Zot ti volonterman servi—Lanorvez

DETRWA lannen pase, Roald ek Elsebeth, en koup ki sa letan ti pros senkant an, ti annan en lavi byen konfortab Bergen, sa dezyenm pli gran lavil Lanorvez. Ansanm avek zot fiy Isabel ek zot garson Fabian, zot ti pe partisip dan bann aktivite kongregasyon fidelman. Roald ti en ansyen e Elsebeth en pionye, kant a Isabel ek Fabian zot ti pe fer byen dan predikasyon.

Me, an Septanm 2009, sa fanmir ti deside pour fer en keksoz diferan. Zot ti al pres en semenn dan en landrwa izole. Alor, Roald ek Elsebeth, ansanm avek Fabian, ki sa letan ti annan 18 an ti al Nordkyn, en landrwa ki preski antoure avek delo Finnmark, par lao Arctic Circle. Laba dan vilaz Kjøllefjord, zot ti pres ansanm avek bann frer ek ser ki ti’n osi vin pres sa bon nouvel dan sa landrwa izole. Roald i rakonte, “O konmansman sa semenn, mon ti kontan ki mon ti’n kapab progranm mon bann zafer dan en fason ki mon ti kapab fer en aktivite spesyal pour sa semenn.” Me pandan sa  menm semenn, en keksoz ti konmans fatig li. Ki ti’n arive?

EN KESTYON SAN EKSPEKTE

Roald i rakonte, “San ekspekte, Mario, en pionye ki ti pe servi Finnmark ti demann nou si nou ti a kontan al dan en lavil ki apel Lakselv pour ed sa kongregasyon ki ti annan 23 proklanmater.” Roald pa ti ekspekte pour ganny demande sa kestyon. I eksplike: “Nou de Elsebeth nou ti’n mazin pour servi kot i annan plis bezwen, me sa ti pou plitar kan nou zanfan ti pou’n fini kit lakour.” Me pandan sa detrwa zour ki i ti pres dan sa teritwar izole, Roald ti remarke ki bann dimoun ti kontan pour aprann lo Zeova. Zot ti bezwen led la konmela, pa plitar. I rakonte, “Sa kestyon ti fatig mon konsyans en kantite e menm fer mwan pa dormi aswar.” Apre sa, Mario ti anmenn Roald ek son fanmir Lakselv, ki apepre 240 kilomet sid avek Kjøllefjord. Mario ti anvi ki zot vwar pour zot menm sa pti kongregasyon laba.

Dan lavil Lakselv, Andreas, enn parmi sa de ansyen laba, ti montre zot landrwa ek Lasal Rwayonm. Kongregasyon ti akey zot byen e dir Roald ek Elsebeth ki zot ti pou byen kontan si zot fanmir i vin dan zot kongregasyon pour ede dan sa travay Rwayonm. Avek en zoli sourir, Andreas ti dir ki i ti’n fini fer laranzman entervyou pour en travay pour Roald ek Fabian! Ki zot ti pou fer?

KI ZOT TI FER?

Premye reaksyon Fabian ti: “Mon pa anvi vin reste isi mwan.” Kan i ti mazin pour kit deryer son bann zanmi pros ki i ti’n grandi avek dan son kongregasyon e pour al viv dan en pti lavil, sa pa ti enteres li. Deplis, i pa ti ni ankor fini son letid pour vin en elektrisyen. Par kont, kan Isabel (ki sa letan ti annan 21 an) ti ganny demande ki i ti panse lo al reste dan sa lavil, i ti eksplike: “Se egzakteman sanmenm ki mon’n toultan anvi!” Me apre Isabel ti dir: “Kan mon ti kontinyen mazin lo la, mon ti demande, ‘Eski i vreman en bon nide sa? Eski mon pou mank mon bann zanmi? Eski mon devret reste dan mon kongregasyon kot i pli fasil e mon’n abitye avek?’” Ki ti reaksyon Elsebeth anver sa lenvitasyon? I ti dir: “Mon ti santi ki Zeova ti pe donn nou fanmir en misyon, me mon ti osi mazin nou lakaz ki nou ti’n fek fer renovasyon ladan e tou sa ki nou ti’n aste pandan sa dernyen 25 an.”

Apre sa semenn vreman spesyal, Roald ek son fanmir ti retourn Bergen, me i ti difisil pour zot aret mazin zot bann frer ek ser Kretyen Lakselv ki 2,100 kilomet avek zot. Elsebeth i dir: “Mon ti kontinyelman priy Zeova e mon ti reste an kontak avek mon bann nouvo zanmi par anvoy zot bann portre ek bann pti leksperyans.” Roald i dir: “Mon ti bezwen letan pour aksepte sa nide pour sanz landrwa reste. Mon ti osi mazinen si i ti pou vreman posib pour fer li. Ki mannyer nou ti pou viv? Tousala mon ti demann Zeova dan lapriyer. Mon ti koz avek mon fanmir ek bann frer byen eksperyanse.” Fabian i rapel: “Pli mon ti mazin lo la, pli mon ti realize ki mon ti napa okenn rezon valab pour mwan pa ale. Mon ti souvan priy Zeova e sa dezir pour ale ti vin pli for.” Me Isabel li, ki i ti fer? Pour prepar son lekor si an ka zot deplase, i ti konmans fer pionye dan son lavil. Apre sis mwan ki i ti’n fer pionye, e osi pas bokou letan dan son letid Labib personnel, i ti santi li pare pour fer sa gran sanzman.

BANN PA POUR AKONPLI ZOT LOBZEKTIF

Anmezir ki zot dezir pour servi kot i annan plis bezwen proklanmater ti ogmante, sa fanmir ti pran bann pa pour akonpli zot lobzektif. Roald ti annan en travay ki byen peye ki i ti byen kontan, me i ti demann en konze enn an. Son anplwayer ti demann li pour reste pour travay a mi tan setadir de semenn i travay, sis semenn i pa travay. Roald i dir: “Mon lapey ti vreman desann me i ti oke.”

Elsebeth i rakonte: “Mon msye ti dir mwan esey rod en lakaz Lakselv e pour lwe nou lakaz Bergen. I ti demann bokou letan ek zefor, me finalman nou ti reisi. Apre en pe letan, nou bann zanfan ti ganny en travay a mi tan e zot ti ed nou kouver depans manze ek transpor.”

 Isabel i dir: “Vi ki sa lavil kot nou ti ale ti ptipti, rod en travay pour siport mwan konman en pionye ti mon pli gro defi. Parler, mon ti perdi lespwar.” I ti aksepte nenport ki travay a mi tan ki i ti kapab gannyen, an tou nef travay pandan sa premye lannen. Me Isabel ti kapab kouver son bann depans. Ki mannyer keksoz ti pase pour Fabian? “Pour fini mon letid konman en elektrisyen, mon ti bezwen fer work attachment. Mon ti fer sa Lakselv, mon ti pas mon legzanmen e mon ti ganny en travay a mi tan konman en elektrisyen.”

KI LEZOT IN FER?

Marelius ek son madanm Kesia osi ti anvi servi kot i annan plis bezwen proklanmater. Marelius ki annan 29 an konmela i dir: “Bann diskour ek entervyou dan lasanble distrik lo servis pionye in fer mwan reflesir pour fer plis dan mon servis.” Kant a Kesia, ki annan 26 an konmela, ti vwar li difisil pour kit son fanmir. I dir: “Mon ti per pour zis mazinen ki mon ti pou lwen avek bann dimoun ki mon kontan.” Deplis, Marelius ti travay a plen tan pour pey lòn zot lakaz. I dir: “Avek led Zeova ek bokou lapriyer nou ti kapab fer sa bann sanzman, finalman nou ti reisi bouze.” Premyerman, zot ti pas plis letan dan letid Labib. Apre, sa koup ti vann zot lakaz, kit zot louvraz e an Out 2011, zot ti bouz Alta dan nor Lanorvez. Laba, pour siport zot lekor konman pionye, Marelius i travay konman en kontab e Kesia i travay dan en laboutik.

Knut ek Lisbeth, en koup ki dan zot 35 an in ganny touse par bann leksperyans dan Yearbook lo bann ki servi kot i annan plis bezwen proklanmater. Lisbeth i dir: “Sa bann leksperyans in fer nou mazin pour al servi dan en lot pei, me mon ti ezite akoz mon ti panse ki en dimoun ordiner parey mwan pa pou kapab fer li.” Toudmenm, zot ti fer serten keksoz pour arive akonpli zot lobzektif. Knut i dir: “Nou ti vann nou apartman, e pour anmas larzan, nou ti al reste kot mon manman. Plitar, pour nou vwar si nou ti kapab servi dan en teritwar ki koz en lot langaz, pour enn an, nou ti al dan en kongregasyon Angle, Bergen, kot nou ti reste avek manman Lisbeth.” Pa bokou letan apre, Knut ek Lisbeth ti santi zot pare pour fer en gro sanzman e sa se pour al Yougannda. Zot ti retourn Lanorvez de mwan par an pour travay pour ki zot ganny ase larzan pour viv e prese a plen tan Yougannda larestan lannen.

“GOUTE E VWAR KONMAN ZEOVA I BON”

Ki mannyer keksoz ti pase pour bann ki ti pare pour ofer zot lekor volonterman? Roald i dir: “Nou ti pas bokou plis letan ansanm konman en fanmir dan sa teritwar izole ki nou ti fer Bergen. Nou fanmir in vin pli pros. Ler nou ti vwar progre spirityel nou zanfan, sa ti en benediksyon.” I azoute: “Prezan, nou pa sitan enkyet pour bann keksoz materyel. Zot pa sitan enportan parey nou ti mazinen.”

 Elsebeth ti vwar li neseser pour aprann en lot langaz. Akoz? Teritwar kongregasyon Lakselv ti osi enkli vilaz Karasjok, en gran rezyon kot bann Sami i reste. Sami i en pep ki reste dan rezyon nor Lanorvez, Laswed, Finlenn ek Larisi. Alors, pour fer li pli fasil pour koz avek dimoun ki’n ne e viv dan sa landrwa, Elsebeth ti pran en kour pour aprann langaz Sami. La aprezan, i kapab fer en konversasyon dan sa langaz. Eski i kontan son nouvo teritwar? I dir avek en gran sourir: “Mon annan sis letid Labib. Kote ankor ki pli bon ki sa!”

Fabian, ki konmela i en pionye e asistan ministeryel, i dir ki li ek Isabel ti ed trwa zenn adolesan dan zot nouvo kongregasyon ki ti bezwen lankourazman pour enplik zot plis dan bann aktivite kongregasyon. Konmela, tou le trwa i aktif dan zot minister. Anfet, de parmi in batize e zot ti fer pionye asistan Mars 2012. Enn sa bann zenn ki ti pe elwannyen avek laverite ti remersye Fabian ek Isabel pour ed li “repran laverite serye.” Fabian i dir: “I ti tous mwan kan i ti dir sa. Pa i en gran lazwa pour ed en dimoun!” Isabel i fer sa remark: “Sa privilez in ed mwan pour vreman ‘goute e vwar konman Zeova i bon.’” (Ps. 34:8) I osi dir, “Pa i gou servi isi!”

Marelius ek Kesia i aprezan annan en lavi pli senp, me zot pli ris spirityelman. Kongregasyon Alta kot zot ti ale i aprezan annan 41 proklanmater. Marelius i dir: “Kan nou mazin lepase, i ankourazan pour vwar ki mannyer nou lavi in sanze. Nou remersye Zeova ki nou kapab servi konman pionye isi. Nou rev in vin vre.” Kesia i dir: “Mon’n aprann met tou mon konfyans dan Zeova, e i’n pran byen swen avek nou. Mon’n osi trouve ki viv lwen avek mon fanmir in ed mwan pour pli byen apresye bann moman ki nou pas ansanm. Nou pa’n zanmen regret nou desizyon.”

Ki mannyer Knut ek Lisbeth i ete Yougannda? Knut i dir: “I’n pran letan pour abitye avek sa nouvo lanvironnman ek kiltir. Problenm delo, elektrik ek vant fermal, tousala i ale vini, me nou kapab kondwir kantite letid Labib ki nou anvi!” Lisbeth i dir: “Zis trant minit avek kot nou reste i annan serten teritwar ki pa’n zanmen ganny kouver avek sa bon nouvel. Me, ler nou al laba, nou zwenn dimoun ki pe lir zot Labib e ki pe demann nou pour ansenny zot. Ansenny Labib avek bann dimoun koumsa i en lazwa enkrwayab!”

Pa nou Sef Zezi Kri i kontan pour vwar ki mannyer sa travay predikasyon ki li i’n konmanse pe propaze dan lemonn antye! Wi pour tou bann serviter Bondye, i en gran lazwa pour ofer zot lekor volonterman pour obeir lord Zezi pour “fer tou pep vin [son] bann disip.”​—Mat. 28:19, 20.

[Bwat lo paz 6]

Aplik prensip Labib pou ed ou prepare pour servi kot i annan en pli gran bezwen proklanmater:

• Priy Zeova pour ganny sa motivasyon ek “lasazes pratik.”​—Prov. 3:21; Fili. 2:13; Zak 1:5.

• Rod konsey avek bann Kretyen ki saz. “Sa ki mars avek bann dimoun saz pou vin saz.”​—Prov. 12:15; 13:20.

• Fer en plan byen detaye. “Bann plan sa enn ki devoue i sirman annan en lavantaz.”​—Prov. 21:5.

• Fer sa ki ou’n planifye. “Fer sa ki byen.”​—Ps. 37:3.

Si ou fer sa bann diferan keksoz, ou kapab asire ki Zeova pou beni ou zefor!​—Prov. 16:3.

[Map lo paz 3]

(For fully formatted text, see publication)

Kjøllefjord

Lakselv

Alta

Karasjok

Arctic Circle

OSLO

Bergen

[Portre lo paz 3]

Roald ek Fabian

[Portre lo paz 3]

Elsebeth ek Isabel

[Portre lo paz 5]

Knut ek Lisbeth pe etidye avek en fanmir Yougannda

[Portre lo paz 5]

Marelius ek Kesia pe donn temwannyaz avek en madanm Sami Lanorvez

[Portre lo paz 6]

“Nou fanmir in vin pli pros.”​—Roald