Zezi i kit Zeriko pour al Betani. Pour ariv laba, i bezwen mont apepre 20 kilomet lo bann semen ki pa tro tro bon. Zeriko i anviron 250 met anba nivo lanmer e Betani i anviron 610 met par lao nivo lanmer. Lazar ek son de ser i reste Betani ki en pti vilaz ki anviron trwa kilomet avek Zerizalenm. Betani i lo kote les Montanny Pye Zoliv.

En kantite Zwif in fini ariv Zerizalenm pour Lapak. Zot in ariv boner “pour pirifye zot lekor” an ka zot in tous en lekor mor oubyen fer en lot keksoz ki fer zot enpir. (Zan 11:55; Nonm 9:6-10) Serten parmi bann ki’n ariv boner i rasanble kot tanp. Zot diskit antre zot pour esey konnen si Zezi pou asiste Lapak.​—Zan 11:56.

I annan diferan lopinyon lo Zezi. Serten sef relizye i anvi tyonbo li pour met li amor. Anfet, zot in donn lord ki si okenn dimoun i konnen kote Zezi i ete, zot devret dir “pour ki zot tyonbo li.” (Zan 11:57) Sa bann sef ti deza esey touy Zezi apre ki i ti resisit Lazar. (Zan 11:49-53) Alor nou kapab konpran akoz serten pa tro krwar ki Zezi pou vin an piblik.

Zezi i ariv Betani Vandredi, “sis zour avan lafet Lapak.” (Zan 12:1) En nouvo zour (Saba, le 8 Nizan) i konmans apre soley kouse. Alor i ariv Betani avan konmansman Saba. Dapre lalwa Zwif, i pa ti pou’n kapab vwayaze sorti Zeriko zour Saba, setadir depi soley kouse Vandredi ziska soley kouse Sanmdi. I tre probab ki Zezi i al kot Lazar parey i’n deza fer avan.

Simon, ki osi reste Betani i envit Zezi ek son bann konpanyon, enkli Lazar, pour vin manze kot li Sanmdi swar. Simon i ganny apele “sa lepre,” petet akoz i ti en lepre ki Zezi ti geri. Parey son labitid, Mart pe debrouye e servi bann envite. Mari pe donn en latansyon spesyal Zezi, me pa tou dimoun ki pou kontan.

Mari i ouver en boutey ki annan “en lit delwil parfimen, delwil nar pir byen ser.” (Zan 12:3) Sa delwil i vreman ser, i kout 300 denye ki apepre lapey en dimoun pour enn an! Mari i vid sa delwil lo latet ek lipye Zezi e apre i eswiy son lipye avek son seve. Sa delwil parfimen i anvoy loder partou dan lakaz.

Bann disip i ankoler e zot demande: “Akoz sa delwil parfimen in ganny gaspiye?” (Mark 14:4) Zida Iskaryot i dir: “Akoz sa delwil parfimen pa ti ganny vann pour 300 denye e donn sa larzan bann pov?” (Zan 12:5) Zida pa vreman enterese avek bann pov akoz li ki  responsab bwat larzan bann disip e i abitye vole.

Zezi i defann Mari e dir: “Akoz zot pe esey fer problenm avek sa madanm? I’n fer en bon aksyon anver mwan. Parski bann pov pou touzour avek zot, me mwan mon pa pou touzour avek zot. Ler i’n vid sa delwil parfimen lo mon lekor, i’n fer sa pour prepar mwan pour mon lanterman. Laverite mon dir zot, nenport kote dan lemonn kot sa bon nouvel i ganny anonse, sa ki sa madanm in fer pou ganny rakonte an son memwar.”​—Matye 26:10-13.

I fer plis ki en zour depi ki Zezi i Betani e sa nouvel i fann partou. I annan en kantite Zwif ki vin kot lakour Simon pour vwar Zezi me osi pour vwar Lazar “ki Zezi ti’n resisite.” (Zan 12:9) Bann sef pret i fer konplo pour touy Zezi e osi Lazar. Sa bann sef relizye i panse ki lefet ki Lazar in ganny resisite, sa i rezon akoz bokou dimoun i annan lafwa dan Zezi. Pa sa bann sef relizye i vreman pa bon!