Bann levennman ki’n ganny predir pour nou letan

LABIB in predir ki Rwayonm Bondye pou anmenn lape ek lazwa lo later pour touzour. (Danyel 2:44) Dan sa lapriyer Notreper, Zezi ti ansenny son bann disip pour priye: “Ki ou Renny i ganny etabli; Ki ou lavolonte i ganny akonpli lo later parey dan lesyel.” (Matye 6:10) Dan sa profesi enportan e byen renonmen ki i ti donn son bann disip lo Montanny Zolivye, Zezi ti predir bann levennman spesifik ek bann kondisyon ki pou arive zis avan Rwayonm Bondye i azir pour anmenn bann sanzman lo later. Tou ansanm, sa bann laspe i form en siny ki pou klerman evidan pour tou dimoun ki annan leker senser. Konbyen parmi sa bann laspe swivan sa siny ki ou’n vwar personnelman?

Lager dan lemonn antye. Zezi ti predir: “Nasyon pou lager kont nasyon, rwayonm kont rwayonm.” (Matye 24:7) Avan Premye Lager Mondyal an 1914, lager ti tant pour konsantre selman dan serten parti lemonn. Premye Lager Mondyal pa ti zis anglob en gran parti lemonn me i ti osi akseler devlopman bann zarm pli terib ki okenn  zarm ki imen ti’n deza konnen oparavan. Par egzanp, en avyon ki ti ganny envante ti ganny servi pour larg bonm lo bann sivilyen. Lefet ki en kantite zarm ti ganny fabrike, sa ti fer ki lakantite dimoun ki ti ganny touye dan lager ti ogmante lo en degre ki zanmen ti’n deza arive oparavan. Apepre lanmwatye dan sa 65 milyon solda ki ti al lager ti swa perdi zot lavi oubyen ganny blese. Malgre sa, anmezir ki nou ti avans dan sa ventyenm syek, lakantite dimoun ki’n ganny touye in ogmante. En istoryen ti dir ki nou pa pou zanmen vreman kapab konn sif egzakt lakantite solda ek sivilyen ki ti mor dan Dezyenm Lager Mondyal. Lager i ankor pe kontinyen, menm ozordi.

Lafamin. Zezi ti predir ki: “Pou annan lafamin.” (Matye 24:7) An 2005, magazin Science ti fer resorti ki: “I annan 854 milyon dimoun dan lemonn (apepre 14% nou popilasyon), ki swa pour en long peryod letan oubyen en pti peryod letan pe vreman soufer akoz zot pa pe ganny ase nouritir pour manze.” An 2007, Lorganizasyon Nasyon-z-ini ti raporte ki 33 pei napa ase manze pour nouri zot popilasyon. Vi ki prodiksyon ­legren dan lemonn pe ogmante, ki mannyer sa i kapab posib? En rezon, i ki bann bout later ki ti’n kapab ganny servi pour kiltiv legren pour nouri bann dimoun, i ganny servi pour prodwir karbiran pour bann transpor. En rapor dan en zournal Sid Lafrik, The Witness i dir: “Lakantite legren ki ganny servi pour prodwir lakantite karbiran ki bezwen pour ranpli en gro four-wheel-drive SUV zis pour en fwa, i ase pour nouri en dimoun pour en lannen.” Menm dan bann pei devlope, ogmantasyon dan pri manze pe fors en kantite dimoun pour swazir ant en repa oubyen pey pour ganny lezot nesesite tel parey latizann.

Bann gran tranblemandter. Zezi ti dir: “Pou annan gran [tranblemandter].” (Lik 21:11) Si ou’n remarke ki dan nou letan plis dimoun ki oparavan pe ganny afekte avek tranblemandter, ou’n byen remarke. An 2007, en spesyalis Endyen ki apel R. K. Chadha ki fer resers lo tranblemandter ti fer sa remark: “En sel kou nou pe vwar en ogmantasyon dan lakantite tranblemandter ki pe arive dan lemonn. Personn pa konnen akoz.” Deplis, dan bann landrwa kot i souvan annan tranblemandter, popilasyon pe ogmante byen vit e sa i fer ki lakantite dimoun ki mor dan sa bann dezas in ogmante. Dapre Geological Survey Leta-z-ini, an 2004 sa tranblemandter ki ti frap Losean Endyen ek sa tsounami ki ti swiv apre, in fer ki lannen 2004 in enn kot “plis dimoun in mor dan tranblemandter pandan sa preski 500 lannen ki’n pase.”

Maladi ki difisil pour kontrole. Zezi ti predir: “Pou annan . . . lepidemi.” (Lik 21:11) Partou dan lemonn, bokou plis dimoun pe ganny afekte avek bann maladi ki ti deza la depi byen lontan ek bann nouvo maladi ki pe devlope. I vreman difisil pour trouv remed pour geri sa bann maladi. Par egzanp, lefet ki i kontinyelman en defi pour imen kontrol malarya, sa bann lobzektif ki ganny mete lo baz enternasyonal pour elimin malarya konpletman, in plizyer fwa bezwen ganny redwir. An plis ki sa, plizyer milyon dimoun in mor avek bann maladi ki ti la depi byen lontan, sa i enkli tiberkiloz (TB), ki pe koz lanmor plizyer milyon dimoun zis parey SIDA ek lezot nouvo maladi. En rapor World Health Organization in fer resorti ki: “En tyer popilasyon lemonn in aktyelman ganny enfekte avek sa bakteri ki apel TB bacillus.” Sa lorganizasyon in osi fer resorti ki HIV pe kontribye pour fer propaze lepidemi TB dan plizyer pei. Sak segonn, en dimoun i ganny enfekte avek TB e TB pe devlop en pli gran rezistans kont sa tretman. En rapor dan magazin New Scientist i dir ki an 2007, en kalite TB ki “reziste tou kalite tretman ki nou annan” ti ganny dekouver dan en pasyan Lerop.

 Degradasyon moral ek sosyal. Zezi ti dir: “Pou annan sitan pese ki lanmour en pli gran kantite dimoun pou diminyen.” (Matye 24:12) An plis ki sa ki Zezi ti’n predir, zapot Pol ti fer resorti ki standar moral ek sosyal pou degrade. I ti dekrir ki bann “dernyen zour” ki difisil pou vini zis avan Rwayonm Bondye i met en lafen avek sa sistenm ki nou pe viv ladan. “Zonm pou vin egois, kontan larzan, vantar, arogan zot pou koz kont Bondye, dezobeisan anver zot paran, engra, mank respe pour keksoz sen, zot pou annan leker dir, san pitye, kalomni zot prosen, vyolan, kriel, lennmi sa ki fer dibyen; zot pou tret, annan karakter vif, anfle avek lorgey, kontan plezir plis ki Bondye, zot pou montre en laparans lapiete, me rezet son vre pisans.” (2 Timote 3:1-5) Eski ou’n remarke ki bann dimoun i demontre sa bann tel move tre plis ki zot in deza oparavan?

Zezi ek Pol pa ti mansyonn tou bann fakter istorik, sosyal ek politik ki’n koz sa bann kondisyon dan lemonn. Me kantmenm sa, sa ki zot in predir konsernan sa bann levennman ek latitid, i egzakteman sanmenm sa ki nou pe vwar ozordi. Me ki nou pou dir konsernan lavenir? Kan Izai ti predir konsernan larive Mesi, i ti osi dekrir bann bon sanzman ki Rwayonm Bondye pou anmennen lo later. Annou egzamin sa bann sanzman dan sa lartik swivan.

[Portre lo paz 6]

“Nasyon pou lager kont nasyon”

[Portre lo paz 7]

“Pou annan . . . lepidemi”