Elizabet i pros pour ganny son pti baba. Mari in reste avek li pour trwa mwan. La i’n ariv ler pour Mari ale e fer sa gran vwayaz pour retourn kot li Nazaret dan nor. Dan apepre sis mwan, li osi pou ganny en pti garson.

Pa bokou letan apre ki Mari in ale, Elizabet i ganny son pti baba. Tou dimoun i byen kontan ki tou keksoz in byen pase e ki tou le de Elizabet ek son pti baba i byen. Ler Elizabet i montre son bann fanmir ek vwazen son pti baba, zot tou zot kontan.

Dapre Lalwa ki Bondye ti donn nasyon Izrael, en pti garson ti devret ganny sirkonsi wityenm zour apre son nesans. Normalman, i ti pou osi ganny son non sa zour. (Levitik 12:2, 3) I annan serten ki mazinen ki i devret ganny apele Zekarya parey son papa. Me Elizabet i dir: “Non! I pou apel Zan.” (Lik 1:60) Pa bliye ki lanz Gabriyel ti’n dir ki sa pti baba i devret ganny apele Zan.

Son bann vwazen ek fanmir pa dakor. Zot dir: “Napa enn ou fanmir ki apel sa non.” (Lik 1:61) Zot fer siny avek Zekarya pour demann li ki mannyer i anvi son garson i apele. I demann zot pour donn li en plak dibwa e i ekri: “Son non i Zan.”​—Lik 1:63.

Ler Zekarya i fer sa, i reganny son abilite pour koze atraver en mirak. Petet ou rapel ki i ti nepli kapab koze ler i pa ti krwar mesaz sa lanz. Sa lanz ti’n dir li ki Elizabet ti pou ganny en pti garson. Alor la ler son bann vwazen i tann li koze, zot enpresyonnen e zot dir dan zot menm: “Ki sa pti garson pou vini?” (Lik 1:66) I evidan pour zot ki Bondye ki’n fer Zan ganny sa non.

Apre sa, Zekarya i ranpli avek lespri sen e  i dir: “Ki Zeova, Bondye Izrael i ganny loue, parski i’n mazin son pep e i’n delivre zot. I’n anvoy pour nou en sover pwisan sorti dan desandans David son serviter.” (Lik 1:68, 69) Sa “sover pwisan” ki Zekarya ti pe refer avek i Senyer Zezi ki ti pros pour ne. Zekarya i dir ki gras a sa Enn, Bondye pou “sov nou kont nou lennmi, nou pou kapab annan sa privilez pour servi li san okenn lafreyer, avek fidelite ek ladrwatir tou dilon nou lavi.”​—Lik 1:74, 75.

Zekarya i predir sa konsernan son garson: “Tandis ki ou mon garson, ou pou profet sa Enn Tre O, parski ou pou al par devan Zeova pour prepar son semen, pour fer son pep konnen ki gras a pardon zot pese zot pou ganny sove, akoz tandres ek konpasyon nou Bondye. Sa konpasyon sorti dan lesyel pou parey lalimyer soley leve ki pou ekler sa bann ki dan fernwanr e dan lonbraz lanmor e gid nou lipye dan semen lape.” (Lik 1:76-79) Pa sa profesi i vreman ankourazan!

Sa letan, Mari ki pa ankor marye, i’n ariv kot li Nazaret. Ki pou arive avek li ler dimoun i konmans remarke ki i ansent?