Mon ti ne an 1934. Mon paran ti sorti Laswis e zot ti’n al reste Timmins, ki en lavil ki sitye Ontario, Kanada. An 1939, mon manman ti konmans lir Latour Veyer e asiste renyon Temwen Zeova. I ti anmenn mwan ek mon sis frer ek ser renyon avek li. Pa bokou letan apre, mon manman ti vin en Temwen Zeova.

Mon papa pa ti kontan ki mon manman ti’n vin en Temwen Zeova me mon manman ti kontan laverite e i ti vreman anvi reste fidel avek Zeova. I ti fer sanmenm menm pandan bann lannen apre 1940 ler travay predikasyon Temwen Zeova ti ganny enterdi Kanada. Menm si mon papa ti maltret li, manman ti toultan tret mon papa avek labonte ek respe. Son bon legzanp in ed mwan ek mon bann frer ek ser pour aksepte laverite e servi Zeova. Mon vreman kontan ki avek letan, latitid mon papa ti sanze e i ti konmans tret nou pli byen.

Pandan lete 1950, mon ti asiste sa lasanble ki ti annan pour tit Theocracy’s Increase, ki ti ganny fer New York City. Mon ti rankontre bann frer ek ser sorti partou dan lemonn e tann bann zoli entervyou ki bann frer ek ser ki ti’n asiste Lekol Gilead ti fer. Sa ti motiv mwan pour fer plis dan servis Zeova e mon ti pli determinen pour fer servis a plen tan. Dek ki mon ti retourn dan lakour, mon ti demande pour vin en pionye ordiner. Biro brans Kanada ti ekri mwan e sizere ki mon pran batenm avan. Sanmenm ki mon ti fer le 1 Oktob 1950. En mwan pli tar, mon ti vin en pionye ordiner e mon ti ganny demande pour al servi Kapuskasing, ki ti en lavil ki ti vreman lwen avek kot mon ti pe reste.

An 1951, biro brans Kanada ti ankouraz bann ki ti koz Franse pour al servi dan provens Quebec  dan teritwar kot dimoun i koz Franse parski i ti annan en gran bezwen pour plis proklanmater laba. Vi ki mon ti koz Franse ek Angle, mon ti aksepte sa lenvitasyon e mon ti ganny anvoye Rouyn. Mon pa ti konn personn laba e parey mon’n mansyonnen pli boner, mon ti zis annan en ladres. Me keksoz ti al byen pour mwan. Nou de Marcel, nou ti vin bon zanmi e mon ti kontan pour servi dan provens Quebec pour sa kat-r-an ki ti swiv e ver lafen sa kat-r-an mon ti vin en pionye spesyal.

Ler mon ti Quebec, mon ti ganny envite pour asiste vennsizyenm laklas Lekol Gilead ki ti ganny fer South Lansing, New York. Mon ti fini sa lekol le 12 Fevriye 1956 e mon ti ganny demande pour al dan sa pei ki ozordi i apel Gana, b dan was Lafrik. Me avan ki mon ti kapab al laba, mon ti bezwen retourn Kanada ziska ki mon ti ganny bann dokiman ki mon ti bezwen pour al reste Gana. Mon ti krwar ki sa ti pou pran zis detrwa semenn.

Mon ti bezwen esper set mwan dan lavil Toronto ziska ki sa bann dokiman i pare. Pandan sa letan, mon ti reste avek lafanmir Cripps e mon ti ganny sans aprann konn zot fiy, Sheila. Nou ti tonm anmoure avek kanmarad. Zis konman mon ti pe al demann li pour marye avek mwan, mon ti ganny mon viza. Nou de Sheila, nou ti priy lo sa sityasyon e nou ti deside ki mon devret al servi Gana. Me nou ti osi deside ki nou ti pou ekri kanmarad let e espere pour vwar si nou ti kapab marye dan lavenir. Sa pa ti en desizyon fasil me pli tar nou ti realize ki i ti sa bon desizyon.

I ti pran en mwan pour mwan ariv Accra, Gana. Mon ti vwayaz par tren, bato kargo e par avyon. Ler mon ti ariv laba, mon ti ganny apwente konman sirveyan distrik. Sa ti enkli vwayaz partou Gana, Ivory Coast (ki ozordi i Kotdivwar) ek Togoland (ki ozordi i Togo). Laplipar ditan, mon ti vwayaz mwan tousel dan  transpor ki biro brans ti donnen. Mon ti vreman kontan pour al vizit bann frer ek ser.

Dan wikenn, mon ti al bann lasanble rezyonal. Nou ti napa bann lasal lasanble. Alor bann frer ti konstrir bann langar tanporer avek banbou e kouver sa bann langar avek fey palm pour ki lodyans i kapab kasyet soley so. Vi ki ti napa refrizerater dan lasal manze, bann frer ti gard bann zannimo vivan pa tro lwen e zot ti touy sa bann zannimo pour zot kapab donn manze bann ki ti asiste lasanble.

Pandan sa bann lasanble, i ti annan bann keksoz ki ti arive, ki ti fer riye. Par egzanp, en fwa ler Herb Jennings, c ki ti en misyonner li osi, ti pe fer diskour, en bef ti sove dan lasal manze. Sa bef ti tay ant platform ek lodyans. Herb ti aret koze e sa bef ti paret byen konfize. Me kat frer ti reisi atrap li e anmenn li dan lasal manze. Bann dimoun ki ti pe get sa ti bat lanmen.

Bann zour ki ti napa lasanble, mon ti zwe sa film The New World Society in Action dan bann vilaz ki pa lwen. Pour fer sa, mon ti met en tapi blan ant de poto oubyen de pye dibwa e zwe sa film Io la. Bann dimoun ti kontan sa bann film. En kantite parmi zot pa ti’n zanmen vwar en film oparavan. Zot ti bat lanmen ler zot ti vwar bann bout dan sa film ki montre dimoun pe batize. Sa film ti ed en kantite dimoun pour konpran ki Temwen Zeova i ini e ki nou partou dan lemonn.

An 1958 apre ki mon ti’n pas apepre de-z-an Lafrik, mon ti kontan pour asiste en lasanble enternasyonal ki ti ganny fer New York City. Mon ti vreman kontan pour vwar Sheila ki ti’n vin sa lasanble li osi. Sa letan, Sheila ti pe servi konman en pionye spesyal dan provens Quebec e nou ti pe kominik avek kanmarad atraver let. Me la ki nou ti ansanm, mon ti demann li pour marye avek mwan e i ti aksepte. Mon ti ekri Frer Knorr d e demann li si Sheila ti kapab asiste lekol Gilead e apre vin zwenn mwan Lafrik. Frer Knorr ti dakor. Finalman Sheila ti ariv Gana e nou le 3 Oktob 1959, nou ti marye dan lavil Akra. Nou ti santi ki Zeova ti’n beni nou akoz nou ti’n met li premye dan nou lavi.

An 1961, nou ti ganny demande pour al servi Kameroun. Mon ti vreman okipe parski bann frer  ti’n demann mwan pour ede etabli en biro brans dan sa pei. Vi ki mon ti’n ganny apwente konman sirveyan travay predikasyon dan sa pei, mon ti annan en kantite keksoz pour aprann. An 1965, nou ti aprann ki Sheila ti ansent. I ti difisil pour nou vwar nou konman bann paran. Me zis konman nou ti konmans eksite pour sa nouvo responsabilite e pe konmans fer plan pour retourn Kanada, en keksoz terib ti arive.

Nou pti baba ti mor avan ki i ti ne. Dokter ti dir nou ki i ti en garson. Sa ti arive plis ki 50 an pase me nou pa’n zanmen oubliye. Menm si sa ki ti’n arive ti fer nou vreman sagren, nou ti reste dan nou servis ki nou ti kontan en kantite.

Bann frer ek ser Kameroun ti souvandfwa ganny persekite parski zot pa ti pran kote dan bann zafer politik. Keksoz ti sirtou difisil ler i ti annan eleksyon pour prezidan. Le 13 Me 1970, en keksoz ki nou ti pe swete pa arive, ti arive. Temwen Zeova ti ganny enterdi dan sa pei. Gouvernman ti pran nou zoli biro brans ki nou ti’n fek konmans reste ladan senk mwan pli boner. Dan lespas en semenn, tou misyonner, enkli nou de Sheila, ti ganny pouse dan sa pei. I ti difisil pour nou ale parski nou ti vreman kontan bann frer ek ser e nou ti enkyet konsernan sa ki zot ti pou pas ladan.

Nou ti pas sa prosenn sis mwan dan biro brans Lafrans. Ler mon ti laba, mon ti fer tou sa ki mon ti kapab pour ed bann frer ek ser Kameroun. An Desanm 1970, nou ti ganny anvoye dan biro brans Nizerya ki ti’n konmans okip sa travay predikasyon ki ti pe ganny fer Kameroun. Bann frer ek ser Nizerya ti akey nou byen e nou ti kontan pour servi dan sa pei pour plizyer lannen.

An 1973 nou ti bezwen fer en desizyon vreman difisil. Sheila ti annan bann problenm lasante grav. Pandan ki nou ti pe asiste en lasanble New York i ti plere e dir mwan: “Mon pa kapab kontinyen fer sa ki mon pe fer! Mon fatige e laplipar ditan mon malad.” Pour plis ki 14 an, Sheila ti’n servi ansanm avek mwan dan was Lafrik. Mon ti vreman fyer pour son servis fidel me nou ti bezwen fer bann sanzman. Apre ki nou ti’n koz lo nou sityasyon e priye, nou ti deside ki nou devret retourn Kanada kot i ti kapab ganny en pli bon swen medikal. Nou ti bezwen aret nou servis misyonner e nou servis a plen tan. Sa ti sa desizyon pli difisil e pli fermal ki nou’n deza fer.

Ler nou ti ariv Kanada, mon ti ganny en travay avek en zanmi ki ti annan en lakonpannyen ki vann loto dan en lavil ki ti nor avek Toronto. Nou ti lwe en apartman, aste bann meb ki ti’n deza servi e nou ti kapab rekonmans nou lavi san bezwen akimil bann det. Nou ti anvi kontinyen annan en lavi senp parski nou ti swete ki en zour nou ti kapab retourn dan servis a plen tan. Nou ti sirprann ler nou ti kapab fer sanmenm pli boner ki nou ti pe ekspekte.

Mon ti konmans ede dan Sanmdi lo sa sit konstriksyon kot en nouvo LasaI Lasanble ti pe  ganny konstri dan lavil Norval, Ontario. Pli tar, mon ti ganny demande pour vin sirveyan sa Lasal Lasanble. Lasante Sheila ti pe amelyore e nou ti santi ki i ti kapab fer sa nouvo servis. Alor an Zen 1974, nou ti al reste dan sa apartman ki ti kot sa Lasal Lasanble. Nou ti vreman kontan pour rekonmans servis a plen tan!

Erezman, lasante Sheila ti kontinyen amelyore. De-z-an pli tar, nou ti kapab konmans servi konman sirveyan rezyonal. Nou teritwar ti dan provens Manitoba, en landrwa Kanada ki ti vreman fre. Me bann frer ek ser laba ti akey nou e demontre lanmour anver nou. Nou ti aprann ki i pa vreman enportan kote nou pe servi Zeova me sa ki pli enportan i ki nou pe kontinyen servi li nenport landrwa kot nou ete.

Apre ki nou ti’n servi konman sirveyan rezyonal pour plizyer lannen, an 1978 nou ti ganny envite pour al servi dan Betel Kanada. Pa bokou letan apre sa, mon ti aprann en leson enportan me ki ti difisil pour aksepte. Mon ti ganny demande pour fer en diskour enn erdtan edmi an Franse dan en renyon spesyal ki ti ganny fer Montreal. Malerezman, i ti difisil pour dimoun swiv pandan mon diskour e en frer dan Departman Servis ti donn mwan konsey konsernan sa. Fransman, mon ti’n devret realiz sa ki mon’n realize aprezan, ki mon pa vreman en bon orater. Me sa zour, mon pa ti pran sa konsey byen. Nou konversasyon pa ti al byen e mon ti ankoler parski mon ti mazinen ki sa frer ti pe tro kritik mwan e ki i pa ti’n dir mwan sa ki mon’n fer byen. Mon ti fer sa fot pour pa aksepte sa konsey parski mon pa ti kontan lafason ki i ti’n ganny donnen e baze lo lafason ki mon santi konsernan sa dimoun ki’n donn sa konsey.

Detrwa zour pli tar, en manm Komite Brans ti koz avek mwan lo sa size. Mon ti admet ki mon pa ti’n reazir byen ler mon ti ganny sa konsey e ki mon ti regret mon reaksyon. Apre sa mon ti al koz avek sa frer ki ti’n donn mwan sa konsey. I ti pardonn mwan. Sa leksperyans i ansenny mwan ki i vreman enportan pour demontre limilite e mon pa pou zanmen oubliy sa. (Prov. 16:18) Mon ti priy Zeova plizyer fwa konsernan sa e mon ti determinen pour pa zanmen annan en move latitid ler en dimoun i donn mwan konsey.

I fer plis ki 40 an ki mon pe servi dan Betel Kanada e depi 1985, mon annan sa privilez pour servi lo Komite Brans. Malerezman an Fevriye 2021, Sheila ti mor. Mon mank li en kantite e aprezan mwan osi mon annan bann problenm lasante. Me dan servis Zeova mon sitan okipe e sitan zwaye ki mon pa tro remarke ki letan pe pase. (Ekle. 5:20) Menm si mon’n pas dan plizyer problenm dan mon lavi, mon’n annan plis rezon pour zwaye. Mon annan en lavi ki satisfezan parski mon’n met Zeova premye dan mon lavi e mon’n pas 70 an dan servis a plen tan. Mon priye ki bann zenn frer ek ser i kontinyen met Zeova premye dan zot lavi zot osi parski mon asire ki si zot fer sa, zot pou annan en lavi ki gou e satisfezan e sa i selman posib si nou servi Zeova.