Áeúin Taropwe Ngeni Timoty 5:1-25
5 Kosap apwúngúchowu emén chinnap mwán, nge kopwe fós ngeni ussun itá nge i semom, me kopwe fós ngeni emén alúwél, ussun itá nge i pwiium,
2 kopwe fós ngeni ekkewe chinnap fefin ussun itá nge iir inom, kopwe fós ngeni ekkewe fépwúl ussun itá nge iir fefinom, ren eú letip mi limeliméch.
3 Kopwe súféliti ekkewe fefin mi má seniir pwúlúwer, iir kewe mi enletin osupwang.*
4 Nge iká mi wor néún are néún néún emén fefin mi má seni pwúlúwan, iwe repwe akkomw apwénúetá ewe manaw mi fich ngeni Kot lón pwisin ar famili me liiwini ngeni semer kewe me iner, me semer kewe me iner chinnap minne ra féri fán iter, pún iei met mi apwapwaai Kot.
5 Emén fefin mi má seni pwúlúwan me mi chék ákkáláemén mi fókkun osupwang, a onómu an ápilúkúlúk wóón Kot me sópweeló le tingormaw me ikkiótek lerán me lepwin.
6 Nge ewe mi chék mochen apwénúetá pwisin mochenin,* a máló inaamwo iká a chúen manaw.
7 Kopwe sópweeló le áiti ngeniir ekkeei kapasen emmwen, pwe repwe itéch.
8 Iwe, iká emén ese awora tufichin an famili, nge ákkáeúin pwisin chón leimwan, iwe a péút seni ewe lúkú me a ngaw lap seni emén ese wor an lúkú.
9 Emén fefin mi má seni pwúlúwan epwe mak itan lein chókkewe repwe angei álillisiir iká a 60 ierin feitá, emén chék pwúlúwan,
10 itéch ren an féffér múrinné, ámááraatá néún kewe, awasélaéchú aramas, télú pechen ekkewe chón pin, álisi ekkewe mi osupwang, me tinikken lón an féri sókkun angang múrinné meinisin.
11 Iwe nge, ekkewe fépwúl mi má seniir pwúlúwer esap mak iter, pún iká ar mochenin futuk a eppeti ar angang ngeni ewe Kraist, repwe mochen pwúpwúlú.
12 Iwe, repwe kúna kapwúng pún ra likitaaló minne ra fen eáni pwon.
13 Pwal och, ra ééren ngeniir ar repwe chipwang, ló ngeni eú me eú imw, rese chék chipwang nge ra pwal uwofós me angolong lón manawen ekkewe ekkóch, me fóffós ussun ekkewe mettóch itá resap pwal fóffós ussur.
14 Ina minne, úa mochen pwe ekkewe fépwúl mi má seniir pwúlúwer repwe pwúpwúlú, repwe néúnéú, repwe túmúnú chón leimwer pwe esap wor met chón koputach repwe esiitakich wóón.
15 Ren enletin, a fen wor ekkóch ra rikiló me tapweló mwirin Setan.
16 Iká mi wor aramasen emén fefin chón lúkú, iir fefin mi má seniir pwúlúwer, i epwe wisen álisiir pwe esap kon chou ngeni ewe mwichefel. Iwe ewe mwichefel a tongeni álisi ekkewe fefin mi má seniir pwúlúwer, iir kewe mi enletin osupwang.*
17 A fich ngeni ekkewe mwán mi ásimaw ach sipwe fókkun súfélitiir ren múrinnéén ar emmwen, ákkáeúin iká ra angang weires lón ar afalafal* me asukul.
18 Pún ewe taropwe mi pin a apasa, “Kosap éppwélú awen emén átemwánnin kou atun a puri ekkewe umwun wiich,” pwal och, “A fichiiti ewe chón angang an epwe angei liwinin.”
19 Kosap lúkú eú kapasen tipimwáál mi iti ngeni emén mwán mi ásimaw, chilóón chék iká mi wor rúúemén are úlúmén chón pwáraatá.
20 Kopwe apwúngú mwen mesen aramas chókkewe mi ééreni le féri tipis, pwe epwe eú minen éúréúr ngeni meinisin.
21 Úa allúkúchou ngonuk mwen mesen Kot me Kraist Jises me ekkewe chónláng mi fil óm kopwe apwénúetá ekkeei kapasen emmwen, nge kosap aapaap are eimwumwu.
22 Kosap atapwalapwal le isettá poum wóón emén,* kosap pwal fiti ekkewe ekkóch lón ar tipis, nge kopwe chék limeliméch.
23 Kosap chék ún konik, nge kopwe pwal únúmi ekis wain pwe epwe álisi lukom me pwal óm samaw mi kan tottoruk.
24 Tipisin ekkóch aramas a pwápwááló, me emmweniir ngeni kapwúng, nge tipisin pwal ekkóch aramas epwe pwápwááló mwirin.
25 Pwal ina chék ussun, ekkewe féffér múrinné ra pwápwááló, nge ekkewe rese pwápwááló resap tongeni monomonoló.
Footnote
^ Weween, iir kewe ese fókkun wor chón álisiir.
^ Ese mwáál, a weneiti an mochenian futuk.
^ Weween, iir kewe ese fókkun wor chón álisiir.
^ Krik, “ar kapas.”
^ Weween, atapwalapwal le seikaatá emén ngeni eú wis.
