Dan nou arsiv

Zot ti reste ferm dan “letan maler”

AKOZ zot pa ti pran kote dan bann zafer politik, bann Etidyan Labib ti atir latansyon lemonn kan Premye Lager Mondyal ti konmanse an 1914. (Iza. 2:2-4; Zan 18:36; Efe. 6:12) Ki mannyer bann serviter Bondye Grannbretanny ti ganny afekte?

Dapre Military Service Act 1916, Grannbretanny ti entrodwir en lalwa ki tou zonm selibater 18 a 40 an ti oblize anrezistre dan larme. Sa lalwa ti osi fer en leksepsyon pour bann ki zot “krwayans oubyen standar moral” pa ti permet zot pran par dan lager. Gouvernman ti etablir bann tribinal pour determinen lekel ki pa ti oblize al dan larme.

Pa tro bokou letan apre ki sa lalwa ti’n ganny pase, apepre 40 Etidyan Labib ti ganny mete dan bann prizon militer, e 8 ti’n fini ganny anvoye lo fron batay Lafrans. Akoz sa lenzistis, bann frer Grannbretanny ti ekrir en let Premye Minis Herbert Asquith pour proteste kont sa bann lanprizonnman. Zot ti osi anvoy en petisyon ki ti annan 5,500 sinyatir.

Apre, dapre lenformasyon, sa wit frer ki ti’n ganny anvoye Lafrans ti’n ganny kondannen a mor akoz zot ti’n refize pran par dan en batay. Me kan sa bann frer ti’n ganny anlinyen pour ganny fiziye, zot kondannasyon ti ganny ranplase par en santans di-z-an prizon. Zot ti ganny reanvoye Langleter e fer zot santans dan bann prizon sivil.

Anmezir ki lager ti kontinyen, lalwa ti obliz bann zonm marye pour osi pran par dan lager. En ka enportan konsernan en dokter e Etidyan Labib ki ti apel Henry Hudson ti pas ankour Manchester, Langleter. Lakour ti pas zizman lo li le 3 Out 1916 konmkwa i ti’n fer en keksoz ilegal par refize pran par dan lager. Lakour ti fer li pey en lanmann e refer li avek lotorite militer. An menm tan, en lot ka ki ti parey pour Henry Hudson, ti ganny pase ankour Edinburgh, Lekos. James Scott, en pionye ki ti annan 25 an ti ganny trouve inosan. Lakour ti fer rapel me apre aksepte sa zizman, zot ti dakor avek en lot ka ki ti pe pas ankour Lonn. Safwasi, en frer ki ti apel Herbert Kipps ti ganny trouve koupab, i ti bezwen pey en lanmann e i ti ganny refer avek lotorite militer.

Ver Septanm 1916, 264 frer ti’n fini anvoy zot laplikasyon pour pa pran par dan lager. Parmi sa bann frer, 5 laplikasyon ti ganny aksepte, 154 ti ganny kondannen pour fer travay forse, 23 ti ganny anvoye dan larme kot zot ti pou travay dan en group ki pa ti al lo fron batay e 82 ti ganny refer avek lotorite militer pour ganny zize. Manm piblik ti proteste kont lafason ki sa bann frer ti ganny trete dan sa bann prizon militer, e akoz sa, gouvernman ti bezwen transfer zot dan bann prizon sivil.

 Pryce Hughes ki plitar ti vin sirveyan Biro Brans Grannbretanny ek Edgar Clay ti ganny anvoye Wales pour travay dan konstriksyon danm. De lot kote, Herbert Senior, enn parmi sa wit frer ki ti’n ganny reanvoye sorti Lafrans ti ganny met dan prizon Wakefield, Yorkshire. Lezot frer ti ganny anvoye prizon Dartmoor kot zot ti bezwen fer bann gro louvraz dan bann kondisyon kriyel e zot ti sa pli gran group dimoun ki zot konsyans pa ti permet zot pran par dan lager.

Frank Platt, en Etidyan Labib, ki ti dakor pour fer travay larme me ki pa ti oblize pran par dan bann konba ti ganny persekite zanmen fini kan zot ti anvoy li lo fron batay. Menm keksoz ti ariv avek Atkinson Padgett, ki ti aprann laverite zis apre ki i ti’n anrezistre dan larme, akoz i ti refize pran par dan bann konba.

Menm si dan sa letan nou bann frer pa ti tro konpran kwa ki enplike pour pa pran kote dan zafer politik, zot ti determinen pour fer plezir Zeova. Bann frer ki’n ganny mansyonnen par non dan sa lartik in kit en bon legzanp lo konman pour pa pran kote dan bann zafer politik e konman pour reste ferm dan “letan maler.” (Rev. 3:10)​—Dan nou arsiv Grannbretanny.

[Portre lo paz 31]

Henry Hudson

[Portre lo paz 31]

James Scott

[Portre lo paz 31]

Pryce Hughes

[Portre lo paz 32]

Prizon Dartmoor, kot bokou Etidyan Labib ti ganny anprizonnen

[Portre lo paz 32]

Herbert Senior

[Portre lo paz 32]

Frank Platt