Zeova i ekspekte nou pour “kontan fidelite.” (Mika 6:8) Sa i vreman enportan dan ou maryaz akoz san fidelite pou napa konfyans. Konfyans i esansyel pour ki lanmour i fleri.

Ozordi fidelite pe diminyen dan maryaz. Pour protez ou maryaz, ou devret determinen pour fer de keksoz.

KI LABIB I DIR: “Verifye sa ki pli enportan.” (Filipyen 1:10, NW) Ou maryaz i enn parmi bann keksoz pli enportan dan ou lavi. I merit vin en priyorite.

Zeova i anvi ou konsantre lo ou konzwen e “rezouir lavi” ansanm. (Eklezyast 9:9) I pa oule ou negliz ou konzwen, me plito zot tou le de zot devret rod fason pour fer kanmarad kontan. (1 Korentyen 10:24) Fer ou konzwen santi ki ou bezwen li e apresye li.

KI OU KAPAB FER:

• Fer sir ki ou regilyerman pas letan avek kanmarad e donn kanmarad tou ou latansyon

• Mazin “nou” olye “mwan”

KI LABIB I DIR: “En dimoun ki get madanm en lot zonm avek dezir in deza komet adilter avek li dan son leker.” (Matye 5:28) Si en dimoun pe kontinyelman mazin lo bann keksoz imoral, dan en sans, i pa pe fidel avek son konzwen.

Zeova i dir ki ou devret “protez ou leker.” (Proverb 4:23; Zeremi 17:9) Pour fer sa, ou devret protez ou lizye. (Matye 5:29, 30) Swiv legzanp Zob ki ti fer en lalyans avek son lizye pour pa get en lot madanm avek dezir. (Zob 31:1) Determinen pour pa zanmen get pornografi e evite annan okenn santiman romantik pour en dimoun ki pa ou konzwen.

KI OU KAPAB FER:

• Fer tou dimoun vwar ki ou tou pour ou konzwen

• Pran an konsiderasyon santiman ou konzwen e deswit aret okenn relasyon ki fer ou konzwen enkonfortab