LESON 7
Kisisa Rwayonm Bondye?
1. Kisisa Rwayonm Bondye?
Kwa ki fer Zezi en Lerwa ideal?—MARK 1:40-42.
Rwayonm Bondye i en gouvernman dan lesyel. I pou ranplas tou bann gouvernman lo later e i pou akonpli lavolonte Bondye lo later e dan lesyel. Sa nouvel lo Rwayonm i enn ki bon. Byento Rwayonm Bondye pou donn limanite sa ki i bezwen, setadir en bon gouvernman. I pou ini tou bann dimoun ki viv lo later.—Lir Danyel 2:44; Matye 6:9, 10; 24:14.
En rwayonm i bezwen annan en lerwa. Zeova in apwent son Garson, Zezi Kri, pour vin Lerwa dan Son Rwayonm.—Lir Revelasyon 11:15.
Get sa video Kisisa Rwayonm Bondye?
2. Akoz Zezi i sa Lerwa ideal?
Garson Bondye i sa Lerwa ideal akoz i bon e i ferm pour sa ki drwat. (Matye 11:28-30) I osi annan ase pouvwar pour ed bann dimoun akoz i pou dan lesyel pour diriz later. Apre son rezireksyon, i ti mont dan lesyel e espere dan kote drwat son Papa. (Ebre 10:12, 13) Finalman, Bondye ti donn li pouvwar pour konmans dirize dan Rwayonm.—Lir Danyel 7:13, 14.
3. Lekel ki pou diriz avek Zezi?
En group ki ganny apele en “pep sen” pou diriz ansanm avek Zezi dan lesyel. (Danyel 7:27) Bann zapot fidel Zezi ti premye parmi sa bann sen. Ziska konmela, Zeova pe kontinyen swazir bann zonm ek fanm fidel pour form parti sa group. Parey Zezi, zot pou ganny resisite avek en lekor spirityel.—Lir Zan 14:1-3; 1 Korentyen 15:42-44.
Konbyen dimoun ki pou al dan lesyel? Zezi ti apel zot en “pti troupo.” (Lik 12:32) An tou, i pou annan 144,000 zot. Ansanm avek Zezi, zot pou diriz lo later.—Lir Revelasyon 14:1.
4. Ki ti arive ler Zezi ti konmans dirize?
Zezi ti konmans dirize dan Rwayonm Bondye an 1914. a Premye keksoz ki Zezi ti fer ler i ti vin Lerwa se pous Satan ek son bann demon lo later. Satan ti konmans tir son lakoler lo bann zabitan later. (Revelasyon 12:7-10, 12) Depi sa letan, bann problenm limanite in agrave. Lager, lafanmin, bann maladi ek tranblemandter i form parti sa “siny” ki endike ki byento Rwayonm Bondye pou pran kontrol total lo later.—Lir Lik 21:7, 10, 11, 31.
5. Ki Rwayonm Bondye pou akonpli?
Atraver sa travay predikasyon lo later antye, Rwayonm Bondye pe ini ansanm en gran lafoul dimoun sorti dan tou nasyon. Plizyer milyon dimoun senser pe aksepte pour vin sitwayen Rwayonm Bondye. Gras a Rwayonm Bondye, zot pou ganny proteze ler bann move dimoun pou ganny detrir. Alor, tou sa bann ki oule benefisye avek dominasyon Rwayonm Bondye i devret aprann konman pour vin bann sitwayen obeisan.—Lir Revelasyon 7:9, 14, 16, 17.
Pandan 1,000 an, sa Rwayonm pou akonpli plan ki Bondye ti annan pour limanite o konmansman. Later antye pou vin en paradi. Finalman, Zezi pou remet Rwayonm dan lanmen son Papa. (1 Korentyen 15:24-26) Eski ou konn en dimoun ki ou ti a kontan koz avek lo Rwayonm Bondye?—Lir Psonm 37:10, 11, 29, NWT.
a Pour plis lenformasyon lo ki mannyer profesi Labib ti predir sa dat 1914, vwar paz 217-220 dan liv Ki Labib i dir?
