Kestyon lekter
Ki mannyer sa lartik ki annan pour tit “Ki ou non i ganny sanktifye” ki dan Latour Veyer Zen 2020 in aziste nou konprenezon konsernan non Zeova ek son souvrennte?
Dan sa lartik ki dan Latour Veyer Zen 2020, nou ti aprann ki i annan en keksoz vreman enportan ki konsern tou imen ek tou lanz. Sa i sanktifikasyon non Zeova. Drwa Zeova pour dirize, setadir si fason dirize Zeova i pli bon oubyen non, i relye avek sanktifikasyon non Zeova. Pareyman, ki swa en dimoun i reste fidel avek Bondye oubyen non, i osi relye avek sanktifikasyon non Zeova.
Akoz aprezan nou dir ki sa keksoz pli enportan i annan pour fer avek non Zeova ek son souvrennte? Annou vwar trwa rezon.
Depi dan zarden Edenn ziska ozordi, Satan in sali non Bondye
Premyerman, dan zarden Edenn, Satan ti sali non oubyen repitasyon Zeova. Sa kestyon ki Satan ti demann Ev ti donn lenpresyon ki Zeova pa zenere e ki bann lenstriksyon ki Zeova ti’n donn Adan ek Ev ti pe priv zot bann bon keksoz. Apre Satan ti kontredir sa ki Zeova ti’n dir. I ti konmsi i pe dir ki Bondye in koz manti. Dan sa fason, i ti sali non Zeova e i ti vin “Dyab,” ki vedir “sa enn ki fer kalonmni.” (Zan 8:44) Ev ti krwar bann mansonz Satan e i ti dezobei Bondye, ki ti montre ki i pa ti anvi Bondye konman son dirizan. (Zen. 3:1-6) Depi sa letan, Satan in kontinyen sali non Bondye par dir bann mansonz konsernan sa kalite Bondye ki Zeova i ete. Bann dimoun ki krwar sa bann mansonz i annan plis sans pour dezobei Zeova. I pour sa rezon ki pep Bondye i vwar sa bann mansonz lo repitasyon Zeova konman sa keksoz pli enzis. Sa bann mansonz i osi rezon akoz i annan bokou soufrans ek move keksoz dan lemonn.
Dezyenmman, pour benefisye tou son kreasyon, Zeova pou sanktifye son non setadir elimin tou repros ki’n ganny anmennen lo son non. Sa i sa keksoz pli enportan pour Zeova. I pour sa rezon ki i ti dir: “Mon pou sirman sanktifye mon gran non.” (Ezek. 36:23) Osi, Zezi ti dir kwa ki devret sa keksoz pli enportan pour bann serviter fidel Zeova priy lo la, ler i ti dir: “Ki ou non i ganny sanktifye.” (Mat. 6:9) Plizyer fwa, Labib i montre ki i enportan pour glorifye non Zeova. Annou vwar enn de legzanp: “Donn Zeova laglwar ki son non i merite.” (1 Kron. 16:29; Ps. 96:8) “Sant kantik pour loue son non glorye.” (Ps. 66:2) “Mon pou glorifye ou non pour touzour.” (Ps. 86:12) Enn bann moman ki Zeova ti koze dan lesyel, ti kot tanp Zerizalenm ler Zezi ti dir: “Papa glorifye ou non.” Zeova ti reponn: “Mon’n glorifye li e mon pou glorifye li ankor.”—Zan 12:28. a
Trwazyenmman, plan Zeova i annan pour fer avek son non oubyen son repitasyon. Reflesir: Ki pou arive apre sa tes final ki pou arive a lafen Renny Mil an Kris? Ki mannyer bann lanz ek imen pou santi konsernan non Zeova sa letan? Pour ed nou konn larepons, mazin sa de keksoz ki relye avek non Zeova. Sa i sa kestyon konsernan si bann imen pou reste fidel avek Zeova oubyen non e si fason dirize Zeova i sa enn ki pli meyer. Eski apre sa tes final bann imen pou ankor bezwen montre ki zot fidel avek Zeova? Non. Zot pou’n vin parfe e zot pou’n fini ganny teste. Zot pou’n osi ganny lavi eternel. I pou napa okenn rezon pour montre ki fason dirize Zeova i sa enn ki pli bon. Sa letan, tou bann ki dan lesyel e lo later pou ini ansanm e zot pou aksepte Zeova konman zot dirizan. Me eski non Zeova pou ankor sa keksoz pli enportan pour son pep?
Sa letan, tou dimoun pou konn laverite konsernan Zeova e son non pou’n ganny sanktifye. Me son non pou kontinyen sa keksoz pli enportan pour tou son bann serviter, ki swa zot dan lesyel oubyen lo later. Akoz? Parski zot pou vwar kot Zeova i kontinyen fer bann keksoz merveye. Vi ki Zezi pou redonn Zeova sa Rwayonm, Bondye pou “vin tou pour tou dimoun.” (1 Kor. 15:28) Apre sa, bann imen lo later pou ganny “laglwar ek laliberte bann zanfan Bondye.” (Rom. 8:21) Zeova pou akonpli son plan pour fer ki tou son bann zanfan, ki swa dan lesyel oubyen lo later, i ini ansanm konman en sel fanmir.—Efe. 1:10.
Ki mannyer fanmir Zeova ki dan lesyel e lo later pou santi apre ki tou sa bann keksoz in arive? Nou pou annan sa gran dezir pour loue non Zeova. Zeova ti enspir psalmis David pour ekri: “Ki Bondye Zeova i ganny loue . . . Ki son non i ganny glorifye e loue pour touzour.” (Ps. 72:18, 19) Nou pou kontinyen trouv rezon pour loue li pour touzour.
Non Zeova i reprezant tou sa ki Zeova i ete. Son non i fer nou rapel ki i kontan nou. (1 Zan 4:8) Nou pou toultan rapel ki Zeova in kree nou parski i kontan nou, ki i’n donn sa ranson parski i kontan nou e ki i’n demontre ki son fason dirize i drwat parski i kontan nou. Me nou pou kontinyen vwar lafason ki Zeova i demontre son lanmour pour nou pour touzour. Sa pou motiv nou pour vin pli pros avek li e pour loue son non merveye pour touzour.—Ps. 73:28.
