Kestyon lekter
Lekel sa “madanm” ki ganny mansyonnen dan Izai 60:1 e ki mannyer i ‘leve e les son lalimyer klere’?
Izai 60:1 i dir: “Sa madanm, leve, les ou lalimyer klere, parski ou lalimyer in arive. Laglwar Zeova i kler ou.” Bann verse otour sa verse i montre ki sa “madanm” pe refer avek Siyon oubyen Zerizalenm, ki ti kapital Zida sa letan. a (Iza. 60:14; 62:1, 2) Dan sa verse, Zerizalenm pe reprezant nasyon Izrael antye. Sa i fer nou demann de kestyon konsernan sa ki Izai ti dir: Premyerman, kan e ki mannyer Zerizalenm ti “leve” e les lalimyer spirityel klere? Dezyenmman, eski sa ki Izai ti dir pe ganny akonplir lo en pli gran lanpler dan nou letan?
Kan e ki mannyer Zerizalenm ti “leve” e les lalimyer spirityel klere? Pandan sa 70 an ki bann Zwif ti bann prizonnyen Babilonn, Zerizalenm ek son tanp ti reste dan en move leta. Me apre ki bann Med ek Pers ti ranport laviktwar lo bann Babilonnyen, bann Izraelit ki ti reste partou dan Lanpir Babilonn ti lib pour zot retourn dan zot pei e retabli vre ladorasyon. (Ezra 1:1-4) O konmansman lannen 537 avan Kris, en pti group Izraelit fidel sorti dan sa 12 tribi ti fer sa. (Iza. 60:4) Zot ti konmans ofer bann sakrifis pour Zeova, selebre bann lafet e rekonstri tanp. (Ezra 3:1-4, 7-11; 6:16-22) Ankor enn fwa, laglwar Zeova ti konmans kler lo Zerizalenm, setadir lo pep Bondye. Sa ti fer ki zot ti kapab vin en lalimyer senbolik pour bann nasyon ki pa ti konn Zeova.
Me sa letan zis en parti bann profesi Izai ki ti ganny akonplir. Laplipar bann Izraelit pa ti kontinyen obei Bondye. (Nee. 13:27; Mal. 1:6-8; 2:13, 14; Mat. 15:7-9) Pli tar, zot ti menm rezet Mesi, setadir Zezi Kri. (Mat. 27:1, 2) Finalman lannen 70, Zerizalenm ek son tanp ti ganny detrir en dezyenm fwa.
Zeova ti’n predir ki sa ti pou arive. (Dan. 9:24-27) Alor, i kler ki i pa ti dan son plan pour Zerizalenm akonpli tou laspe bann profesi dan Izai sapit 60 konsernan lafason ki vre ladorasyon pou ganny retablir.
Eski sa ki Izai ti dir pe ganny akonplir lo en pli gran lanpler dan nou letan? Wi me i konsern en lot madanm, setadir “Zerizalenm anler.” Zapot Pol ti dir sa konsernan sa madanm: “I nou manman.” (Gal. 4:26) Zerizalenm anler i sa parti lorganizasyon Bondye ki dan lesyel, ki enkli bann lanz fidel. Son zanfan i enkli Zezi ek sa 144,000 Kretyen swazir, ki parey Pol i annan sa lespwar pour al dan lesyel. Bann Kretyen swazir i “en nasyon sen” setadir “Izrael Bondye.”—1 Pyer 2:9; Gal. 6:16.
Me ki mannyer Zerizalenm anler ti ‘leve e les son lalimyer klere’? I ti fer sa atraver son bann zanfan lo later, setadir bann Kretyen swazir. Annou vwar ki mannyer sa ki’n arive avek bann Kretyen swazir i en pe parey avek sa ki ti ganny profetize dan Izai sapit 60.
Bann Kretyen swazir ti bezwen “leve” parski dan en sans zot ti’n tonm dan en fernwanr spirityel ler bann aposta ti antre dan kongregasyon apre ki bann zapot ti’n mor. (Mat. 13:37-43) Sa letan, zot ti vin bann prizonnyen Gran Babilonn, ki reprezant tou fo larelizyon. Bann Kretyen swazir ti reste konman bann prizonnyen ziska “lafen sa lemonn” ki ti konmans an 1914. (Mat. 13:39, 40) Pa bokou letan apre sa, an 1919, zot ti ganny libere e deswit zot i konmans les lalimyer spirityel klere par donn tou pour tou dan sa travay predikasyon. b Pandan bann lannen ki’n pase, dimoun sorti dan tou nasyon in vin ver sa lalimyer, enkli lezot Kretyen swazir ki form parti Izrael Bondye, ki sa “bann lerwa” ki ganny mansyonnen dan Izai 60:3.—Rev. 5:9, 10.
Dan lavenir, bann Kretyen swazir pou les lalimyer sorti kot Zeova klere dan en pli gran fason. Ki mannyer sa? Ler sa bann Kretyen i mor, zot pou form parti “Nouvo Zerizalenm,” setadir nouvel marye Kris ki sa 144,000 Kretyen swazir ki pou vin bann lerwa ek pret.—Rev. 14:1; 21:1, 2, 24; 22:3-5.
Nouvo Zerizalenm pou annan en rol enportan pour zwe dan lakonplisman sa profesi dan Izai 60:1. (Konpar Izai 60:1, 3, 5, 11, 19, 20 avek Revelasyon 21:2, 9-11, 22-26.) Zis parey Zerizalenm ti sa landrwa kot gouvernman ti ete dan letan bann Izraelit, Nouvo Zerizalenm ansanm avek Kris pou vin sa gouvernman ki pou dirize dan nouvo lemonn. Me ki mannyer Nouvo Zerizalenm i “desann sorti dan lesyel kot Bondye”? I pou fer sa par diriz later. Bann dimoun sorti dan tou nasyon ki annan en gran respe pour Bondye “pou mars dan son lalimyer.” Zot pou nepli fer pese e mor. (Rev. 21:3, 4, 24) Sa pou fer ki “Bondye pou retabli tou keksoz,” zis parey Izai ek lezot profet ti koz lo la. (Akt 3:21) Sa travay pou retabli tou keksoz ti konmanse ler Kris ti vin Lerwa e i pou fini a lafen sa mil an ki Kris pou dirize.
a Dan Izai 60:1, Labib–Tradiksyon nouvo lemonn i servi sa mo “madanm” dan plas “Siyon” oubyen “Zerizalenm” parski sa bann mo Ebre ki’n ganny tradwir “leve” ek “les ou lalimyer klere” i feminen, zis parey sa mo “ou.” Sa mo “madanm” i ed dimoun konpran ki sa verse pe koz lo en madanm senbolik.
b Ezekyel 37:1-14 ek Revelasyon 11:7-12 i osi koz lo sa letan kot vre ladorasyon ti ganny retabli an 1919. Ezekyel ti predir konsernan ler tou Kretyen swazir ti pou ganny libere apre ki zot ti bann prizonnyen pour en kantite letan. Sa profesi dan Revelasyon i refer avek ler en pti group frer ki bann Kretyen swazir e ki ti pe dirize dan lorganizasyon Zeova ti rekonmans zot travay apre ki zot ti nepli kapab servi Zeova pour en pe letan. Sa ti arive ler zot ti ganny libere apre ki zot ti’n mete dan prizon dan en fason enzis. An 1919, sa pti group frer ti ganny apwente konman “sa lesklav fidel e pridan.”—Mat. 24:45; vwar liv Pure Worship of Jehovah—Restored At Last!, paz 118 an Angle.
