel ra álisikich. (Kölf. 22:22; 40:9) Inaamwo ika sia fen fiffiti mwich ren fite fite ier, nge ach rongorong án ekkewe kúkkún me watte uwawu meefier atun ekkewe mwich a chúen fókkun apéchékkúlakich.

6. Ifa usun ach kewe mwich ra álisikich?

⁶ Ach kewe mwich me mwichelap ra pwal álisikich lón ekkóch mettóch. Áwewe chék, ra ngenikich pwora le afalafal inaamwo ika aramas lón ach kewe leenien afalafal ra oputakich are rese mochen aúseling. (Föf. 4:23, 31) Ekkewe afalafal me pwal ekkewe ekkóch kinikin mi lóngólóng wóón Paipel ra apéchékkúlaló ach lúkú. (Föf. 15:32; Rom 1:11, 12) Sia fókkun meefi pwapwa me kinamwe atun sia nónnóm lein pwiich kewe. (Kölf. 94:12, 13) Ewe Kúmiin Pekin Asukul seni ewe Mwichen Sou Pwúngúpwúng a akkóta ekkewe prokram me ekkewe minen káit fán iten ekkewe mwich, án néún Jiowa kewe aramas. Sia fókkun kilisou ren ewe káit mi fókkun álilliséch sia angei seni ach kewe mwich iteiten wiik!

7, 8. (a) Ifa ewe ákkáeúin popun mi lamot sipwe fiti ach kewe mwich? (b) Ifa usun ekkewe mwich ra álisuk?

⁷ Iwe nge sise fiti ach kewe mwich pokiten chék ekkewe feiéch sia angei. Ewe popun a lamot seni meinisin sia fiti ekkewe mwich, pwe sipwe fel ngeni Jiowa. (Álleani Kölfel 95:6.) A ifa me watteen aúchean wisach ach sipwe mwareiti ach we Kot mi amwarar lón ach eáni kél! (Kol. 3:16) Sia pwal mwareiti Jiowa ren ach uwawu meefiach atun ekkewe mwich. A fókkun fich ngeni Jiowa ach sipwe fel ngeni i lón ekkeei esin napanap. (Pwär. 4:11) Ina popun esap eú minen ámáirú án Paipel apasa ach sisap úkútiw le fiti ach kewe mwich!​—Ipru 10:25.

⁸ Ach kewe mwich, iir liffang seni Jiowa pwe repwe álisikich le likiitú tori an epwe ataieló ei ótót mi ngaw. Pwal ina usun meefiom? Ika ina meefiach, iwe sipwe achocho úkúkún ach tufich le fiti meinisin ekkewe mwich inaamwo ika a watte osukosuken manawach. (Fil. 1:10, NW) Sisap mut ngeni och mettóch mi lamot kisikis an epwe eppetikich ach sipwe fiti ach kewe mwich.

9. Ifa usun sia silei pwe ewe angangen afalafal a lamot?

⁹ Ach sipwe fitipachei án Jiowa we mwicheich, mi lamot sipwe afalafal fán tinikken. Jesus a poputááni ewe angangen afalafal lupwen a nóm wóón fénúfan. (Mat. 28:19, 20) Seni ena atun, ewe angangen afalafal me álisi aramas le wiliti chón fel ngeni Jiowa, ina eú me lein ekkewe angang mi kon lamot ngeni án Jiowa we mwicheich. Chómmóng pwóróus ra pwáraatá pwe ekkewe chónláng ra álisatá ei angang me ákkálisikich le kúna chókkewe repwe etiwa ewe enlet. (Föf. 13:48; Pwär. 14:6, 7) Me ewe popun a kawor kinikinin án Jiowa we mwicheich wóón fénúfan pwe epwe akkóta me álisatá ewe angangen afalafal. Ei angangen afalafal, pwal ina eú me lein ekkewe angang mi fókkun lamot lón manawom?

10. (a) Met emén pwiich a féri pwe epwe úkkúppós lón ewe enlet? (b) Ifa usun ewe angangen afalafal a álisuk pwe kopwe úkkúppós lón ewe enlet?

¹⁰ Ren ach tinikken lón ewe angangen afalafal, sia tongeni úkkúppós lón ewe enlet. Ina met meefien emén mwán mi ásimaw lón ewe mwichefel mi fiti ewe angangen regular pioneer, itan Mitchel. A erá: “Ua pwapwa le afalafal ngeni aramas usun ewe enlet. Ua ekieki usun eú mineféén pwóróus lón Ewe Leenien Mas are Awake! mi kakkatowu iteitan, me ua mwaar ren ewe tipachem, mirit me ewe ekiek lón mi fókkun itepék me rúúepek. Ua fókkun mochen fiti ewe angangen afalafal pwe upwe silei met meefien aramas usun ewe pwóróus me ifa usun upwe lukiir ar repwe pwapwaiti.”  Mitchel a pwal apasa pwe an fiti ewe angangen afalafal a álisi le akakkomwa minne a fókkun lamot lón manawan. A túmúnú pwe esap wor och mettóch epwe eriki i seni ei angang. Sia pwal tongeni likiitú lón ekkeei ránin lesópwólóón ika sia achocho lón án Kot angang.​—Álleani 1 Korint 15:58.

11. Pwata a lamot sipwe álleani néúch kewe puk me ekilonei minne sia álleani?

¹¹ Jiowa a pwal apéchékkúlakich ren an awora ngenikich néúch kewe sókkópaten puk. Ese mwáál ka chechchemeni eú fansoun ka álleani eú pwóróus lón néúch puk me ka erá: ‘Mwa met a fókkun weneitiei ei pwóróus! Usun itá Jiowa a makkeei fán itei chék!’ A wor popun a ina usun meefiom. Jiowa a néúnéú néúch kewe puk an epwe asukulakich me emmwenikich. A erá: “Üpwe aiti ngonuk ewe al kopwe fetal won o emwenuk.” (Kölf. 32:8) Sia achocho le álleani meinisin néúch kewe puk me ekilonei minne sia álleani? Ei mettóch epwe álisikich le likiitú me akkamwéchú ach tinikken lón ach angang ngeni Kot lón ekkeei ránin lesópwólóón mi áweires.​—Álleani Kölfel 1:1-3; 119:97.

12. Met a tongeni álisikich le aúcheani néúch kewe puk?

¹² Epwe lapóló ach aúcheani néúch kewe puk ika sia ekieki úkúkún watteen ewe angang a fis ren mmólnetáár. A lamot angangen kúttafichi ekkewe pwóróus, makkeei, cheki, féri ekkewe chúnga are sasing me afféwú ekkewe puk, ekkewe sia peresei are pacheetá wóón ach we Web site. Ewe Kúmiin Pekin Mak seni ewe Mwichen Sou Pwúngúpwúng, a wisen emmweni ei angang. Ekkewe keangen ofesilap mi wisen peresei néúch kewe puk ra pwal tinaló ngeni chómmóng mwichefel mi nóm fán ar túmún. Pwata a fis meinisin ekkeei angang? Pún néún Jiowa kewe aramas ra tongeni angei káit me emmwen mi lamot ngeniir pwe repwe akkamwéchú ar tuppwél. (Ais. 65:13) Sipwe kúna feiéch seni néúch kewe puk meinisin mi kawor me ren án Jiowa we mwicheich.​—Kölf. 119:27.

13, 14. Ié kewe lón láng ra kan álisatá án Jiowa we mwicheich? Ifa usun sia pwal tongeni áppirúúr?

¹³ Lón eú lángipwi, Johannes a kúna Jesus a wawa oris mi pwechepwech pwe epwe maunei me akkufu ekkewe chón ú ngeni Jiowa. (Pwär. 19:11-15) A pwal kúna ekkewe chón kepit mi tuppwél mi manawsefál ngeni manaw lón láng me ekkewe chónláng mi tuppwél ra pwal wawa oris me tapweló mwirin Jesus. Ei mettóch a pwáraatá pwe ra álleasochisi Jesus, néúr we Sou Emmwen. (Pwär. 2:26, 27) Ar leenien áppirú mi fókkun múrinné a áiti ngenikich ach sipwe pwal álisatá chókkewe ra emmweni kókkótun án Jiowa we mwicheich.

¹⁴ Pwal ina chék usun, ewe mwich mi fókkun chóchó a unusen álisatá angangen pwiin Kraist kewe mi kepit mi chúen nóm wóón fénúfan. (Álleani Sekaraia 8:23.) Ifa usun kopwe pwáraatá pwe ka álisatá ewe mwicheich? Ka tongeni ren óm álleasochisi chókkewe mi emmweni ei angang. (Ipru 13:7, 17) Minne sia apasa usun ekkewe mwán mi ásimaw lón ach we mwichefel, a ámmeef ngeni ekkewe ekkóch ar repwe pwal súféliti iir me wiser kewe? Sia áiti ngeni néúch kewe ar repwe súféliti ekkeei mwán mi tuppwél me aúseling ar emmwen? Mi pwal wor ekkóch mettóch sia tongeni féri pwe sipwe álisatá ewe mwicheich. Áwewe chék, óm famili a kan akkóta an epwe awora monien álillis fán iten kálisitáán ewe angangen afalafal? (SalF. 3:9; 1 Kor. 16:2; 2 Kor. 8:12) Pwal och, sia álisi ewe angangen elimelim me túmúnún ach we Leenien Mwich? Lupwen Jiowa a  kúna ach álisatá ewe mwicheich ren ekkeei napanap, a fang ngenikich an we manaman mi fel. Me an we manaman mi fel a apéchékkúlakich ach sipwe tongeni likiitú lón ekkeei ránin lesópwólóón.​—Ais. 40:29-31.

15. Pwata a lamot ach sipwe fiffiu le féri minne mi pwúng?

¹⁵ Ika sia mochen likiitú me fitipachei emmwenien án Jiowa we mwicheich, mi lamot sipwe manaweni ewe sókkun manaw mi apwapwaai I. (Ef. 5:10, 11) Pokiten Satan, ei ótót mi ngaw, me pwisin ach apwangapwang a weires ach sipwe féri minne mi pwúng. Ámi pwiich kana mi fókkun áchengicheng, sia silei pwe ren ekkóch leimi oua fiffiu are angang weires iteiten rán pwe oupwe akkamwéchú ámi ririéch ngeni Jiowa. Jiowa a fókkun tongekemi ren ámi achocho. Ousap fangetá! Lupwen sia manaweni ewe sókkun manaw mi apwapwaai I, sipwe eáni ewe manaw mi pwapwa me menemenéch me sia tongeni lúkúlúk pwe Jiowa epwe anómukich fán an chen.​—1 Kor. 9:24-27.

16, 17. (a) Met sipwe féri ika sia féri och tipis mi chou? (b) Met sia káé seni pwóróusen Anne?

¹⁶ Met kopwe féri ika ka féri och tipis mi chou? Kosap sótun aopaaló. Mwittir kútta álillis. Chechchemeni meefien Tafit lupwen a sótun aopaaló an tipis. A erá: “Lupwen üsap pwärätä ai tipis, inisi a apwangapwangela ren ai kechü lon unusen rän me rän.” (Kölf. 32:3) Ika sia aopaaló ach tipis, epwe péút senikich ach pwapwa me neman pwal mwo nge ach ririéch ngeni Jiowa. Nge ika sia pwári, “Kot epwe ümöümöch” ngenikich.​—SalF. 28:13.

¹⁷ Ekieki usun pwóróusen Anne. * Lupwen Anne a teenage me a regular pioneer a poputá féri féffér mi ngaw. Iwe, a mengiringir mwelien letipan. Iei alón: “Use pwapwa me ua letipechou fansoun meinisin.” Eú rán lón ewe mwich, ra pwóróus wóón James 5:14, 15, iwe, Anne a mirititi pwe a fókkun osupwangen álillis. Met a féri? A fiti ewe kapasen pesepes lón ena wokisin me a fós ngeni ekkewe mwán mi ásimaw. Ese mecheres an epwe féri ena, nge a erá pwe usun itá i mi semmwen nge Jiowa a aúnú sáfei pwe epwe chikar. A áweweei: “A weires ai upwe únúmi ewe sáfei, nge a echikaraei.” Iei, Anne a péchékkúlsefál me akkangang ngeni Jiowa fán eú mwelien letip mi limeliméch.

18. Met sipwe achocho le féri?

¹⁸ Sipwe chechchemeni aúchean ach kapachelong lón án Jiowa we mwicheich lón ekkeei ránin lesópwólóón! Sipwe achochofengen me chón ach famili le fiffiti ach kewe mwich, tinikken lón ach afalafal ngeni aramas, me aúcheani meinisin néúch kewe puk. Sipwe pwal álisatá chókkewe mi wisen emmwenikich, me manaweni ewe sókkun manaw mi apwapwaai Jiowa. Ika sia féri ekkeei mettóch, sipwe fitipachei emmwenien án Jiowa we mwicheich me sisap achanú.