Iei alon Paul, emén mi pwúpwúlú nge a wor rúúemén néún: “Mwirin kekiitáán méén mettóch lón fénúem, ese naf ekkewe mwéngé me ra mémmóng. Aua line fitu awa me lap ngeni ewe mwéngé a it me mwen aua tori. Aramas ra kichúchúló seni ar echik me ekkóch ra mesaroch wóón al. Méén mettóch mi lamot ngeni manawach a tori million mwirin billion. Sáingolóón, ese chúen wor manamanen moni. A péút seniei nei moni lón bank, insurance me social.”

Paul a silei pwe an famili epwe manaw ika epwe eáni “tipachem.” (Än Salomon Fos 3:21) A apasa: “Ua piin angang lón pekin fiifi nge mwirin ua chék eáni angang ese lifilifil inaamwo ika ai peiof a kon kis seni me lóóm. Ekkóch ra mééniei wóón mwéngé are pisekin imw. Ika ra ngeniei féféú soap, iwe ua eáni rúúeféú nge amémé rúúeféú. Ua néúni 40 nisissiók. Atun ra wattetá, ua améméroló me pwal mééni 300 nisissiók. Mwirin ua ekkesiwili 50 chukó ngeni ruu 110 paun tuken cornmeal. Seni ekkena cornmeal ua amwéngééni ai famili me pwal fitu famili ren fansoun langattam.”

Paul a pwal silei pwe ewe mettóch mi fókkun pwári tipachem ina án emén lúkúlúk wóón Kot. Ika sia apwénúetá met a allúkú ngenikich, epwe álisikich. Iei alon Jesus usun ataween met mi lamot lón manawach: “Ousap öürek usun. Pun . . . Sememi we a silei pwe oua osupwangen ekei mettoch.”​—Lukas 12:29-31.

Nge Satan, ewe Kot a kon oputa, a otupu lap ngeni aramas ar repwe akkomwa pisek lón manawer. Aramas ra kon aúreki ar osupwang me pwal mettóch ra chék ekieki pwe ra osupwangan iwe ra angang weires fán aúrek pwe repwe angei ekkena mettóch rese lamot ngeniir. Chómmóng ra liwinimmang. Iwe ra kúna pwúngún ei pwóróus nge a serlupwan: “Ewe chon paaro i nöün ewe chon mwütätä amanau.”​—Än Salomon Fos 22:7.

 Ekkóch aramas ra filatá mettóch ra feiengaw ren. Paul a erá: “Chómmóng chón órui ra likitaló ar famili me chiechier pwe repwe kútta manaw mi nónnóméch. Ekkóch ra ló nge ese wor taropween mumutá seni immigration iwe rese tongeni angang. Ra op seni ekkewe polis me ra annut wóón ekkewe al. Rese mut ngeni Kot an epwe álisiir. Nge ám famili aua tipeppós le angangfengen le pwákini ám osukosuken moni ren álillisin Kot.”

Paul a pwal apasa: “Jesus a erá: ‘Iei mine ousap öürek usun ewe rän lesor, pun lesor epwe püsin anafa öürekin lon. Eu me eu rän epwe püsin wor osukosuken lon.’ Ina popun ai iótek ngeni Kot iteiten rán pwe epwe chék ‘ngenikem anem mongö ikenai’ pwe aupwe manaw. Kot a álisikem usun chék met Jesus a pwonei. Nge esap iteiten aua angei met aua sani. Eú rán ua line fán iten mwéngé nge use silei met a wor. Nge atun ua tori, ua kúna pwe yogurt. Nge use sani. Nge ena pwal mwéngé, iwe aua mwéngé yogurt lón ena pwinin. Ua fókkun kilisou ngeni Kot pwe lón ekkena fansoun weires ai famili esap fán eú ra annut nge ra echik.” *

“Ikenái a ekis mecheres manawem lón pekin moni. Nge met aua káé seni minne a fis lón manawem pwe ewe mettóch mi fókkun lamot le likiitú fán aúrek ina ám lúkúlúk wóón Kot. Jiowa * epwe álisikich iteitan ika sipwe akakkomwa lé féri letipan. Aua fen kúna pwúngún alon Kölfel 34:8: ‘Oupwe neni o nengeni pwe ewe Samol mi Lapalap a kirikiröch. Ra feiöch ätekewe mi eäni i lenien op.’ Iwe, ám ausap niwokkus le kúnasefáli eú fansoun weires usun moni.

“Aua wewefichiti met mi lamot ngeni aramas ar repwe manaw, esap angang are moni pwe mwéngé. Aua éttúres le witiwiti ewe fansoun Kot epwe apwénúetá an we pwon: ‘Epwe wor chomong wiich lon ewe fanü.’ Iei minne lón ekkeei rán ‘are a wor anach me üfach sipwe menemenöch ren.’ Aua péchékkúl seni alon Paipel keei: ‘Ousap manaueni eu manauen mochenian moni, nge oupwe menemenöch ren mine oua eäni. Pun Kot a apasa, “Ngang üsap fokun likituk, üsap pwal tümwününgau ngonuk.” Iei mine sipwe tongeni apasa fän apilükülüköch, “Ewe Samol i ai Soualilis, üsap fokun niuokus, met aramas repwe tongeni föri ngeniei?”’” *

Mi lamot enletin lúkúlúk pwe sipwe “chiechifengen me Kot” usun met Paul me an famili ra féri. (Keneses 6:9) Ika sia kúna osukosuk watte iei, usun moni are sipwe kúna lón mwach, sia káé mettóch mi lamot seni pwóróusen án Paul lúkúlúk wóón Kot me an eáni tipachem.

Nge epwe ifa usun ika osukosuken famili a aúrekikich?