Me ren Jon 3:1-36
3 A wor emén Farisi itan Nikotemus, i emén néúwisin chón Jus.
2 A feiló ren Jises lepwin me ereni: “Rappai, áúa silei pwe en emén sense mi feito seni Kot, pún ese wor emén a tongeni féri ekkeei esissil ka féri lúkún chék iká Kot a nóm ren.”
3 Lón án Jises pélúweni a ereni: “Enlet úpwe erenuk, iká emén ese upsefál* i esap kúna ewe Mwúún Kot.”
4 Nikotemus a ereni: “Ifa ussun án emén aramas epwe tongeni uputiw atun a fen watte? Mi tongeni an epwe tolong lón án inan leenien ménúkol me uputiwsefál?”
5 Jises a pélúweni: “Enlet úpwe erenuk, iká emén ese uputiw seni konik me ngún, esap tongeni tolong lón ewe Mwúún Kot.
6 Met a uputiw seni futuk ina futuk, me met a uputiw seni ewe ngún ina ngún.
7 Kosap máirú ren ái erenuk: A lamot ámi aramas oupwe upsefál.
8 Ewe ásepwál a eniló ia a mochen eniló ie, me ka rong enienin, nge kese silei ia a enito me ie are ia a eniló ie. Pwal ina ussun ren meinisin mi uputiw seni ewe ngún.”
9 Lón án Nikotemus pélúweni a ereni: “Ifa ussun epwe tongeni fis ena?”
10 Jises a pélúweni: “En emén sense lón Israel nge kese silei ekkeei mettóch?
11 Enlet úpwe erenuk, met áúa silei áúa apasa, me met áúa kúna áúa pwáraatá, nge ámi ouse etiwa minne áúa pwáraatá ngenikemi.
12 Iká úa erenikemi ekkewe mettóchun fénúfan nge ouse pwal lúkú, ifa ussun oupwe lúkú iká úa erenikemi ekkewe mettóchun láng?
13 Pwal och, ese wor emén aramas a feitá láng, pwe ewe chék Néún aramas, ewe mi feitiw seni láng.
14 Me ussun án Moses emeitiwaatá ewe serepenit me lón ewe fénúpéén, epwe pwal ina ussun án ewe Néún aramas epwe pwal emeitiwetá,
15 pwe meinisin mi lúkú i repwe kúna manaw esemuch.
16 “Pokiten Kot a fókkun tongei fénúfan a fangoló Néún áláemén pwe meinisin mi anganga ar lúkú lón i resap péútmwááliló nge repwe kúna manaw esemuch.
17 Pún Kot ese tiinaato Néún we ngeni fénúfan an epwe apwúngú fénúfan, nge ren an epwe amanawa fénúfan.
18 Ié mi anganga an lúkú lón i esap kapwúng. Nge ié ese wor an lúkú a fen angei kapwúngún, pún ese wor an lúkú lón iten Néún Kot we áláemén.
19 Iei lóngólóngun ewe kapwúng: pwe ewe saram a tolong lón fénúfan, nge aramas ra efich ewe rochopwak lap seni ewe saram, pún ar féffér a fókkun ngaw.
20 Pún ié a féfféri mettóch mi ánnioput a oput ewe saram me ese tolong lón ewe saram pwe an kewe féffér rete kapwúng.*
21 Nge ié a féri minne mi pwúng a feito ngeni ewe saram pwe epwe pwápwááló an kewe féffér pwe ra tipeeú ngeni letipen Kot.”
22 Mwirin ekkeei mettóch, Jises me néún kewe chón káé ra feiló ngeni ekkewe sóópw lón Jutia. Me a nóm rer ikena ren och fansoun me pwal papataisi aramas.*
23 Nge Jon a pwal féri angangen papatais lón Inon arap ngeni Salim pún mi wor eú watteen konik ikena ie, me aramas ra kan feito me papatais,
24 pún Jon esaamwo kóturulong lón imwen kalapus.
25 Iwe, néún Jon kewe chón káé me emén chón Jus ra wippinfengen ussun ewe allúkún elimelim.
26 Iwe, ra feito ren Jon me ra ereni: “Rappai, ewe mwán mi nóm reom epek ewe Jortan, ewe ka fen pwáraatá ussun, nengeni, ei emén a féri angangen papatais, me meinisin ra feiló ren.”
27 Jon a pélúweni, a apasa: “Emén esap tongeni angei och mettóch iká pwe Kot esap ngeni i.
28 Ámi oua pwisin pwáraatá ussui pwe úa fen apasa, ‘Esap ngang ewe Kraist, nge úa tiitiito akkomw mwen ena emén.’
29 Ewe minne pwúlúwan ewe fin apwúpwúlú ina i ewe mwán apwúpwúlú. Nge chienen ewe mwán apwúpwúlú, a pwapwa chapur ren léúwen ewe mwán apwúpwúlú atun a úkkúútá me rongorong ngeni. Iwe, ái pwapwa a unusoló.
30 Ena emén epwele lallapoló, nge ngang úpwele kikkisiló.”
31 Ewe emén mi feito seni asan a lap seni meinisin aramas. Ewe emén mi feito seni fénúfan i seni fénúfan me a kapas ussun ekkewe mettóchun fénúfan. Ewe emén mi feito seni láng a lap seni meinisin aramas.
32 A pwáraatá minne a kúna me rong, nge ese wor emén a etiwa minne a pwáraatá.
33 Ié a etiwa minne a pwáraatá, i ese tipemwárámwár pwe Kot mi enlet.
34 Pún ewe emén Kot a tiinaato a apasa minne Kot a apasa, pún Kot ese aúkúkú an fang ewe ngún.
35 Ewe Sam a tongei ewe Naw me a waalong lepéún mettóch meinisin.
36 Ewe emén mi anganga an lúkú lón ewe Naw epwe kúna manaw esemuch, nge ewe emén mi álleasolapa ewe Naw esap kúna manaw, iwe án Kot song epwe nónnóm wóón i.
