Dapre Matye 4:1-25
4 Answit, lespri sen ti anmenn Zezi dan dezer e laba Dyab ti pe al tant li.
2 Apre ki i pa ti’n manze pour 40 zour ek 40 lannwit, Zezi ti lafen.
3 Dyab ti vin tant li: “Si ou en garson Bondye, dir sa bann ros vin dipen.”
4 Me Zezi ti reponn: “I’n ganny ekrir: ‘Zonm pa devret viv zis lo dipen tousel me lo tou parol ki sorti dan labous Zeova.’”*
5 Apre Dyab ti anmenn li dan lavil sen anler lo miray* tanp
6 e i ti dir li: “Si ou en garson Bondye, sot anba, parski i’n ganny ekrir: ‘I pou donn lord son bann lanz pour tyonbo ou pour ki ou pa tap ou lipye avek en ros.’”
7 Zezi ti dir li: “I’n osi ganny ekrir: ‘Ou pa devret teste Zeova* ou Bondye.’”
8 Apre sa, Dyab ti anmenn li lo en montanny vreman o, i ti montre li tou bann rwayonm dan sa lemonn e zot laglwar.
9 I ti dir li: “Tousala mon pou donn ou si ou azenou devan mwan e ador* mwan.”
10 Alor Zezi ti dir li: “Sorti la ale Satan! Parski i’n ganny ekrir: ‘Se Zeova* ou Bondye ki ou devret adore e zis li tousel ki ou devret servi.’”*
11 Dyab ti kit li e la bann lanz ti vini e zot ti konmans pran swen avek li.
12 Ler Zezi ti tande ki Zan ti’n ganny arete, i ti kit sa landrwa pour al Galile.
13 Deplis, apre ki i ti’n kit Nazaret, i ti al reste Kapernaoum o bor lanmer dan distrik Zeboulonn ek Naftali.
14 Sa ti akonpli sa ki ti’n ganny dir atraver profet Izai:
15 “Galile kot bann etranze i reste, pei Zeboulonn ek Naftali, dan semen ki al ver lanmer, lot kote Zourden!
16 Bann dimoun ki ti pe asiz dan fernwanr ti vwar en gran lalimyer e lalimyer ti kler lo bann ki ti pe asiz dan lonbraz lanmor.”
17 Apartir sa moman, Zezi ti konmans prese: “Repantir parski Rwayonm lesyel in aprose.”
18 Ler Zezi ti pe marse o bor Lanmer Galile, i ti vwar de frer, Simon ki ti osi apel Pyer ek son frer Andre. Zot ti pe anvoy en lasenn dan lanmer parski zot ti peser.
19 Zezi ti dir zot: “Swiv mwan e mon pou fer zot lapes dimoun.”*
20 Deswit zot ti kit zot lasenn e swiv li.
21 Ler i ti ariv en pti pe pli lwen, Zezi ti vwar de lezot frer, Zak garson Zebede ek son frer Zan dan en kannot avek zot papa Zebede pe repar zot lasenn e Zezi ti apel zot.
22 Deswit zot ti kit zot kannot ek zot papa e swiv li.
23 Apre Zezi ti al partou dan Galile, i ti ansennyen dan bann sinagog e pres sa bon nouvel Rwayonm e i ti geri dimoun ki ti annan tou sort kalite maladi ek tou sort problenm lasante.
24 Sa nouvel ti fann partou atraver Siri.* Zot ti anmenn kot li tou dimoun ki ti pe soufer avek diferan kalite maladi ek douler, bann ki ti posede par demon, bann ki ti ganny bebelouka, bann ki ti paralize e i ti geri zot tou.
25 Alor, bann gran lafoul ti swiv li sorti Galile, Dekapol,* Zerizalenm, Zide ek lot kote Zourden.
Bann not
^ Vwar Leksplikasyon bann mo.
^ Oubyen “balistrad, landrwa pli o.”
^ Vwar Leksplikasyon bann mo.
^ Literalman, “ador mwan en fwa.”
^ Vwar Leksplikasyon bann mo.
^ Oubyen “ofer en servis sakre.”
^ Oubyen “zonm.”
^ Konmela Syria an Angle. Vwar Leksplikasyon bann mo.
^ Oubyen “rezyon kot i ti annan dis lavil.”
