Zenez 13:1-18
13 Apre sa, Abram ti kit Lezip pour al Negeb ansanm avek son madanm e tou sa ki i ti annan e Lot ti avek zot.
2 Abram ti byen ris, i ti annan en kantite zannimo, larzan* ek lor.
3 Anmezir ki i ti sorti Negeb pour al ver Betel, i ti kanpe dan diferan landrwa ziska ki i ti ariv dan sa menm landrwa kot i ti’n deza reste ant Betel ek Ay.
4 Sa ti menm landrwa kot i ti’n konstri en lotel. Laba, Abram ti loue* non Zeova.
5 Lot ki ti pe vwayaz avek Abram ti osi annan bann mouton, bef ek latant.
6 Sa landrwa pa ti ase gran pour zot tou reste ansanm vi ki zot ti annan en kantite zannimo.
7 Alor en dispit ti leve ant bann gardyen troupo Abram ek bann gardyen troupo Lot. (Sa letan, bann Kananeen ek Perizit ti pe reste dan sa pei.)
8 Alor Abram ti dir Lot: “Silvouple, nou pa devret dispit avek kanmarad, ni mon bann gardyen troupo ek ou bann gardyen troupo, parski nou de nou fanmir.
9 Ou kapab swazir nenport landrwa kot ou anvi reste dan sa pei. Silvouple, annou separe. Si ou al a gos, mwan mon pou al a drwat, me si ou al a drwat, mwan mon pou al a gos.”
10 Alor Lot ti get otour li e i ti vwar ki vale Zourden* ziska Zoar ti en landrwa kot i ti annan bokou delo (avan ki Zeova ti detri Sodonm ek Gomor). I ti parey zarden Zeova e parey pei Lezip.
11 Apre, Lot ti swazir vale Zourden e i ti al reste dan les pei. Alor zot ti separe avek kanmarad.
12 Abram ti reste dan pei Kanaan, me Lot ti reste o bor bann lavil dan vale Zourden. Finalman, Lot ti mont son latant o bor Sodonm.
13 Me dimoun Sodonm ti bann move dimoun e zot ti fer bann pese grav kont Zeova.
14 Apre ki Lot ti’n separe avek Abram, Zeova ti dir Abram: “Silvouple, get otour ou, get dan nor, dan sid, dan les e dan was,
15 parski tou sa pei ki ou vwar, mon pou donn ou e i pou vin* pour ou ek ou desandans.
16 Zis parey personn pa kapab kont lapousyer, mon pou fer ou desandans vin en kantite parey lapousyer lo later ki personn pa kapab konte.
17 Leve, al partou dan sa pei* parski mon pou donn ou sa pei.”
18 Alor Abram ti kontinyen reste anba latant. Pli tar, i ti al reste o bor bann gran pye dibwa Mamre ki Ebronn e laba i ti konstri en lotel pour Zeova.
Bann not
^ Larzan, sa metal.
^ Literalman, “kriy lo.”
^ Sa pe refer avek sa rezyon ki pli dan sid dan vale Zourden ziska Zoar.
^ Oubyen “vin en propriyete permanan.”
^ Oubyen “travers sa pei dan son longer ek son larzer.”
