Met óm ekiek? Kot a tipeeú ngeni maun? Ika ina, menni pekin ka pekini lón osukosuken ei fénúfan lón ei fansoun? Óm silei pélúwen ekkena kapas eis a tongeni álisuk le etittina ika met óm ekiek usun maun. Áwewe chék, ika ka silei pwe Kot a tipeeú ngeni maun me a pwal álisatá ewe pekin ka pekini lón eú maun, ese mwáál kopwe pwapwa pwe ka fiti ena pekin, iwe ka lúkúlúk pwe epwe win óm na pekin. Nge epwe ifa meefiom ika ka silei pwe Kot a álisatá ewe pekin ka oput? Ese mwáál, kopwele ekieksefál ren ena pekin ka pekini.

Mi pwal wor eú mettóch mi fókkun lamot kopwe silei. Óm silei án Kot ekiek usun maun a tongeni kkúú óm ekiek usun Kot. Ika en emén lein ekkewe fite million aramas mi fen feiengaw watte atun maun, ese mwáál kopwe mochen silei pélúwen ekkeei kapas eis: Itá Kot a kan efisi maun are pwal mwo nge alapaaló watteen ewe riáfféú a fis atun maun? Are, itá Kot a mutatá mettóch mi ngaw an epwe fis me ese ekieki usun túmúnún chókkewe ra kúna riáfféú?

Neman kopwe máirú lupwen ka silei pwe minne Paipel a pélúwen ngeni ekkena kapas eis a fókkun sókko seni án aramas kana ekiek. Pwal och, seni lóóm tori ikenái, án Kot ekiek usun maun ese siwil. Sipwe ppii met Paipel a apasa usun met án Kot ekiek usun maun lón fansoun lóóm me lón ewe áeúin senturi, ewe fansoun Jesus a nóm wóón fénúfan. Ena mettóch epwe álisikich le silei án Kot ekiek usun maun lón ei fansoun me ika epwe chék wokkor maun feilfeiló.