Ki lefe aprann laverite lo lanfer i kapab annan lo ou?

BANN ki ansennyen ki lanfer i en landrwa kot dimoun i ganny tourmante apre lanmor, zot pe vreman mal reprezant Zeova ek son bann kalite. I vre ki Labib i dir ki Bondye pou detrir bann move dimoun. (2 Tesalonisyen 1:6-9) Menm si Bondye i demontre son lakoler dan en fason zis, sa pa vedir ki lakoler i sa kalite dominan dan son personnalite.

Bondye pa kriyel. I ti menm dir: “Eski mon pran okenn plezir ki bann move dimoun i devret mor?” (Ezekyel 18:23, King James Version) Si Bondye pa pran plezir dan lanmor bann move dimoun, ki mannyer i kapab pran plezir pour get sa bann dimoun kot zot pe ganny tourmante pour touzour?

Sa kalite pli dominan dan personnalite Bondye i lanmour. (1 Zan 4:8) An realite, “SENYER i bon avek tou dimoun; i demontre konpasyon anver tou sa ki i’n fer.” (Psonm 145:9, The Holy Bible—New International Version) An retour, Bondye i oule ki nou devlop en lanmour senser pour li.—Matye 22:35-38.

Kwa ki motiv ou: lanmour pour Bondye oubyen lafreyer pour al dan lanfer?

Sa lansennyman ki bann imen i al soufer dan lanfer i fer dimoun annan en gran lafreyer pour Bondye. Parkont, kan en dimoun i aprann laverite lo Bondye e arive devlop lanmour pour li, sa dimoun pou devlop en diferan kalite lafreyer oubyen lakrent. Psonm 111:10 i dir: “Lakrent pour SENYER i konmansman lasazes; tou bann ki annan lakrent i pridan.” (The New American Bible) Sa lakrent pour Bondye ki ganny mansyonnen dan sa verse i en profon respe oubyen ladmirasyon pour nou Kreater. I sa lakrent ki fer nou pa anvi fer nanryen pour depler li.

Egzamin legzanp Kathleen, aze 32-z-an ki oparavan ti servi drog e vwar konman aprann laverite lo lanfer in annan lefe lo li. I ti viv en lavi ranpli avek lanmizman, vyolans ek limoralite. I ti’n degout son lavi. I ti admet: “Mon ti get mon pti fiy ki ti annan zis enn an e dir dan mwan menm ‘Get ki mon pe fer avek mon pti fiy. Mon pou ganny brile dan lanfer pour sa.’” Kathleen ti esey aret servi drog, me tou sa ki i ti eseye pa ti marse. I ti dir: “Mon ti anvi fer sa ki byen, me tou keksoz dan mon lavi e dan lemonn ti rann mon malere. I ti paret napa okenn sans pour fer sa ki byen.”

Plitar, Kathleen ti rankontre bann Temwen Zeova. Kathleen ti dir: “Mon’n aprann ki lanfer pa egziste. Levidans ki mon’n gannyen dan Labib ti vreman fer sans. Aprezan ki mon’n aprann ki mon pa pou al ganny brile dan lanfer, sa in anmenn en gran soulazman.” I ti osi aprann konsernan promes ki Bondye in fer pour ki bann imen i viv pour touzour lo later san  okenn mesanste. (Psonm 37:10, 11, 29; Lik 23:43) I ti dir avek lakontantman: “Mon aprezan annan en lespwar pour viv dan en Paradi pour touzour!”

Eski Kathleen in kapab aret servi drog aprezan ki i nepli annan lafreyer pour al dan lanfer? I ti rakonte: “Kan mon ti ganny sa lanvi pour servi drog, mon ti priye e sipliy Zeova pour ed mwan. Mon ti mazin lo lafason ki i konsider sa bann tel move labitid e sa ti fer ki mon pa ti anvi depler li. I ti reponn mon bann lapriyer.” (2 Korentyen 7:1) Lefet ki i pa ti anvi depler Bondye, sa ti fer Kathleen aret servi drog.

San dout, i pa lafreyer pour al ganny tourmante dan lanfer ki pou pous nou pour fer lavolonte Bondye, me i par devlop lanmour e annan lakrent oubyen respe pour li ki pou ed nou fer sa. En psalmis ti ekrir: “Ere tou dimoun ki annan lakrent pour Zeova, ki pe mars dan son semen.”—Psonm 128:1, Bible de Crampon.

[Bwat lo paz 9]

LEKEL KI POU GANNY LIBERE DAN LANFER?

Serten tradiksyon Labib in kree en konfizyon par tradwir tou le de mo Grek Geʹen·na ek Haiʹdes par en sel mo “Lanfer.” Dan Labib, sa mo Geʹen·na oubyen Zeenn i refer avek destriksyon konplet kot napa lespwar pour ganny resisite. De lot kote, bann dimoun ki dan Haiʹdes oubyen Lades i annan sa lespwar pour ganny resisite.

Alor, kan Zezi ti mor e apre ganny resisite, zapot Pyer ti asir bann ki ti pe ekout li ki Zezi “pa ti ganny kite dan lanfer.” (Akt 2:27, 31, 32; Psonm 16:9, 10; King James Version) Sa mo ki’n ganny tradwir “lanfer” dan sa verse i sa mo Haiʹdes an Grek. Zezi pa ti al dan en landrwa kot i ti ganny tourmante dan dife. Lades oubyen “lanfer” i reprezant kondisyon ki bann dimoun mor i ladan. Pa zis Zezi tousel ki Zeova i libere dan Lades.

An rapor avek rezireksyon, Labib i dir: “Lanmor ek lanfer ti rann tou bann mor ki ti dan zot.” (Revelasyon 20:13, 14, KJ) Lefet ki “lanfer” pou vid, sa i vedir ki apre ki Bondye i ziz zot, tou bann ki merit ganny resisite pou ganny lavi. (Zan 5:28, 29; Akt 24:15) Pa sa lespwar pour lavenir i merveye, kot nou pou revwar tou bann dimoun ki nou kontan e ki’n mor sorti dan zot latonm! Zeova sa Bondye ki annan en lanmour eternel pou fer sa.