Me ren Mark 3:1-35
3 Jises a pwal tolong lón eú sinakok, me emén mwán mi pe efóch péún a nóm ikena ie.
2 Iwe, ra akkattolafichi pwe repwe ppii iká epwe echikara ewe mwán lón ewe ránin Sapat, pwe repwe tipimwáál ngeni.
3 A ereni ewe mwán mi pe efóch péún: “Útá me feito lukanapan.”
4 Mwirin a ereniir: “Mi mumutá me ren ewe allúk pwe lón ewe Sapat sipwe féri féffér mi múrinné are efeiengaw, seláni eú manaw are angealó?” Nge iir ra chék fanafaneló.
5 Mwirin an attoler fán song, a fókkun letipeta ren an ese wor memmeefin letiper, a ereni ewe mwán: “Kopwe eitiewu poum.” Me a eitiewu, iwe péún we a échsefál.
6 Iwe ren ena, ekkewe Farisi ra towu me mwittir poputá le pwúngúpwúngfengen me chiechien Erot kewe ussun ar repwe nieló i.
7 Nge Jises me néún kewe chón káé ra feiló órosset me eú mwichemmóngun aramas seni Kalili pwal seni Jutia ra tapweló mwirin.
8 Pwal mwo seni Jerusalem me seni Itumea me seni epek ewe Jortan me órun Tair me Siton, eú mwichemmóngun aramas ra feito ren lupwen ra rong ussun ekkewe chómmóng mettóch a féfféri.
9 Iwe, a ereni néún kewe chón káé ar repwe ammólnatá efóch kúkkún waa fán itan, pwe ewe mwichen aramas resap etieppach ngeni i.
10 Pokiten a fen echikara chómmóng, iwe meinisin chókkewe mi watte ar semmwen ra rongeeló pwe repwe attapa i.
11 Pwal mwo ekkewe ngún mi limengaw, iteiten repwe kúna i, ra chapetiw me mwan me kékké fán léúwommóng me apasa: “En ewe Néún Kot.”
12 Nge fán chómmóng i a fókkun allúkú ngeniir ar resap pwáári i.
13 A feitá wóón eú chuuk, iwe a kérato chókkewe i a mochen, me ra feito ren.
14 Iwe, a filaatá 12 mwán, me eita ngeni ei kúmi aposel, chókkewe repwe fiti i me epwe tiiniireló pwe repwe afalafal,
15 iwe, a pwal ngeniir ar manaman le asúoló ekkewe timon.
16 Iwe, ekkewe 12 aposel a filiretá, ikkeei iter, Simon ewe a pwal eita ngeni Piter,
17 Jemes néún Sepeti me Jon pwiin Jemes, (i a pwal eita ngeniir Poanerkes, weween “Néún Chopulap”),
18 Andru, Filip, Partolomiu, Mattu, Tomas, Jemes néún Alifios, Tatius, Simon ewe emén mi tinikken,
19 me Jutas Iskariot, ewe a afangemá i mwirin.
Iwe a tolong lón eú imw,
20 me ewe mwichen aramas ra pwal chufengen, ina minne rese mwo nge tongeni mwéngé.
21 Nge lupwen aramasan kewe ra rong ussun ei, ra feiló pwe repwe turufi i, pún ra erá: “A turu seni an ekiek.”
22 Pwal och, ekkewe soumak mi feitiw seni Jerusalem ra apasa: “Peelsepul* a nóm ren, me a atowu ekkewe timon ren álillisin ewe sounemenemen ekkewe timon.”
23 Iwe, mwirin an kériireto ren, a fós ngeniir lón kapas áwewe: “Ifa ussun Setan a tongeni asúoló Setan?
24 Iká eú mwú a tipefesen, ena mwú esap tongeni útá,
25 me iká eú imw a tipefesen, ena imw esap tongeni útá.
26 Pwal och, iká Setan a ú ngeni pwisin i me a kinikinfesen, iwe esap tongeni útá nge epwe ina muchúlóón.
27 Ren enletin, ese wor emén mi tolong lón imwen emén mwán mi péchékkúl a tongeni solááni pisekin kewe nge ese akkomw fééti ena mwán mi péchékkúl. Ina chék atun a tongeni solá lón imwan na.
28 Enlet úa erenikemi pwe mettóch meinisin epwe musoló seni aramas, ese lifilifil menni tipis ra féri me menni kapasen turunufas ra apasa.
29 Nge ié a eáni kapasen turunufas ngeni ngún mi fel* esap musoló tipisin tori feilfeiló, nge ewe tipis epwe chék nónnóm wóón tori feilfeiló.”
30 A erá ei pokiten ra apasa: “A wor ren emén ngún mi limengaw.”
31 Iwe, inan we me pwiin kewe ra feito me útá lúkún, ra tiinaalong emén an epwe kéri i.
32 Nge a wor eú mwichen aramas mi mómmóót ren, ra ereni: “Nengeni! Inom we me pwiium kewe ra nóm lúkún pwe ra eis en.”
33 Nge a pélúweniir: “Ié kana inei me pwii?”
34 Mwirin, a nengeni chókkewe mi mómmóót pwellin únúkkún me apasa: “Katol, inei me pwii kewe!
35 Ié a féri letipen Kot, ei emén, i pwii me fefinei me inei.”
