KAPAS EIS 1
Ngang Met Sókkun Aramas?
MET KOPWE FÉRI?
Anchangei mwo ei: Karen a chék kerán war lón eú pari, nge mwirin 10 minich a rong méngúngúún emén mi sissilei.
“Pwata ka chék úkkúútá ikena o?”
Karen a nesefál nge a kúna chienan we Jessica a kamwéch ruuofóch rume. A silei pwe sakaw ekkena. Jessica a eit ngeni Karen efóch me apasa: “Esap chúen ii en emén semirit, kopwe chék pwapwa, ika met?”
Karen a mochen an esap angei nge pokiten Jessica i chiechian, iwe Karen ese mochen pwe chienan na epwe ekieki pwe a soun atai ar pwapwa. Pwal och, Jessica i emén me lein ekkewe nengngin mi múrinné. Iwe, ika a ún sakaw, weween ese wor ngawan. Karen a ereni pwisin i: ‘Efóch chék ii, saminne drugs me.’
Ika en Karen, met kopwe féri?
KAÚLÓ ME EKIEKI!
Ren óm kopwe féri eú kefil mi múrinné lón ena mettóch, mi lamot kopwe silei ika en met sókkun aramas, silei masouen alóllóólun letipom me met ka fókkun lúkú. Pokiten ka fen pwisin silei usum, weween pwe ka tufichin nemenemenuk nge kese mut ngeni ekkewe ekkóch ar repwe nemenuk.—1 Korint 9:26, 27.
Ifa usun ka tongeni ámááraatá ena sókkun tufich mi múrinné? Ka tongeni poputá ren óm pélúweni ekkeei kapas eis mwirin.
1 IKKEFA NAPANAPEI KEWE MI ÉCH?
Óm silei tufichum me napanapom kewe mi múrinné repwe alapaaló óm lúkúlúkuk.
LEENIEN ÁPPIRÚ SENI PAIPEL: Aposel Paulus a makkeei: “Inamwo ika ngang üsap angangöch le kapas, nge a fokun alolol ai silelap.” (2 Korint 11:6) Pokiten Paulus a fókkun sileéchú ewe Paipel, a tongeni úppós atun ekkóch ra ú ngeni. Ese mut ngeni ar kapas mi mwáál epwe apwangapwangaaló an pwisin lúkúlúkú.—2 Korint 10:10; 11:5.
PWISIN ETITTINOK: Kopwe makkeetiw eú mettóch ka sipeéch lón.
Áwewetiw eú napanapom mi múrinné ka pwáppwári. (Áwewe chék, ka kan chúngú aramas? fangafangéch? aramas ra kan lúkúlúk wóóm? ka kan warekkái?)
2 IKKEFA NAPANAPEI KEWE RESE ÉCH?
Usun chék efóch sein mi apwangapwang me le kaféún, a tongeni atomwafeseni unusen ewe sein, iwe a pwal tongeni mwittir apwangapwang minne ka aúcheani me minne ka lúkú, ika ka mut ngeni napanapom kewe rese éch repwe nemenuk.
LEENIEN ÁPPIRÚ SENI PAIPEL: Paulus a silei napanapan kewe rese éch. Iei met a makkeei: “Pun seni lon letipei üa pwapwaiti än Kot allük. Nge üa küna pwal eu allük a angang lon inisi, eu allük mi fiu ngeni ewe allük letipei a tipeeu ngeni, o a fötekiniei fän ewe allükün tipis.”—Rom 7:22, 23.
PWISIN ETITTINOK: Ikkefa óm kewe apwangapwang mi lamot kopwe káé le nemeniir?
3 MET UPWE ACHOCHO LE TIKERI?
Itá kopwe fiti efóch taxi me ereni ewe chón únteng an epwe chék rokopwáli ewe leeni tori a pé káás? Kopwe umwes ika ka féri ena me a asolapa moni!
Ifa ewe lesen? Ika ka isetiw mwom met kopwe achocho le tikeri, iwe epwe túmúnuk pwe kosap chék rokopwál fetál. Iwe epwe ffat ngonuk met kopwe féri lón manawom.
LEENIEN ÁPPIRÚ SENI PAIPEL: Paulus a makkeei: “Iei popun üa sä wenechar ngeni ewe tepkiri.” (1 Korint 9:26) Paulus a isetiw mwan met epwe achocho le tikeri me apwénúretá nge ese chék páipáifeil lón manawan.—Filipi 3:12-14.
PWISIN ETITTINOK: Makkeetiw úlúngát mettóch kopwe achocho le tikeri lón chék ekkan maram.
4 MET UA FÓKKUN LÚKÚ?
Ika ka úppós le fitipachei minne ka aúcheani me minne ka lúkú, kopwe usun efóch irá mi fókkun péchékkúl waran ese tongeni úttútá atun mélúmél
Ika ese wor met ka fókkun lúkú, iwe kopwe chék tiperúerú. Kopwe siwili anúwóm pwe kopwe taitap ngeni chienom kewe, usun chék emén nipach mi sissiwilikkis anúwan. Ina esissillen an ese núk óm lúkú.
Nge ika óm kewe féffér ra lóngólóng wóón minne ka fókkun lúkú, iwe kopwe féri met letipom a amwékútuk le féri ese lifilifil met ekkóch ra féri.
LEENIEN ÁPPIRÚ SENI PAIPEL: Atun ewe soufós Taniel neman a emén teenage, a “amolätä letipan” pwe epwe álleasochisi án Kot kewe allúk inaamwo ika a imu seni an famili. (Taniel 1:8) Ren an féri ena, ese riki seni pwisin an lúkú. Taniel a chék fitipachei met a lúkú seni lón letipan pwe mi pwúng.
PWISIN ETITTINOK: Met ka fókkun lúkú? Áwewe chék: Ka lúkú Kot? Ika ina, iwe pwata? Ifa ewe pisekin ánnet mi ánneta ngonuk pwe mi wor Kot?
Ka lúkú pwe án Kot kewe allúk usun minne mi pwúng me minne mi mwáál a kawor fán iten feiéchum? Ika ina, iwe pwata?
Ka mochen usun eché chéén irá mi pwás mi chék áás fetál ren enienin ekis ásepwál, are usun efóch irá ese úttútá atun mélúmél? Apéchékkúla met ka aúcheani me minne ka lúkú, iwe kopwe usun ena efóch irá. Me ina met epwe atufichuk le pélúweni ei kapas eis, Ngang met sókkun aramas?
