Me ren Mattu 21:1-46
-
Jises a tolong lón Jerusalem (1-11)
-
Jises a limeti ewe imwenfel (12-17)
-
Irá fiik a anúmamaw (18-22)
-
Ra eisini Jises iká ia a feito me ie an nemenem (23-27)
-
Kapas áwewe ussun ekkewe rúúemén naw (28-32)
-
Kapas áwewe ussun chón atake mi nimanaw (33-46)
-
Ra tunaaló ewe féún lepwokuku mi fókkun aúchea (42)
-
21 Lupwen ra arap ngeni Jerusalem me tori lón Petfake wóón ewe Chukun Olif, Jises a tiinaaló rúúemén chón káé,
2 a ereniir: “Oupwe feiló lón enan sóópw mi nóm mwemi, me oupwe mwittir kúna emén aas mi féfé me emén néún mi nóm ren. Oupwe epichiir me uweiireto rei.
3 Iká emén epwe apasa och ngenikemi, oupwe apasa, ‘Ewe Samol a erá áúpwe uwealó ren ekkeei aas.’ Iwe, epwe mwittir tiiniireto.”
4 Ei a wesewesen fis pwe epwe pwénútá minne Kot a fen apasa me ren ewe soufós, ewe a erá:
5 “Oupwe ereni ewe fefin néún Sion: ‘Nengeni! Noum we king a feito reom, a mosonoson me mómmóót wóón emén aas, ewer, wóón emén appanen aas, néún ewe ménún uwochou.’ ”
6 Iwe, ekkewe chón káé ra feiló me ra féri ussun chék met Jises a allúkú ngeniir.
7 Ra uwealó ewe aas me néún we, me ra watá úfer kewe úféúfen lúkún wóór me a móót wóór.*
8 Lap ngeni ekkewe aramas ra oletaaló úfer kewe úféúfen lúkún wóón ewe al, nge pwal ekkóch ra pékúpékútiw palen irá seni wóón ekkewe irá me oletiireló wóón ewe al.
9 Pwal och, ekkewe aramas mi akkomwoló mwan me chókkewe mi tapwoto mwirin i ra kan kékké fán léúwommóng: “Áúa iótek, amanawa ewe Néún Tafit! Mi feiéch ewe emén mi feito lón iten Jiowa!* Áúa iótek, en ewe mi nóm lón ewe leeni mi tekia, kopwe amanawa i!”
10 Iwe, atun a tolong lón Jerusalem, unusen chón ewe telinimw ra akúrang, ra apasa: “Ié ei?”
11 Ekkewe aramas ra akkapasa: “Iei i ewe soufós Jises, seni Nasaret lón Kalili!”
12 Jises a tolong lón ewe imwenfel me asúowu meinisin chókkewe mi amémé me kamé lón ewe imwenfel, me a nupeni ekkewe cheepel án ekkewe chón ekkesiwil moni me ekkewe leenien móót án ekkewe chón amémé lisom.
13 Me a ereniir: “A makketiw, ‘Imwei we epwe iteni eú imwen iótek,’ nge ámi oua féri pwe eú imwen chón solá.”
14 Pwal och, ekkewe aramas mi chuun me pechemá ra feito ren lón ewe imwenfel, me i a echikareretá.
15 Lupwen ekkewe souasor mi lap me soumak ra kúna ekkewe mettóch mi amwarar a féri me ekkewe át mi kékké fán léúwommóng me lón ewe imwenfel, “Áúa iótek, amanawa ewe Néún Tafit!” ra song
16 me apasa ngeni: “Kese rong met ra apasa?” Jises a ereniir: “Ewer. Ouse álleani ei, ‘Seni awen ekkewe semirit me pwal ekkewe ménúkol ra mwareituk’?”
17 Me a likitiireló, a feiló seni ewe telinimw ngeni Petani me a nómoló eú pwiin ikena.
18 Lupwen a liwiniti ewe telinimw lesossorusichin ewe rán, a meefi an echik.
19 A kúna efóch irá fiik ppen ewe al me a feiliiti, nge ese kúna och wóón lúkún chék chéén kewe, me a ereni: “Kosap chúen uwa feilfeiló.” Mwittir chék ewe irá fiik a pwáseló.
20 Lupwen ekkewe chón káé ra kúna ei, ra ingeló me apasa: “Ifa ussun enan irá fiik a mwittir pwáseló?”
21 Lón án Jises pélúweni a ereniir: “Enlet úa erenikemi, iká a wor ámi lúkú me ouse tipemwárámwár, ousap chék féri met úa féri ngeni ei irá fiik, nge ikáámwo oupwe pwal ereni ei chuuk, ‘Mwékút seni ei leeni me turulong lón ewe sáát,’ epwe fis.
22 Me mettóch meinisin oua tingor lón iótek, fiti lúkú, oupwe angei.”
23 Mwirin an tolong lón ewe imwenfel, ekkewe souasor mi lap me ekkewe néúwisin Jus ra feito ren atun a asukul, me apasa: “Fán menni nemenem ka féri ekkeei mettóch? Me ié a ngonuk ei nemenem?”
24 Lón án Jises pélúweni a ereniir: “Úpwe pwal eisinikemi och mettóch. Iká oupwe ereniei, iwe úpwe pwal erenikemi fán menni nemenem úa féri ekkeei mettóch.
25 Ewe papatais án Jon, a pop seni ia? Seni láng are seni aramas?” Nge ra poputá le pwóróusfengen lefiler me apasa: “Iká sipwe erá, ‘Seni láng,’ i epwe apasa ngenikich, ‘Pwata chék ouse lúkú i?’
26 Nge iká sipwe erá, ‘Seni aramas,’ sia niwokkusiti ei mwichen aramas pún iir meinisin ra ekieki pwe Jon emén soufós.”
27 Iwe, ra pélúweni Jises: “Ám áúse silei.” Iwe, a pwal ereniir: “Pwal ngang, úsapw pwal erenikemi fán menni nemenem úa féri ekkeei mettóch.
28 “Met ámi ekiek? Emén mwán mi wor rúúemén néún. A feiló ren ewe áeménún me ereni, ‘Nei, ikenái kopwe feiló angang lón ewe tánipiin kreip.’
29 Lón an pélúweni a erá, ‘Úsapw feiló,’ nge mwirin a meefi an niamam me a feiló.
30 A feiló ren ewe arúúeménún, me ereni pwal ussun we chék. Ei emén a pélúweni, ‘Semei, úpwe feiló,’ nge ese feiló.
31 Ié me lein ekkeei rúúemén a féri letipen seman?” Ra apasa: “Ewe áeménún.” Jises a ereniir: “Enlet úa erenikemi pwe ekkewe chón angei takises me ekkewe fin lisowu repwe akkomw mwemi lón ewe Mwúún Kot.
32 Pún Jon a feito remi me áiti ngenikemi ewe al mi pwúng, nge ámi ouse lúkú i. Iwe nge, ekkewe chón angei takises me ekkewe fin lisowu ra lúkú i, me pwal mwo nge atun oua kúna ei, ouse meefi niamam me mwirin pwe oupwe lúkú i.
33 “Oupwe rongorong pwal eú kapas áwewe: A wor emén mwán, emén soufénú, a fótuki eú tánipiin kreip me féri ttitin mi pwellieló me a ttuetiw eú leenien kata féún kreip lón fán iten fférún wain me aúetá eú imwen mmas. Mwirin a ngeni ekkewe chón atake ar repwe túmúnú* me a sáiló towaw.
34 Lupwen a tori ewe fansoun rásin kreip, a tiinaaló néún kewe chón angang ngeni ekkewe chón atake pwe repwe angei wisan me lón ekkewe féún irá ra kini.
35 Iwe nge, ekkewe chón atake ra angei néún kewe chón angang, emén ra awata, ewe emén ra nieló, ewe pwal emén ra mane ngeni faw.
36 A pwal tiinaaló ekkóch chón angang, ra chómmóng seni ekkewe akkomw, nge ra pwal fér ngeniir ussun we chék.
37 Sáingoon, a tiinaaló rer néún we át, me apasa, ‘Repwe súféliti nei ei mwán.’
38 Atun ekkewe chón atake ra kúna ewe naw, ra eráfengen lefiler, ‘Iei i ewe chón álemwir. Ou etto sipwe nieló me angei álemwirian!’
39 Iwe, ra turufi me oturawu lúkún ewe tánipiin kreip me nieló i.
40 Iwe, atun ewe minne an ewe tánipiin kreip a feito, met epwe féri ngeni ekkewe chón atake?”
41 Ra ereni: “Pokiten ra fókkun ngaw, epwe atoto watteen feiengaw wóór me ngeni* pwal ekkóch chón atake ewe tánipiin kreip, ekkewe repwe ngeni uwaan atun a tori fansoun kinikin.”
42 Jises a ereniir: “Ouse mwo álleani lón ekkewe Taropwe mi Pin, ‘Ewe faw ekkewe chón kaú ra péútaaló, iei a wiliiti eféú féún lepwokuku mi fókkun aúchea. Ei a feito seni Jiowa,* me a fókkun amwarar me mwen mesach’?
43 Iei popun úa erenikemi, Kot epwe angei senikemi Mwúún we me ngeni eú mwú epwe awora uwaan.
44 Pwal och, ewe emén epwe turuló wóón ei faw epwe tatakkis. Nge ren ewe emén ewe faw epwe turuiti, epwe apachchacha i.”
45 Lupwen ekkewe souasor mi lap me ekkewe Farisi ra rong an kewe kapas áwewe, ra silei pwe a fósur.
46 Inaamwo iká ra mochen turufi* i, nge ra niwokkusiti ekkewe aramas pún me rer i emén soufós.
Footnote
^ A ffat, “wóór” a weneiti ekkewe úféúfen lúkún.
^ Krik, “lease ngeni ekkewe chón atake.”
^ Krik, “lease ngeni pwal ekkóch chón atake.”
^ Are “aresini.”
