Eú Pwáraatá Ngeni Jon 3:1-22
3 “Kopwe mak ngeni ewe chón kúné lón ewe mwichefel lón Sartis: Ikkeei met ewe mi nóm ren án Kot kewe fisu manaman me ekkewe fúúféú fúú a apasa: ‘Úa silei óm kewe féffér, en ka chék manaw ren itom, nge ren enletin ka máló.
2 Kopwe mammasa, me apéchékkúla ekkewe lusun mettóch ekis ngeni chék repwele máló, pún úa kúna pwe kesaamwo áwesi ewe angang ái we Kot a mochen óm kopwe féri.
3 Ina minne, kopwe sópweeló le ekieki* ifa ussun a toruk me ifa ussun ka rong, me sópweeló le álleasochisi, me áier. Iká kese neló, úpwe war ussun emén chón solá, me kosap fókkun silei kulókun ái úpwe toruk.
4 “ ‘Nge mi wor fitemén me leimi lón Sartis rese elimengawa úfer, me iir repwe fitiei le fetál fán úf mi pwech, pún a fichitiir.
5 Ewe emén mi pworacho epwe úféúf úf mi pwech, me úsapw fókkun télawu itan seni ewe puken manaw, nge mwen mesen Semei we me mwen mesen néún kewe chónláng úpwe apasa pwe úa silei itan.
6 Emén mi wor selingan, epwe aúseling met ewe ngún mi fel a apasa ngeni ekkewe mwichefel.’
7 “Kopwe mak ngeni ewe chón kúné lón ewe mwichefel lón Filatelfia: Ikkeei ekkewe mettóch ewe mi pin, ewe mi enlet, ewe mi nóm ren án Tafit we kii, ewe mi suuki pwe esap wor emén epwe éppúngaaló me ewe mi éppúngaaló pwe esap wor emén epwe suuki, a apasa:
8 ‘Úa silei óm kewe féffér—nengeni, úa isettiw mwom eú asam mi suuk, me ese wor emén epwe tongeni éppúngaaló. Úa pwal silei pwe a wor ekis óm manaman, me ka álleasochisi ái kapas me kese amam itei.
9 Nengeni, chókkewe seni án Setan sinakok, iir kewe mi erá pwe iir chón Jus nge esap iir chón Jus, ra chék kapas chofona—ngang úpwe efisi ar repwe feito me chapetiw órun pecheom me esilei ngeniir pwe úa tongeek.
10 Pokiten ka áppirú ái likiitú, iwe úpwe pwal túmúnuk lón ewe fansoun sóssót,* ewe epwe tori unusen fénúfan pwe epwe sótuni chókkewe mi nóm wóón fénúfan.
11 Úpwe mwittir feiló reom. Kopwe kémwéchúnúk wóón met mi wor reom pwe esap wor emén epwe angei sonuk mwárum.
12 “ ‘Ewe emén mi pworacho—úpwe féri an epwe efóch úúr lón imwenfelin ái we Kot, me esap fókkun tongeni towu seni, me úpwe makkeei wóón i iten ái we Kot me iten telinimwen ái we Kot, ewe Jerusalem mi Fé mi feitiw seni láng me ren ái we Kot, me pwal pwisin itei we mi fé.
13 Emén mi wor selingan, epwe aúseling met ewe ngún mi fel a apasa ngeni ekkewe mwichefel.’
14 “Kopwe mak ngeni ewe chón kúné lón ewe mwichefel lón Leotisia: Ikkeei ekkewe mettóch ewe emén mi iteni Amen a apasa, ewe chón pwáraatá mi túppwél me enlet, ewe poputáán férien Kot:
15 ‘Úa silei óm kewe féffér, en kese pat kese pwal pwich. Amwo kopwe pat are pwich.
16 Iwe, pokiten ka chék oropwichipwich nge kese pwich are pat, ngang úpwe kusufukowu.
17 Pún en ka apasa, “Ngang mi pisekisek me a watteeló wéúi me úse osupwangen och mettóch,” nge kese silei pwe ka attong, wéúngaw, mesechun, me seleló.
18 Úa éúréúróók óm kopwe kamé seniei kolt mi limelim lón ekkei pwe kopwe tongeni pisekisekiló, me ekkewe úf mi pwechepwech pwe kopwe úféúf pwe esap pwááló ássáwen óm seleló, me sáfeen maas pwe kopwe minalong lón mesom pwe kopwe tongeni kúna mwom.
19 “ ‘Úa apwúngú me fénéú meinisin chókkewe úa tongeer. Ina minne, kopwe tinikken me áier.
20 Nengeni, ngang úa útá ppen ewe asam me fichifich. Iká emén a rong léúwei me suuki ewe asam, ngang úpwe tolong lón imwan me mwéngéén lefááf ren me i epwe mwéngé rei.
21 Ngang úpwe mut ngeni ewe mi pworacho an epwe móót rei wóón ái leenien móótun king, ussun chék pwal ngang úa pworacho me úa móót ren Semei wóón an leenien móótun king.
22 Emén mi wor selingan, epwe aúseling met ewe ngún mi fel a apasa ngeni ekkewe mwichefel.’ ”
