1-3. Akoz zapot Pol in vin Korent e ki bann defi i ti gannyen?

 LANNEN 50 i pros pour fini. Zapot Pol i Korent, en lavil ki ris e enportan pour fer komers. I annan en kantite Grek, Romen ek Zwif ki reste laba. a Pol pa’n vin la pour aste keksoz oubyen vann keksoz oubyen pour rod en travay. I’n vin Korent pour en rezon pli enportan e sa i pour rann temwannyaz lo Rwayonm Bondye. Kantmenm sa, Pol i bezwen en landrwa reste e i pa anvi ki lezot i santi zot oblize pour depans larzan akoz li. I pa anvi ki personn i krwar ki zot bezwen siport li akoz i pe fer sa travay predikasyon. Alor, ki i pou fer?

² Pol i annan en metye, i konn fer latant. I pa fasil pour fer latant me i pare pour fer bann travay avek son lanmen pour siport son lekor. Eski i pou ganny travay dan sa lavil kot dimoun i byen okipe? Eski i pou trouv en bon landrwa reste? Malgre sa bann defi, Pol i kontinyen konsantre lo sa travay pli enportan, setadir predikasyon.

³ Finalman, Pol ti reste Korent pour en pe letan e i ti ganny bann bon rezilta dan son travay predikasyon. Ki nou kapab aprann avek sa ki Pol ti fer Korent ki pou ed nou rann temwannyaz afon lo Rwayonm Bondye dan nou teritwar?

4, 5. (a) Kote Pol ti reste ler i ti Korent e ki travay i ti fer? (b) Ki mannyer Pol ti konmans fer latant?

⁴ En pe letan apre ki Pol ti’n ariv Korent, i ti zwenn en Zwif ki ti apel Akila ek son madanm Prisil oubyen Priska. Sa koup ti demontre lospitalite. Zot ti vin reste Korent akoz Lanperer Klod ti donn lord “tou bann Zwif pour kit Ronm.” (Akt 18:1, 2) Akila ek Prisil pa ti envit Pol zis pour reste kot zot me osi pour travay avek zot. Labib i dir: “Lefet ki i ti fer menm metye, Pol ti reste kot zot e travay avek zot parski zot osi zot ti fer latant.” (Akt 18:3) Lakour sa koup ki ti demontre labonte ek lospitalite  ti vin landrwa reste Pol pandan ki i ti fer son travay predikasyon dan lavil Korent. Pandan ki Pol ti pe reste avek Akila ek Prisil, i kapab ki i ti ekri detrwa let ki pli tar ti form parti Labib. b

⁵ Ki mannyer Pol, en zonm ki “Gamalyel” ti ansennyen, ti osi fer latant? (Akt 22:3) I paret ki bann Zwif dan premye syek pa ti onte pour ansenny zot zanfan en metye, menm si sa bann zanfan ti pe fer lezot letid. Vi ki Pol ti’n grandi dan lavil Tars, Silisi, ki ti en landrwa ki ti renonmen pour en kalite latwal ki ti apel cilicium ki ti ganny servi pour fer latant avek, i paret ki Pol ti aprann sa metye depi ki i ti ankor zenn. Kwa ki ti enplike dan fer latant? I kapab ki zot ti bezwen fer sa latwal oubyen koup sa latwal e apre koud sa latwal ki ti red e epe pour zot kapab fer latant. An tou ka, i ti en travay difisil.

6, 7. (a) Ki mannyer Pol ti konsider fer latant e kwa ki montre ki Akila ek Prisil ti annan menm pwennvi? (b) Ki mannyer bann Kretyen ozordi i swiv legzanp Pol, Akila ek Prisil?

⁶ Pol pa ti konsider sa travay fer latant konman sa travay pli enportan pour li. I ti fer sa metye zis pour siport son lekor pour li kapab anons sa bon nouvel “gratwitman.” (2 Kor. 11:7) Ki mannyer Akila ek Prisil ti konsider zot metye? Konman bann Kretyen, zot ti annan menm pwennvi lo travay parey Pol. Anfet, ler Pol ti kit Korent dan lannen 52, Akila ek Prisil ti al Efez ansanm avek Pol e sa kongregasyon laba ti abitye zwenn ansanm kot zot lakour. (1 Kor. 16:19) Pli tar, zot ti retourn Ronm e apre zot ti retourn Efez. Sa koup ki ti vreman devoue ti met Rwayonm premye e zot ti pare pour fer tou sa  ki zot kapab pour ed lezot. Sanmenm sa “tou bann kongregasyon kot i annan dimoun lezot nasyon” ti apresye zot.​—Rom. 16:3-5; 2 Tim. 4:19.

⁷ Ozordi, bann Kretyen i swiv legzanp Pol, Akila ek Prisil. Bann predikater devoue i travay dir pour “pa met fardo lo” lezot. (1 Tesa. 2:9) En kantite serviter a plen tan i travay a mitan oubyen pandan serten mwan dan lannen pour siport zot lekor pour zot kapab fer sa travay ki pli enportan pour zot e sa i sa travay predikasyon. Parey Akila ek Prisil, bokou serviter Zeova i demontre lospitalite par resevwar bann sirveyan rezyonal kot zot. Bann frer ek ser ki “annan labitid pour demontre lospitalite” zot konnen ki mannyer sa i kapab ankouraz e fortifye zot.​—Rom. 12:13.

8, 9. Ki Pol ti fer ler bann Zwif ti opoz li apre ki i ti’n pas tou son letan rann temwannyaz avek zot e kote i ti al prese apre?

⁸ Ler Silas ek Timote ti sorti Masedwann e vin kot Pol avek en kantite kado, i ti kler ki Pol ti konsider son metye konman en fason ki ti ed li kontinyen fer sa travay predikasyon. (2 Kor. 11:9) Deswit, Pol “ti konmans pas tou son letan pe anons parol Bondye [“konsakre tou son letan pour pres Laparol,” BSK].” (Akt 18:5) Me apre ki Pol ti’n konmans pas tou son letan pe rann temwannyaz avek bann Zwif, zot ti konmans opoz li en kantite. Pol ti dir zot ki i pa responsab si zot pa ti oule aksepte sa mesaz konsernan Kris ki sov lavi, alor Pol ti sekwe son lenz e dir sa bann Zwif ki ti pe opoz li: “Zot pou responsab pour zot prop lanmor. Mwan mon pa responsab. Konmansman ozordi mon pou al kot dimoun lezot nasyon.”​—Akt 18:6; Ezek. 3:18, 19.

⁹ Kote Pol ti pou prese aprezan? En zonm ki ti apel Titis Zistis, ki petet ti’n konverti dan larelizyon Zwif, ti les Pol servi son lakaz ki ti o bor sinagog. Alor Pol ti sorti dan sinagog e i ti al dan lakaz Zistis. (Akt 18:7) Pol ti kontinyen reste kot Akila ek Prisil ler i ti dan lavil Korent me i ti servi lakaz Zistis pour li kontinyen prese.

10. Kwa ki montre ki Pol pa ti anvi pres zis avek bann dimoun lezot nasyon?

¹⁰ Ler Pol ti dir ki i ti pou konmans al kot dimoun lezot nasyon, eski sa ti vedir ki i ti pou nepli enterese avek bann Zwif ek bann dimoun ki ti’n konverti dan larelizyon Zwif, menm bann ki’n montre lentere? Non, pa sa ki ti arive. Par egzanp, “Krispis, zofisye sinagog ek tou dimoun dan son lakour ti krwar dan Senyer.” I kler ki en kantite dimoun ki ti abitye al kot sinagog ti fer parey Krispis, parski Labib i dir sa: “Bokou Korentyen ki ti osi tann sa bon nouvel ti konmans krwar e ganny batize.” (Akt 18:8) Alor, lakaz Titis Zistis ti vin sa landrwa kot sa kongregasyon Kretyen ki ti’n fek ganny formen dan lavil Korent ti zwenn ansanm. Si sa resi dan liv Akt in ganny ekrir dan menm fason ki Lik i abitye ekrir, setadir dan lord kronolozik, sa i vedir ki bann Zwif ek bann dimoun ki ti’n konverti dan larelizyon Zwif ti vin Kretyen apre ki Pol ti sekwe son lenz. Sa i montre ki zapot Pol ti pare pour adapte avek diferan sityasyon.

11. Ki mannyer bann Temwen Zeova ozordi i fer parey Pol ler zot pres avek bann dimoun ki dan bann larelizyon ki swadizan Kretyen?

¹¹ Ozordi, i annan bann larelizyon ki swadizan Kretyen dan en kantite pei ki annan en gran lenfliyans lo zot bann dimoun. Dan plizyer landrwa dan lemonn, bann misyonner sa bann larelizyon ki swadizan Kretyen in konverti en kantite dimoun dan zot larelizyon. Souvan, bann dimoun ki dir zot Kretyen pe zis swiv bann tradisyon, parey bann Zwif Korent dan premye syek ti fer. Me kantmenm sa, parey Pol,  konman bann Temwen Zeova nou fer tou sa ki nou kapab pour ed sa bann dimoun konpran pli byen sa ki Labib i dir. Menm si zot opoz nou oubyen zot bann sef relizye i persekit nou, nou pa perdi lespwar. Parmi bann dimoun ki “annan devouman pour Bondye me pa dapre konnesans egzakt,” i kapab annan en kantite dimoun ki annan limilite ki nou bezwen rode e trouv zot.​—Rom. 10:2.

12. Ki lasirans Pol ti gannyen dan en vizyon?

¹² Si Pol ti annan okenn dout konsernan si i pou kontinyen pres dan lavil Korent, sa ki Zezi ti fer apre ti bezwen ed li. En zour swar, Zezi ti aparet avek li dan en vizyon e i ti dir li: “Pa bezwen per, me kontinyen koze e pa reste trankil parski mon avek ou e personn pa pou fer ou dimal. Mon annan bokou dimoun dan sa lavil.” (Akt 18:9, 10) Sa vizyon ti ankouraz Pol! Zezi ti asir Pol ki personn pa ti pou fer li dimal e ki i ti annan en kantite dimoun ki ti merit ganny sove dan sa lavil. Ki Pol ti fer ler i ti ganny sa vizyon? Labib i dir: “I ti reste laba pour enn an edmi pe ansenny parol Bondye avek zot.”​—Akt 18:11.

13. Ki Pol ti kapab pe mazinen anmezir ki i ti vin pli pros avek sa tribinal me akoz i ti konnen ki nanryen pa ti pou arive avek li?

¹³ Apre ki Pol ti’n reste Korent pour apepre enn an, i ti ganny en lot laprev ki Senyer ti pe ed li. “Bann Zwif ti fer en konplo pour atak Pol e zot ti anmenn li kot tribinal pour li ganny zize.” Sa tribinal ti apel beʹma. (Akt 18:12) Serten dimoun i krwar ki sa beʹma ti en platform ki ti en pe o e i ti’n ganny fer avek marb kouler ble ek blan. I ti osi annan en kantite desen ki ti’n ganny grave lo la. I kapab ki sa beʹma ti o bor milye bazar Korent. I ti annan en lespas vid devan beʹma ki ti ase gran pour en gran lafoul rasanble. Bann arkeolog ti trouv bann keksoz ki montre ki sa tribinal pa ti lwen avek sinagog, alor i pa ti lwen avek lakaz Zistis. Anmezir ki Pol ti vin pli pros avek beʹma, i kapab ki i ti mazin sa letan ler Etyenn ti ganny saboule avek ros. Etyenn ti sa premye Kretyen ki ti soufer akoz son krwayans. Pol, ki sa letan dimoun ti konn  li konman Sol, ti dakor avek “mert Etyenn.” (Akt 8:1) Eski Pol ti pou pas parey li osi? Non, akoz i ti’n ganny sa promes ki “personn pa pou fer [li] dimal.”​—Akt 18:10.

14, 15. (a) Ki lakizasyon bann Zwif ti fer kont Pol e akoz Galyon ti kennsel sa ka? (b) Ki ti arive avek Sostenn e petet ki sa ti fer li fer?

¹⁴ Ki ti arive ler Pol ti ariv kot tribinal? Sa ziz ki ti pou ziz Pol ti Galyon gouverner provens Akai e i ti gran frer Seneca ki ti en filozof Romen. Bann Zwif ti akiz Pol e dir: “Sa zonm pe persyad dimoun pour ador Bondye dan en fason ki kont lalwa.” (Akt 18:13) Bann Zwif ti pe dir ki Pol ti pe konverti bann dimoun dan en fason ki kont lalwa. Par kont, Galyon ti vwar ki Pol pa ti’n fer nanryen “mal” e ki i pa ti koupab pour “en krim serye.” (Akt 18:14) Galyon pa ti anvi mel dan problenm sa bann Zwif. Alor, avan ki Pol ti kapab dir en keksoz pour defann son lekor, Galyon ti kennsel sa ka! Sa bann dimoun ki ti pe akiz Pol ti vreman ankoler. Zot ti tir zot lakoler lo Sostenn, ki petet ti’n ranplas Krispis konman zofisye sinagog. Zot ti tyonbo Sostenn “e konmans bat li devan tribinal.”​—Akt 18:17.

¹⁵ Akoz Galyon pa ti anpes lafoul bat Sostenn? Petet Galyon ti krwar ki Sostenn ti pe diriz sa lafoul ki ti pe akiz Pol e alor i ti pe ganny sa ki i ti merite. Ki swa sa ti vre oubyen non, i kapab ki sa ki ti arive ti anmenn en bon rezilta. Plizyer lannen pli tar, ler Pol ti ekri son premye let pour kongregasyon Korent, i ti koz lo en frer ki ti apel Sostenn. (1 Kor. 1:1, 2) Eski i ti sa menm Sostenn ki ti’n ganny bate Korent? Si wi, petet sa move leksperyans ki Sostenn ti gannyen ti ed li pour vin en Kretyen.

16. Ki mannyer parol Zezi: “Kontinyen koze e pa reste trankil parski mon avek ou” i kapab ed nou dan predikasyon?

¹⁶ Nou devret rapel ki i ti apre ki bann Zwif pa ti’n aksepte sa mesaz ki Pol ti pe anonse, ki Zezi ti asir Pol e dir li: “Pa bezwen per, me kontinyen koze e pa reste trankil parski mon avek ou.” (Akt 18:9, 10) Nou devret toultan rapel sa, sirtou ler dimoun pa oule ekout nou mesaz. Pa zanmen oubliye ki Zeova i vwar sa ki i annan dan leker e i atir bann dimoun ki annan leker senser kot li. (1 Sam. 16:7; Zan 6:44) Sa i ankouraz nou pour kontinyen fer en kantite dan sa travay predikasyon. Sak lannen plizyer santenn milye dimoun i batize, sa i vedir ki tou le zour i annan plizyer santenn dimoun ki batize. Zezi i asir bann ki obei sa komannman pour “al kot bann dimoun dan tou nasyon e fer zot vin . . . [son] disip” ki “[i] avek zot tou le zour ziska lafen sa lemonn.”​—Mat. 28:19, 20.

17, 18. Ki Pol ti kapab pe mazinen ler i ti lo bato pe al Efez?

¹⁷ Nou pa asire si lafason ki Galyon ti reazir anver sa bann dimoun  ki ti pe akiz Pol ti fer ki i ti annan en letan lape pour sa kongregasyon Kretyen ki ti’n fek ganny formen dan lavil Korent. An tou ka, Pol ti reste “pour ankor en bon pe letan” e apre i ti dir orevwar son bann frer Korentyen. Pandan sezon prentan dan lannen 52, Pol ti fer plan pour pran bato lo por Sankre pour al Siri, ki ti apepre 11 kilomet les avek Korent. Me avan ki i ti kit Sankre, i “ti koup son seve kourt parski i ti’n fer en ve.” c (Akt 18:18) Apre sa, i ti pran bato ansanm avek Akila ek Prisil e zot ti travers Lanmer Eze pour al Efez dan Lazi Miner.

¹⁸ Anmezir ki Pol ti lo bato sorti Sankre, petet i ti mazin sa letan ki i ti’n pase Korent. I ti annan en kantite zoli souvenir e i ti annan en kantite rezon pour li kontan. I ti ganny bann bon rezilta pandan sa 18 mwan ki i ti prese Korent. Premye kongregasyon Korent ti’n ganny formen e zot ti zwenn ansanm dan lakaz Zistis. Parmi sa bann dimoun ki ti vin bann disip, i ti annan Zistis, Krispis ek bann ki ti dan son lakour ek en kantite lezot dimoun ankor. Pol ti kontan sa bann nouvo disip, parski i ti’n ed zot vin bann Kretyen. Pli tar, i ti ekri en let pour zot e i ti dir zot ki zot ti parey en let rekomandasyon ki’n ganny ekrir lo son leker. Nou osi nou santi nou pros avek bann dimoun ki nou’n ed zot pour kontan vre ladorasyon. I gou pour vwar sa “bann let rekomandasyon”!​—2 Kor. 3:1-3.

19, 20. Ki Pol ti fer ler i ti ariv Efez e ki nou aprann avek li konsernan met bann lobzektif dan servis Zeova?

¹⁹ Ler Pol ti ariv Efez, deswit i ti konmans fer sa travay ki ti pli enportan pour li. “I ti al dan sinagog pour rezonn avek bann Zwif.” (Akt 18:19) Safwasi, Pol ti reste Efez pour en pti gin letan. Menm si zot ti demann li pour reste pli lontan, “i pa ti aksepte.” Ler i ti dir zot orevwar, i ti dir bann Efezyen: “Mon pou retourn kot zot si Zeova i permet.” (Akt 18:20, 21) San dout, Pol ti realize ki i ti annan en kantite dimoun pour zot pres avek dan lavil Efez. Sa zapot ti anvi retourn Efez me i ti kit tou keksoz dan lanmen Zeova. Sa i en bon legzanp ki nou devret rapel. Ler nou met bann lobzektif dan servis Zeova, nou bezwen konmans fer bann keksoz pour atenn sa bann lobzektif. Nou devret toultan depan lo direksyon ki Zeova i donnen e rod fason pour nou azir an armoni avek son lavolonte.​—Zak 4:15.

²⁰ Pol ti kit Akila ek Prisil dan lavil Efez e i ti pran bato pour desann Sezare. Aparaman i ti “mont” Zerizalenm e i ti al vizit kongregasyon laba. (Akt 18:22, vwar not dan Labib letid an Angle.) Apre sa, Pol ti al kot li Antyos, Siri. I ti’n fini son dezyenm vwayaz misyonner avek bann bon rezilta. Ki pou arive ler i pou fer son dernyen vwayaz misyonner?