Me ren Luk 9:1-62
-
Án ekkewe Engol me Rúúemén angei éúréúrer le afalafal (1-6)
-
Erot a osukosuk pokiten Jises (7-9)
-
Jises a amwéngééni 5,000 (10-17)
-
Piter a apasa pwe Jises i ewe Kraist (18-20)
-
Jises a osuni ussun an máló (21, 22)
-
Minne emén epwe féri le tapweló mwirin Jises (23-27)
-
Án Jises wililó (28-36)
-
Chikaretáán emén át timon a wááni (37-43a)
-
Jises a osunisefál ussun an máló (43b-45)
-
Án ekkewe chón káé ánini wóón ié a lapalap (46-48)
-
Ié ese ú ngenikich i a álisikich (49, 50)
-
Chón eú sóópw lón Sameria rese etiwa Jises (51-56)
-
Ussun án emén tapweló mwirin Jises (57-62)
9 Mwirin, a kérfengeni ekkewe Engol me Rúúemén, iwe, a ngeniir manaman me nemenem wóón meinisin ekkewe timon me ar repwe echikara semmwen.
2 Iwe, a tiiniireló ar repwe afalafala ussun ewe Mwúún Kot, me echikara ekkewe mi semmwen,
3 me a ereniir: “Ousap uwou mettóch lón ámi sái, esap wok are pwotoun mwéngé are pilawa are moni,* esap pwal rúúaché úf.*
4 Nge ese lifilifil imw oua tolong lón, oupwe nónnóm ikena me ló me ikena.
5 Me ese lifilifil ian aramas rese etiwakemi me ie, atun oua towu seni ena telinimw, oupwe wichikaaló ewe pwúl wóón pechemi pwe epwe eú minen éúréúr ngeniir.”
6 Iwe, ra feiló ngeni ekkewe sóópw, afalafala ewe kapas allim me féri ewe angangen echikara ekis meinisin.
7 Iwe Erot,* ewe sounemenemen Kalili,* a rong meinisin ekkewe mettóch mi fis, me a fókkun osukosuk pokiten ekkóch ra apasa pwe Jon a manawetá seni máló,
8 nge ekkóch ra erá pwe i Elias, me pwal ekkóch, emén me lein ekkewe soufós lóóm a manawetá seni máló.
9 Erot a apasa: “Jon, úa úkúfi mékúran. Nge epwe ié ei chék úa rong ekkeei mettóch ussun?” Iwe, a fókkun mochen kúna i.
10 Lupwen ekkewe aposel ra liwin, ra apwóróusa ngeni Jises meinisin minne ra féri. Iwe, a uweiireló seni ekkewe aramas ngeni eú telinimw itan Petsaita.
11 Nge atun ekkewe aramas ra silei ussun, ra tapweló mwirin. Me i a etiwer fán kirekiréch me poputá le fós ngeniir ussun ewe Mwúún Kot, me a echikaraatá chókkewe mi semmwen.
12 Iwe, a fen lekuniololó. Ekkewe Engol me Rúúemén ra feito ren me ereni: “Kene tiinaaló ekkewe aramas, pwe repwe tongeni ló ngeni ekkewe sóópw me ekkewe leenien atake pwe repwe kúnékún ia repwe asésé ie me kamé ia mwéngé, pún ikeei ia sia nóm ie eú leeniapé.”
13 Nge a ereniir: “Oupwe ngeniir met repwe áni.” Ra apasa: “Ese wor met mi wor rech, pwe nifféú chék pilawa me rúúemén iik, lúkún chék iká áúpwe pwisin ló me kamé mwéngé fán iten meinisin ekkeei aramas.”
14 Ren enletin, a wor ina epwe 5,000 mwán. Nge a ereni néún kewe chón káé: “Oupwe ereniir repwe móttiw ákkánime lón eú kúmi.”
15 Iwe, ra féri iei ussun me ra amóótteretiw meinisin.
16 A angei ekkewe nifféú pilawa me ekkewe rúúemén iik, a sachchetá láng me iótekiir. Mwirin a kinikisiiretiw me poputá le ngeni ekkewe chón káé ar repwe isettiw mwen ekkewe aramas.
17 Iwe, iir meinisin ra mwéngé me métúló, me ra ionifengeni ekkewe lusun, 12 chúúk.
18 Mwirin, atun a iótek nge i chék, ekkewe chón káé ra feito ren me i a eisiniir: “Ié ekkewe aramas ra apasa pwe ngang?”
19 Lón ar pélúweni, ra apasa: “Jon Papatais, nge ekkóch ra apasa Elias, me pwal ekkóch ra apasa pwe emén me lein ekkewe soufós lóóm a manawetá seni máló.”
20 Iwe, a ereniir: “Nge ámi, ié oua erá pwe ngang?” Piter a pélúweni: “Ewe Kraist mi tiitiito me ren Kot.”
21 Iwe, lón an kapas tichik ngeniir, a allúkú ngeniir ar resap ereni emén ei,
22 nge a erá: “Ewe Néún aramas epwe kúna chómmóng riáfféú me esap ketiw me ren ekkewe néúwisin Jus me ekkewe souasor mi lap me ekkewe soumak. Me epwe ninniiló, iwe, lón ewe aúlúngátin rán epwe manawetá.”
23 Mwirin, a ereni meinisin: “Iká emén a mochen tapwoto mwiri, epwe pennúkú pwisin i me angei an iráán ninni* me mwárei rán me rán me tattapwoto mwiri.
24 Pún ié a mochen seláni manawan epwe péút seni, nge ié a péút seni manawan fán ásengesi, i ewe emén epwe seláni.
25 Epwe met múrinnéén iká emén aramas a eáni mettóch meinisin lón ei fénúfan, nge ren an eániir a kúna riáfféú are péút seni pwisin manawan?
26 Pún ié a sáwásiniei me ái kewe kapas, ewe Néún aramas epwe sáwásini ena aramas atun epwe feito lón lingan me lingen Seman we me lingen ekkewe chónláng mi pin.
27 Nge enlet úa erenikemi pwe mi wor ekkóch me lein chókkewe mi útá ikeei resap máló tori ar repwe akkomw kúna ewe Mwúún Kot.”
28 Ren enletin, ina epwe wanú rán mwirin an apasa ekkeei kapas, a angei Piter, Jon, me Jemes, me ra tétá wóón ewe chuuk pwe epwe iótek.
29 Nge atun a iótek, a siwil wówóón wóón mesan me úfan kewe ra mwolupolup ren pwechepwechan.
30 Me nengeni! rúúemén mwán ra apwóróus ngeni, ikkena iir Moses me Elias.
31 Ra pwááto lón ling me poputá le fósun an we epwele ló, ewe epwele pwénúetá me lón Jerusalem.
32 Iwe, Piter me chókkewe mi nóm ren ra chouchou ren ar méúr, nge lupwen ra unusen neló, ra kúna an ling me ekkewe rúúemén mwán mi úkkúútá ren.
33 Iwe, lupwen repwele ló seni, Piter a ereni Jises: “Sense, a éch ám ei nóm ikeei. Iwe áúpwe aúetá úlúngát tento, eú fán itom, eú fán iten Moses, me eú fán iten Elias.” I ese ekieki met ewe a apasa.
34 Nge atun an apasa ekkeei mettóch, eú kuchu a pwá me a poputá le échchúneroló. Atun ar ra tolong lón ewe kuchu, ra poputá le niwokkus.
35 Mwirin, eú méngúngú a towu seni lón ewe kuchu, a apasa: “Iei i nei Át, ewe emén mi kefilitá. Oupwe aúseling ngeni.”
36 Atun ra rong ewe méngúngú, ra kúna pwe a chék Jises. Nge rese fós me rese apwóróusa ngeni emén lón ekkena rán och ekkewe mettóch ra kúna.
37 Lón ewe rán mwirin, atun ra feitiw seni ewe chuuk, eú mwichemmóngun aramas a chuuri i.
38 Me nengeni! emén mwán a kékkéwu me lein ekkewe aramas, a apasa: “Sense, úa tingormaw ngonuk óm kopwe katol nei ei át, pwe i chék nei.
39 Me nengeni! emén ngún a turufi i, me mwittir chék a púchérútá, me a efisi an watteen chechchech* me pwuropwurowu me lón awan, me ese mochen towu seni pwal mwo nge mwirin an ekinása i.
40 Úa tingormaw ngeni noum kewe chón káé ar repwe asúoló, nge rese tongeni.”
41 Lón án Jises pélúweni, a apasa: “Ei táppin aramas ese wor ar lúkú me mi fókkun ngaw!* Tori ineet ái úpwe sópweeló le nóm remi me engiló ngenikemi? Kopwe wato noum na át ikeei.”
42 Nge pwal mwo nge atun ewe át a pwere ngeni, ewe timon a oturaaló lepwúl me efisi an watteen chechchech.* Iwe nge, Jises a apwúngú ewe ngún mi limengaw me echikaraatá ewe át me a ngenisefáli seman we.
43 Iwe, iir meinisin ra ingeló ren amwararen án Kot we manaman.
Atun iir meinisin ra mwaar ren meinisin ekkewe mettóch a féri, i a ereni néún kewe chón káé:
44 “Oupwe aúselingéch me chechchemeni ekkeei kapas, pún ewe Néún aramas epwe kúna afangemá me lepéún aramas.”
45 Nge rese weweiti minne a apasa. Ren enletin, a chék monoló seniir pwe resap tongeni weweiti, me ra niwokkus le kapas eis ngeni ussun ei kapas.
46 Iwe, a fis áninifengen lefiler ussun ié me leir a lapalap.
47 Pokiten Jises a silei ekiekin letiper, a angei emén semirit, a aútáái únúkkún,
48 me a ereniir: “Ié a etiwa ei semirit fán ásengesin itei a pwal etiwaei, me ié a etiwaei a pwal etiwa ewe Emén mi tiinieito. Pún ewe emén mi átekisossonatiw pwisin i me leimi meinisin, i ewe emén mi lapalap.”
49 Lón án Jon pélúweni, a apasa: “Sense, áúa kúna emén mi asúoló ekkewe timon ren an néúnéú itom, me áúa sótun le aúkatiw i pokiten i esap emén me leich.”
50 Nge Jises a ereni: “Ousap sótun aúkatiw i, pún ié ese ú ngenikemi, i a álisikemiitá.”
51 Lupwen a arapoto ewe fansoun án Jises epwele feitá láng, i ese mochen mut ngeni och mettóch epwe eppeti i seni an feiló ngeni Jerusalem.
52 Iwe, a tiinaaló chón kúné akkomw mwan. Me ra feiló me tolong lón eú sópwun chón Sameria pwe repwe ammólnatá fán itan.
53 Nge rese etiwa i, pún a tipeppós* an epwe feiló ngeni Jerusalem.
54 Lupwen ekkewe chón káé, Jemes me Jon ra kúna ei, ra apasa: “Samol, ka mochen ám áúpwe kératiw ekkei seni láng me arosereló?”
55 Nge a kul me apwúngúúr.
56 Ina minne, ra ló ngeni pwal eú sóópw.
57 Iwe, atun ar fetáleló wóón ewe al, emén a ereni: “Ngang úpwe tapweló mwirum ekis meinisin ia kopwe feiló ie.”
58 Nge Jises a ereni: “Ekkewe foks a wor pwangeer me ekkewe machchang fán láng a wor fáser, nge ewe Néún aramas ese wor ia epwe akoonaaló ie mékúran.”
59 Mwirin, a ereni pwal emén: “Kopwe tapwoto mwiri.” Ewe mwán a apasa: “Samol, mut ngeniei úpwe akkomw feiló me peiásini semei.”
60 Nge i a ereni: “Likiti ngeni ekkewe mi máló ar repwe peiásini ar kewe somá, nge en kopwe feiló me esilefeili ekis meinisin ewe Mwúún Kot.”
61 Pwal emén a apasa: “Samol úpwe tapweló mwirum nge mut ngeniei akkomw ái úpwe kapwongen emwirimwir ngeni chón leimwei.”
62 Jises a ereni: “Ese wor emén mi watá péún wóón efóch pisekin ttu pwúl me nengeni ekkewe mettóch lúkúsékúrún, epwe fich ngeni ewe Mwúún Kot.”
Footnote
^ Krik, “silifer.”
^ Are “pwal eché úf.”
^ Krik, “ewe titrark.”
^ Krik, “oturaaló ewe át lón wei.”
^ Are “tipefittek.”
^ Krik, “oturaaló ewe át lón wei.”
^ Krik, “mesan a nefótófót.”
