Me ren Luk 6:1-49
-
Jises, “Samolun ewe Sapat” (1-5)
-
Emén mwán mi peeló péún a chikar (6-11)
-
Ekkewe 12 aposel (12-16)
-
Jises a asukula aramas me echikarer (17-19)
-
Pwapwa me riáfféú (20-26)
-
Tongei chón oput ámi (27-36)
-
Úkútiw le apwúngú emén (37-42)
-
Silleló ren uwaar (43-45)
-
Imw mi múrinné kaúún; imw ese péchékkúl lóngólóngun (46-49)
6 Iwe, lón eú sapat a fetáleló lón ewe ataken wiich, me néún kewe chón káé ra fichi me áni ekkewe umwun wiich ra marattuna lepéúr.
2 Ren ei, ekkóch ekkewe Farisi ra apasa: “Pwata oua féri met ese mumutá me ren ewe allúk lón Sapat?”
3 Nge lón án Jises pélúweni, a ereniir: “Ousaamwo álleani fán eú met Tafit a féri atun i me ekkewe mwán mi eti ra echik?
4 Ussun an tolong lón ewe imwen Kot me ewe souasor mi lapalap a ngeni ewe pilawa fán iten asor, ewe ese mumutá me ren allúk án emén epwe mwéngé me lúkún chék ekkewe souasor me a mwéngé, me ekkóch a ngeni ekkewe mwán mi eti i?”
5 Mwirin a ereniir: “Ewe Néún aramas i Samolun ewe Sapat.”
6 Lón pwal eú sapat a tolong lón ewe sinakok me poputá le asukul. Nge emén mwán mi pe péúfichin péún a nóm ikena ie.
7 Ekkewe soumak me Farisi ra akkattolafichi Jises pwe repwe ppii iká epwe echikara emén lón ewe ránin Sapat, pwe ra kútta alen ar repwe tipimwáál ngeni.
8 Iwe nge, i a silei ar ekiek, iwe a ereni ewe mwán mi pe efóch péún: “Útá me feito lukanapan.” Iwe, a útá me útááló ikewe.
9 Mwirin, Jises a ereniir: “Úpwe eisinikemi ekkan mwán, Mi mumutá me ren ewe allúk pwe lón ewe Sapat sipwe féri féffér mi múrinné are efeiengaw, seláni eú manaw are angealó?”
10 Mwirin an attoler meinisin, a ereni ewe mwán: “Kopwe eitiewu poum.” A eitiewu, iwe péún we a échsefál.
11 Nge ra fen asonger, me ra poputá le fósfengen lefiler ussun minne ra tongeni fér ngeni Jises.
12 Lón eú me lein ekkena rán a feiló ngeni ewe chuuk pwe epwe iótek, me a áeá unusen eú pwiin le iótek ngeni Kot.
13 Iwe, atun a rániló a kérato néún kewe chón káé me a filaatá me leir 12, ekkewe a pwal eita ngeniir aposel:
14 Simon, ewe a pwal eita ngeni Piter, Andru pwiin we, Jemes, Jon, Filip, Partolomiu,
15 Mattu, Tomas, Jemes néún Alifios, Simon ewe mi iteni “ewe emén mi tinikken,”
16 Jutas néún Jemes we, me Jutas Iskariot, ewe a wiliiti chón afangemá.
17 Iwe, a etiir le feitiw me a útá wóón eú leeni mi sónósónéch, me a wor eú mwichemmóngun néún chón káé me eú wakkatteen mwichen aramas seni unusen Jutia me Jerusalem me seni ekkewe leeni órossetin Tair me Siton, ra feito pwe repwe aúseling ngeni me chikar seni ar kewe semmwen.
18 Pwal mwo chókkewe mi osukosuk ren ngún mi limengaw ra chikaretá.
19 Me meinisin ekkewe aramas ra achocho pwe repwe attapa i, pún ewe manaman a towu seni me echikarer meinisin.
20 Me a netáái néún kewe chón káé me poputá le apasa:
“Oupwe pwapwa ámi mi wéúngaw, pún mwúúmi ewe Mwúún Kot.
21 “Oupwe pwapwa ámi mi echik iei, pún oupwe mét.
“Oupwe pwapwa ámi mi kechiw iei, pún oupwe takir.
22 “Oupwe pwapwa lupwen aramas repwe oputakemi, me lupwen repwe atokemiiwu me leir me eitengawakemi me ésúfélúngawa* itemi ussun och mi fókkun ngaw pokiten ewe Néún aramas.
23 Oupwe chengel lón ena rán me mwetemwet fán pwapwa, pún nengeni! liiwinimi a watte me lón láng, pún ikkena ekkewe pwal chék mettóch semelaper kewe ra fen fér ngeni ekkewe soufós.
24 “Nge riáfféú ngenikemi mi pisekisek, pún a fen unus ámi kinamwe.
25 “Riáfféú ngenikemi ámi mi mét iei, pún oupwe echik.
“Riáfféú ngenikemi ámi mi takir iei, pún oupwe chúúpwúl me kechiw.
26 “Riáfféú ngenikemi lupwen aramas meinisin ra fós éch fán itemi, pún iei met semelaper kewe ra fér ngeni ekkewe soufós chofona.
27 “Nge úa erenikemi ámi mi rongorong: Oupwe sópweeló le tongei chón oput ámi, oupwe eáni féffér múrinné ngeni chókkewe mi oputakemi,
28 oupwe efeiéchú chókkewe mi anúmamawakemi, oupwe iótek fán iten chókkewe mi kirikiringaw ngenikemi.
29 Ren emén mi pésapei epek sapwom, ngeni pwal ewe epek, nge ren ewe mi angei úfom úféúfen lúkún, kosap pwal amwéchú seni i úfom úféúfen lón.
30 Kopwe ngeni iir meinisin mi tingoreek. Nge ren ewe emén mi angei sonuk mettóchum, kosap chúen eis ussur.
31 “Pwal och, met oua mochen aramas repwe féri ngenikemi, oupwe pwal féri ngeniir.
32 “Iká oua tongei chókkewe mi tongekemi, epwe met feiéchúmi? Pún ekkewe mwo chón tipis ra tongei chókkewe mi tongeer.
33 Me iká oua féffér múrinné ngeni chókkewe mi féffér múrinné ngenikemi, epwe met feiéchúmi? Pwal mwo ekkewe chón tipis ra pwal féri ena.
34 Pwal och, iká oua mutawu* och mettóch ngeni chókkewe oua ekieki pwe repwe méénisefáli, epwe met feiéchúmi? Pwal mwo ekkewe chón tipis ra mutawu och ngeni chón tipis pún repwe tongeni pwal angeisefáli ussun chék.
35 Nge ámi, oupwe sópweeló le tongei chón oput ámi me féffér múrinné me mutawu mettóch nge ousap ápilúkúlúkún angeisefáli och. Iwe, liiwinimi epwe lapalap, me oupwe néún ewe mi Unusen Tekia Seni Meinisin, pún i a kirekiréch ngeni iir kewe rese kilisou me mi fókkun ngaw.
36 Oupwe sópweeló ámi úméúméch, ussun chék Sememi we mi úméúméch.
37 “Pwal och, oupwe úkútiw le apwúngú ekkewe ekkóch, pwe Kot esap apwúngúkemi. Oupwe úkútiw le etipisi ekkewe ekkóch, pwe Kot esap etipisikemi. Oupwe okkomusaló* tipisin ekkewe ekkóch, pwe Kot epwe omusaaló* tipisimi.
38 Oupwe sópweeló le fangoló, me aramas repwe fang ngenikemi. Repwe ninatiw lón úfemi eú úkúúkún mi fókkun watte, pachei, anomwonomwa, me sasewu. Pún napanapemi* ngeni ekkewe ekkóch epwe pwal ina napanaper ngenikemi.”
39 Mwirin, a pwal ereniir eú kapas áwewe: “Emén mi chuun esap tongeni emmweni emén mi chuun, iká met? Iir me rúúemén repwe turulong lón eú pwaang, iká met?
40 Emén chón sukul* esap lap seni néún sense, nge emén mi unusen káit epwe ussun néún sense.
41 Iwe, pwata ka kúna ewe ekis pipiin fetil lón mesen pwiium we, nge kese kúna ewe kasso lón pwisin mesom?
42 Ifa ussun ka tongeni ereni pwiium, ‘Pwii, kopwe mut ngeniei ái úpwe uwawu ewe ekis pipiin fetil mi nóm lón mesom,’ nge pwisin en kese kúna ena kasso mi nóm lón pwisin mesom? En mi likótuputup! Kopwe akkomw uwawu ewe kasso seni pwisin lón mesom, mwirin ka tongeni kúnaéchú ifa ussun kopwe uwawu ewe ekis pipiin fetil mi nóm lón mesen pwiium we.
43 “Pún ese wor irá mi múrinné epwe uwaani uwa mi ngaw, me ese wor irá mi ngaw epwe uwaani uwa mi múrinné.
44 Pún iteiten irá, ra silleló ren uwaar kewe. Áwewe chék, aramas resap tongeni kini fiik are kreip seni irá félúfél.
45 Emén mwán mi múrinné a uwawu mettóch mi múrinné seni wéún mi múrinné me lón letipan, nge emén mwán mi ngaw a uwawu mettóch mi ngaw seni wéún mi ngaw, pún met mi nóm lón ewe letip a towu seni me lón awan.
46 “Iwe, pwata oua kér ngeniei ‘Samol! Samol!’ nge ouse féri ekkewe mettóch úa apasa?
47 Iteiten ié mi feito rei me rongorong ái keei kapas me fériir, úpwe áiti ngenikemi ié i a ussun.
48 I a ussun emén mwán lón an aúetá eú imw, a ttuetiw me alóllóólatiw me féri lóngólóngun wóón achaw. Ina minne, lupwen a watte pwu, ewe chénúpupu a pwuiti ena imw, nge ese mwékútúkút pokiten a múrinné kaúún.
49 Iwe nge, ié a rongorong me ese féri och a ussun emén mwán mi aúetá eú imw lón pwúl nge ese wor lóngólóngun. Ewe chénúpupu a pwuiti, me mwittir chék a tatiw, me talóón ena imw a fókkun watte.”
Footnote
^ Krik, “oturawu.”
^ Ena, ese wor manawan.
^ Are “epichaaló.”
^ Are “epichaaló.”
^ Are “ren ewe aúkúk oua aúkú ngeniir repwe pwal aúkú ngenikemi.”
^ Are “chón káé.”
