Lalwa Bondye I Pour Nou Prop Benefis

“Konbyen mon kontan ou lalwa!”—PSONM 119:97.

1. Ki latitid anver obeir lalwa Bondye ki komen?

OBEIR lalwa Bondye i pa en keksoz ki laplipar dimoun i kontan konmela. Pour bokou dimoun, i pa fer sans pour zot soumet avek en lotorite pli o me ki envizib. Nou pe viv dan en lepok kot bann standar i kapab sanze depandan lo tel ou tel kriter, en lepok kot napa limit presi ant sa ki byen ek sa ki mal, e en lepok kot nou pa kapab fasilman dir si en sitiasyon i byen ouswa i mal. (Proverb 17:15; Izai 5:20) En letid ki’n ganny fer resaman, ki reflekte en fason panse ki komen dan bokou sosyete profann, i remarke ki “laplipar Ameriken i anvi desid pour zot menm sa ki byen, sa ki bon e sa ki fer sans.” Zot prefer ‘en Bondye toleran e osi bann lalwa ki pa strik. Zot pa anvi bann sef pwisan ki annan bann konviksyon moral oubyen okenn lezot konviksyon.’ En sosyolog ti obzerve ki konmela “bann dimoun i ekspekte determinen pour zot menm kisisa en lavi drwat e pir.” I ti kontinyen: “Okenn lotorite pli o i bezwen adapte son bann komannman avek bezwen bann vre dimoun.”

2. Konman ki premye mansyon lo lalwa dan Labib ti relye etrwatman avek benediksyon ek laprouvasyon Bondye?

² Vi ki bokou dimoun pe kestyonn valer lalwa Zeova, nou bezwen fortifye nou konviksyon ki standar Bondye i pour nou prop benefis. I enteresan pour vwar sa resi kot lalwa ti ganny mansyonnen pour premye fwa dan Labib. Dan Zenez 26:5, nou lir sa ki Bondye ti dir: “Abraam . . . ti kontinyen gard son lobligasyon anver mwan, mon bann lord, mon bann lareg, ek mon bann lalwa.” Sa parol ti ganny dir plizyer syek avan ki Zeova ti donn desandans Abraam bann lalwa byen detaye. Konman ki Bondye ti rekonpans lobeisans Abraam, enkli son lobeisans anver Son lalwa? Zeova ti fer sa promes avek li: “Par mwayen ou semans tou bann nasyon lo later pou ganny beni.” (Zenez 22:18) Alor, obeir lalwa Bondye i relye etrwatman avek benediksyon ek laprouvasyon Bondye.

3. (a) Ki santiman anver lalwa Zeova en psalmis ti eksprimen? (b) Ki bann kestyon ki merit nou latansyon?

³ En psalmis—petet en prens Zida e en fitir lerwa—ti eksprim en santiman ki pa normalman ganny asosye avek lalwa. I ti dir avek Bondye: “Konbyen mon kontan ou lalwa!” (Psonm 119:97) Sa psalmis pa ti pe senpleman eksprim en santiman ki i ti pe resanti sa moman. I ti pe eksprim son lanmour pour lavolonte Bondye parey i’n ganny prezante dan son lalwa. Zezi Kri, Garson parfe Bondye, ti annan menm santiman. Dan en fason profetik, Zezi ti ganny dekrir konman pe dir: “Mon annan plezir pour fer ou lavolonte, O mon Bondye, e ou lalwa i oprofon dan mwan.” (Psonm  40:8; Ebre 10:9) Be nou? Eski nou pran plezir pour fer lavolonte Bondye? Eski nou konvenki ki lalwa Zeova i itil e benefisye nou? Ki plas lobeisans anver lalwa Bondye i annan dan nou ladorasyon, dan nou lavi toulezour, dan nou bann desizyon ki nou fer, e dan nou relasyon avek lezot? Pour nou kontan lalwa Bondye, i byen pour nou konpran akoz Bondye i annan sa drwa pour fer bann lalwa e fer respekte zot.

Zeova—sa Enn ki annan Drwa donn Lalwa

4. Akoz Zeova i annan tou drwa donn lalwa?

⁴ Vi ki Zeova i Kreater, se li dan liniver antye ki annan tou drwa pour donn lalwa. (Revelasyon 4:11) Profet Izai ti dir: “Zeova i fer lalwa.” (Izai 33:22) I’n etabli bann lalwa fizik ki gouvern bann kreatir parey imen ek zannimo ensi ki lezot kreasyon. (Zob 38:4-38; 39:1-12; Psonm 104:5-19) Etan donnen ki zonm i kreasyon Bondye, i bezwen soumet avek son lalwa fizik. E menm si zonm in ganny sa liberte pour swazir ek sa abilite pour rezonn lo li menm, i pou ere si selman i soumet li avek lalwa moral e spirityel Bondye.—Romen 12:1; 1 Korentyen 2:14-16.

5. Konman ki sa prensip dan Galat 6:7 i vre an rapor avek lalwa Bondye?

⁵ Parey nou konnen, personn pa kapab kas bann lalwa fizik Zeova. (Zeremi 33:20, 21) Si en dimoun i al kont serten lalwa fizik, parey lalwa gravitasyon, i pou eksperyans serten konsekans. Pareyman, bann lalwa moral Bondye pa kapab sanze e i pa kapab ganny evite oubyen vyole san okenn konsekans. Nou oblize respekte zot zis parey son bann lalwa natirel, menm si nou pa vwar son rezilta deswit. “Personn pa kapab anbet Bondye. En dimoun i rekolte sa ki in senmen.”—Galat 6:7; 1 Timote 5:24.

Sa ki Lalwa Zeova i kouver

6. Ki lalwa Bondye i kouver?

⁶ Lalwa ki ti ganny donnen atraver Moiz ti en lekspresyon remarkab lalwa Bondye. (Romen 7:12) Avek letan, Zeova ti ranplas Lalwa Mozaik avek “lalwa Kris.” * (Galat 6:2; 1 Korentyen 9:21) Vi ki nou Kretyen nou anba “lalwa parfe, lalwa laliberte,” nou rekonnet ki Bondye pa limit son bann direktiv zis dan serten laspe nou lavi, tel konman krwayans oubyen seremoni relizye. Son bann standar i kouver tou laspe lavi, enkli lavi fanmiy, tranzaksyon biznes, konportman anver en dimoun lot sèks, latitid anver bann konpanyon Kretyen, e nou partisipasyon dan vre ladorasyon.—Zak 1:25, 27.

7. Donn legzanp serten lalwa Bondye ki enportan.

⁷ Par egzanp, Labib i dir: “Ni bann ki pratik bann akt imoral, ni bann ladorater zidol, ni bann adilter, ni bann omoseksyel, ni bann voler, ni bann anvye, ni bann soular, ni bann ki fer kalomni, ni bann ki akapar byen zot prosen, pa pou erit Rwayonm Bondye.” (1 Korentyen 6:9, 10) Wi, adilter ek fornikasyon pa zis bann “relasyon romantik.” Omoseksyalite pa zis en “lot fason viv.” Zot vyol lalwa Zeova. E i menm parey pour bann keksoz parey vole, koz manti, e kalonmni. (Psonm 101:5; Kolosyen 3:9; 1 Pyer 4:15) Zak ti kondann fer vantar, tandis ki Pol ti konsey nou pour evite koz sa ki pa fer sans e servi langaz obsenn. (Efezyen 5:4; Zak 4:16) Pour bann Kretyen, tou sa bann lareg kondwit i form par avek lalwa parfe Bondye.—Psonm 19:7.

8. (a) Lalwa Zeova i konpoze avek kwa? (b) Ki sinifikasyon debaz sa mo Ebre ki’n ganny tradwir “lalwa”?

 ⁸ Sa bann regilasyon debaz dan Parol Zeova i demontre ki son lalwa pa zis en lalis lareg sever e endiferan. I form sa baz pour viv en lavi balanse e prodiktif, kot tou laspe kondwit i ganny enfliyanse pour lebyen. Lalwa Bondye i edifyan, i moralman byen, e i konstriktif. (Psonm 119:72) Sa mo “lalwa” parey i ganny servi par sa psalmis in ganny tradwir apartir mo Ebre toh·rahʹ. En spesyalis Labib i dir: “Sa mo in ganny formen apartir en verb ki vedir dirize, gide, vize, e lanse. Alors, i vedir . . . en lareg kondwit.” Pour sa psalmis, lalwa ti en kado sorti kot Bondye. Eski nou osi nou pa devret annan menm lestim pour lalwa, e les li enfliyans nou fason viv?

9, 10. (a) Akoz nou bezwen direksyon ki nou kapab depan lo la? (b) Ki sa sel mwayen ki kapab fer nou viv en lavi ere e satisfezan?

⁹ Tou kreatir i bezwen en direksyon ki i kapab depan lo la e en gidans ki i kapab met son konfyans ladan. Sa i vre dan ka Zezi ek lezot lanz, ki pli o ki zonm. (Psonm 8:5; Zan 5:30; 6:38; Ebre 2:7; Revelasyon 22:8, 9) Si sa bann kreatir parfe i kapab benefisye avek gidans Bondye, konbyen plis bann imen enparfe pou benefisye! Listwar imen ensi ki nou prop leksperyans in prouve ki obzervasyon profet Zeremi i zistifye: “Mon konnen, O Zeova, ki pour zonm ki’n ganny tire dan sirfas later, son semen pa apartenir. I pa apartenir pour zonm ki pe marse pour diriz son lepa.”—Zeremi 10:23.

¹⁰ Si nou anvi viv en lavi ere e satisfezan, nou bezwen depan lo Bondye pour gid nou. Lerwa Salomon ti rekonnet danze pour viv dapre nou prop standar, endepandan avek gidans Bondye: “I egziste en semen ki drwat devan en zonm, me bann semen lanmor i son lafen par laswit.”—Proverb 14:12.

Rezon pour kontan Lalwa Zeova

11. Akoz nou devret annan sa dezir pour konpran lalwa Bondye?

¹¹ I byen si nou kiltiv en dezir profon pour konpran lalwa Zeova. Sa psalmis ti eksprim en tel dezir kan i ti dir: “Debous mon lizye pour ki mon vwar bann keksoz merveye dan ou lalwa.” (Psonm 119:18) Pli nou konn Bondye ek son fason azir, pli nou pou rekonnet ki parol Izai i vre: “Mwan, Zeova, mon ou Bondye, sa Enn ki pe ansenny ou pour ou prop profi, sa Enn ki pe fer ou mars lo sa semen lo ki ou devret marse. Si selman ou atantif anver mon bann komannman!” (Izai 48:17, 18) Dezir senser Zeova se ki son pep i evit maler e rezwir lavi par port latansyon lo son bann komannman.  Annou egzamin serten rezon enportan akoz nou devret kontan lalwa Bondye.

12. Konman ki konnesans ki Zeova i annan lo nou i fer li vin sa Enn ki pli kapab donn lalwa?

¹² Lalwa Bondye i sorti kot sa Enn ki konn nou pli byen. Vi ki Zeova i nou Kreater, i lozik pour li konn imen oprofon. (Psonm 139:1, 2; Akt 17:24-28) Nou bann zanmi pros, nou bann fanmiy e menm nou paran pa kapab konn nou sitan byen parey Zeova i konn nou. Bondye i menm konn nou pli byen ki nou menm! Sa enn ki’n kree nou i konpran nou bezwen spirityel, emosyonnel, mantal e fizik plis ki okenn lezot imen. Kan i diriz son latansyon lo nou, i montre en konprenezon profon lo nou karakter, nou bann dezir ek aspirasyon. Zeova i konpran nou limit, me i osi konnen ki nou annan potansyel pour fer sa ki byen. Sa psalmis i dir: “Li i konn byen avek ki nou’n ganny formen, i mazinen ki nou lapousyer.” (Psonm 103:14) Alors, nou santi nou an sekirite spirityelman kan nou sey mars dapre son lalwa e volonterman soumet nou avek son gidans.—Proverb 3:19-26.

13. Akoz nou kapab annan konfyans ki Zeova i pran nou lentere aker?

¹³ Lalwa Bondye i sorti kot sa Enn ki kontan nou. Bondye i vreman enterese avek nou byennet eternel. Eski pa i’n donn son Garson konman en “pri pour liberasyon bokou dimoun” menm si sa in kout li ser? (Matye 20:28) Eski pa Zeova in promet ki “i pa pou permet ki nou ganny tante plis ki nou kapab siporte”? (1 Korentyen 10:13) Eski pa Labib i asir nou ki ‘i pran swen avek nou’? (1 Pyer 5:7) Napa personn ki pli enterese pour fourni bann bon gidans avek lanmour pour bann imen ki Zeova. I konnen kwa ki byen pour nou e i konnen kote laliny demarkasyon ant sa ki pou anmenn boner ek sagren i ete. Kantmenm nou enparfe e nou fer fot, si nou resers sa ki drwat, i pou montre son lanmour pour nou dan bann fason ki pou anmenn lavi ek benediksyon.—Ezekyel 33:11.

14. Dan ki fason enportan lalwa Bondye i diferan avek bann pwenn-vi zonm?

¹⁴ Dan en fason ki rasir nou, lalwa Bondye pa zanmen sanze. Dan sa letan trouble ki nou pe viv ladan, Zeova i stab e solid parey en ros, i egziste depi leternite ziska leternite. (Psonm 90:2) I ti dir lo li menm: “Mwan mon Zeova; mon pa’n sanze.” (Malaki 3:6) Nou kapab depan antyerman lo bann standar Bondye ki’n ganny rikorde dan Labib, kontrerman avek bann pwenn-vi zonm ki pe konstaman sanze. (Zak 1:17) Par egzanp, pour plizyer lannen bann psikolog in promot en latitid toleran dan fason pour elve zanfan, me plitar serten in sanz zot lide e admet ki zot konsey ti en lerer. Bann standar ek gidans lemonn dan sa domenn pe balote dan divan. Parkont, Parol Zeova pa sanze. Pour plizyer syek, Labib in donn konsey lo konman pour elve zanfan avek lanmour. Zapot Pol ti ekrir: “Zot, bann papa, pa eksit lakoler zot zanfan, me okontrer, elve zot dan en ledikasyon ek lenstriksyon Senyer.” (Efezyen 6:4) Pa i rasir nou letan nou konnen ki nou kapab depan lo bann standar Zeova; zot pa pou zanmen sanze!

Benediksyon pour bann ki obeir Lalwa Bondye

15, 16. (a) Ki pou arive si nou aplik bann standar Zeova? (b) Konman ki lalwa Bondye i kapab vreman en bon gid dan maryaz?

¹⁵ Atraver son profet Izai, Bondye ti dir: “Mon parol ki sorti dan mon labous . . . pou annan en sikse serten.” (Izai 55:11) Pareyman, kan nou sey nou mye pour swiv bann standar ki trouve dan son Parol, nou pou reisi, nou pou akonpli bann keksoz itil e nou pou trouv boner.

 ¹⁶ Reflesir lo konman ki lalwa Bondye i en bon gid pour en maryaz ere. Pol ti ekrir: “Ki maryaz i ganny onore par tou dimoun, e ki bann ki’n marye i reste fidel avek kanmarad. Bondye pou ziz bann ki anmenn en lavi dezordonnen e adilter.” (Ebre 13:4) Bann koup marye i devret respekte e kontan kanmarad: “Fodre ki sak mari i kontan son madanm parey son prop lekor e ki sak madanm i respekte son mari.” (Efezyen 5:33) Sa kalite lanmour ki neseser la i ganny dekrir dan 1 Korentyen 13:4-8: “Lanmour i pasyan, e i bon; lanmour pa zalou ou vant son prop lekor. I pa arogan e i pa fer nanryen ki fer onte. Lanmour pa rod son prop lentere; i pa pran lakoler, e i pa gard rankin. Lanmour pa montre kontantman dan lenzistis, me i rezoui dan laverite. Lanmour i pardonn tou, i krwar tou, i esper tou, i siport tou. Lanmour i reste pour touzour.” En maryaz marke par sa kalite lanmour pou dir pour touzour.

17. Ki benefis nou gannyen kan nou aplik standar Zeova konsernan servi lalkol?

¹⁷ En lot levidans ki standar Zeova i pour nou prop benefis, i lefe ki i kondann servi lalkol an ekse. I menm kondann “kontan bwar.” (1 Timote 3:3, 8; Romen 13:13) Bokou dimoun ki inyor standar Bondye dan sa domenn i soufer avek bann maladi ki koze oubyen agrave par bwar an ekse. Serten in inyor konsey Labib konsernan moderasyon e zot in fer li en labitid pour bwar bokou pour “fer zot relaks.” Bwar an ekse i koz en kantite problenm ki enkli perdi respe lezot, presyon dan lavi fanmiy oubyen fanmiy kase, gaspiyaz larzan, e perdi travay. (Proverb 23:19-21, 29-35) Eski pa standar Zeova konsernan servi lalkol i en proteksyon?

18. Eski lalwa Bondye i pratik dan domenn finans? Eksplike.

 ¹⁸ Bann standar Bondye i osi pratik dan domenn finans. Labib i enplor bann Kretyen pour onnet e travay dir. (Lik 16:10; Efezyen 4:28; Kolosyen 3:23) Vi ki zot in swiv sa konsey, bokou Kretyen in ganny promosyon oubyen zot in gard zot travay tandis ki lezot in ganny met deor. En dimoun i osi kapab benefisye finansyerman kan i evit bann move labitid ek depandans lo bann keksoz parey zwe larzan, fimen, ek labi drog. San dout ou kapab mazin ankor lezot laspe kot standar Bondye i pratik dan domenn finans.

19, 20. Akoz i saz pour aksepte e reste atase avek lalwa Bondye?

¹⁹ I fasil pour bann imen enparfe egare avek lalwa ek standar Bondye. Mazin bann Izraelit kot montanny Sinai. Bondye ti dir avek zot: “Si zot strikteman obeir mon lavwa e vreman gard mon lalyans, alors zot pou sirman vin mon propriyete spesyal parmi tou lezot pep.” Zot ti reponn: “Tou sa ki Zeova in dir nou pare pour fer.” Pourtan, zot ti swazir pour fer tou lekontrer avek sa ki zot ti’n dir! (Egzod 19:5, 8; Psonm 106:12-43) Nou lo nou par, annou aksepte bann standar Bondye e reste atase avek zot.

²⁰ I saz e i pour nou prop boner kan nou reste atase avek lalwa inik Zeova ki i’n fourni pour gid nou lavi. (Psonm 19:7-11) Pour reisi fer sa, nou bezwen osi rekonnet valer bann prensip divin. Nou prosen lartik pou diskit sa size.

[Not anba lo paz]

Eski ou rapel?

• Akoz nou kapab annan konfyans ki lalwa Bondye i pour nou prop benefis?

• Pour ki rezon nou devret kontan lalwa Zeova?

• Dan ki bann fason ki lalwa Bondye i benefisye nou?

[Questions]

[Portre lo paz 7]

Abraam ti ganny beni en kantite akoz i ti obei lalwa Zeova

[Portre lo paz 9]

Bann traka dan lavi modern i detourn bokou dimoun kont lalwa Bondye

[Portre lo paz 11]

Parey en far lo en gro ros, lalwa Bondye i solid e i pa sanze