Zapot Pol ti ekri bann Kretyen dan kongregasyon Tesalonik. I ti dir zot: “Si en dimoun pa obei sa ki nou dir zot dan sa let, vey li byen [Oubyen “mark sa dimoun,” not.]” (2 Tesa. 3:14) Dan lepase, nou ti panse ki sa lenstriksyon ti pour bann ansyen. Si en dimoun ti kontinyen rezet bann prensip Labib e i ti ganny konseye plizyer fwa, bann ansyen ti kapab donn en diskour pour averti kongregasyon. Apre sa, bann manm kongregasyon ti pou aret frekant sa dimoun an deor bann aktivite kongregasyon.

Me nou bezwen fer en azisteman. Anfet konsey Pol pe refer avek aksyon ki sak Kretyen pou fer dan serten sityasyon. I pa neseser ki bann ansyen i fer en diskour pour averti kongregasyon pour ki zot mark sa dimoun. Akoz nou pe fer sa sanzman? Annou get konteks ler Pol ti donn sa konsey.

Pol ti’n remarke ki serten dan kongregasyon ti pe “fer dezord.” Zot ti dezobeisan e rezet bann konsey ki sorti dan Labib. Dan en lot vizit, Pol ti’n donn sa lord: “Si en dimoun pa oule travay, i pa devret manze osi.” Pourtan serten ti refize travay pour siport zot lekor menm si zot ti kapab fer li. Osi zot ti mel dan zafer lezot dimoun. Ki mannyer bann Kretyen dan kongregasyon ti pou tret sa bann dimoun ki ti dezobeisan?—2 Tesa. 3:6, 10-12.

Pol ti dir: “Vey li byen” oubyen dapre sa not, “mark sa dimoun.” Sa mo Grek i donn sa nide pour idantifye en dimoun e evit li pour pa ganny enfliyanse par li. Pol ti donn sa lenstriksyon avek kongregasyon antye, pa zis bann ansyen. (2 Tesa. 1:1; 3:6) Alor sak Kretyen ti kapab remarke si en dimoun dan kongregasyon ti pe dezobeir bann konsey ki sorti dan Labib e deside personnelman pour “aret frekant” sa dimoun ki ti pe fer dezord dan kongregasyon.

Eski sa i vedir ki sa frer oubyen sa ser ti pou ganny trete konman en dimoun ki’n ganny tire dan kongregasyon? Non, parski Pol ti dir: “Kontinyen averti li konman en frer.” Alor bann Kretyen ti pou kontinyen asosye avek sa enn ki’n ganny marke, dan bann renyon ek dan predikasyon. Me zot ti kapab deside pour pa asosye avek li dan bann rankont sosyal oubyen dan bann divertisman. Akoz? Pol ti dir: “Pour ki i onte.” Ler sa dimoun ti pou ganny marke, i ti pou onte e kekfwa i ti pou sanz son kondwit ek son latitid.—2 Tesa. 3:14, 15.

Ki mannyer bann Kretyen i kapab aplik sa konsey ozordi? Premyerman, nou pou fer sir ki sa kondwit i vreman en sityasyon kot sa dimoun pe dezobeir oubyen “fer dezord,” parey Pol ti dir. Pol pa ti pe koz lo bann sityasyon ki annan pour fer avek nou konsyans oubyen bann swa personnel. Osi i pa ti pe koz lo si nou’n ganny ofanse par en lot dimoun, me la Pol ti pe koz spesifikman lo bann ki swazir pour dezobeir bann konsey kler ki Bondye i donnen.

Alor ozordi si nou remarke ki en lot Kretyen pe demontre en leta lespri dezobeisan, a nou kapab pran sa desizyon personnel pour pa frekant sa dimoun dan bann rankont sosyal oubyen dan bann divertisman. Sa i en swa personnel e nou pa pou koz lo la avek lezot ki pa form parti nou fanmir pros. Nou pou osi kontinyen frekant sa dimoun pandan bann renyon e dan predikasyon. Ler sa dimoun i sanz son latitid, nou pou rekonmans asosye avek li normalman.