Eski Bondye i aksepte tou kalite ladorasyon?

Larepons ki nou souvan tande:

▪ “Tou larelizyon i anmenn ver Bondye.”

▪ “Sa ki ou krwar pa enportan si ou senser i ase.”

Ki Zezi ti dir?

▪ “Antre par laport etrwat! akoz laport i larz, semen i fasil ki anmenn perdisyon, e i annan bokou ki pas par la. Me laport i etrwat, e semen i difisil ki anmenn dan lavi, napa bokou ki trouv li.” (Matye 7:13, 14) Zezi pa ti krwar ki tou larelizyon i anmenn ver Bondye.

▪ “Kan sa zour pou arive, bokou pou dir mwan, ‘Senyer, Senyer! an ou non nou’n profetize, an ou non, nou’n sas en kantite demon e an ou non, nou’n fer en kantite mirak.’ Alor mon a reponn zot, ‘Mon pa’n zanmen konn zot. Sorti la, zot ki pratik lemal!’” (Matye 7: 22, 23) Zezi pa aksepte tou bann ki dir zot swiv li.

PLIZYER dimoun ki relizye i atase avek zot prop krwayans ek tradisyon. Me, ki arive si sa bann lansennyman pa an armoni avek sa ki dan Parol Bondye, Labib? Zezi ti fer resorti danze ki i annan pour swiv tradisyon zonm kan i ti dir avek bann sef relizye dan son letan: “Zot detri valer parol Bondye pour swiv zot prop lansennyman.” Apre i ti sit sa parol ki Bondye ti dir: “Sa pep, i onor mwan avek zot labous, Me zot leker i lwen avek mwan. Zot ladorasyon i initil, zot ansenny bann k[o]mannman ki’n fer par zonm!”—Matye 15:1-9; Izai 29:13.

Pa zis krwayans ki enportan me kondwit osi i enportan. Labib i dir sa lo serten dimoun ki dir zot pe ador Bondye: “Zot dir ki zot konn Bondye, me zot bann aksyon i prouv tou lekontrer.” (Tit 1:16) Annefe, Labib i dir sa lo lamazorite dimoun ki pe viv dan nou letan: “Olye kontan Bondye, zot pou kontan plezir. Menm si zot pour fer krwar zot relizye, zot larelizyon pa pou enn ki vre. Pa annan nanryen pour fer avek bann dimoun koumsa.”—2 Timote 3:4, 5, Contemporary English Version.

I vre ki nou bezwen senser me nou bezwen plis ki sa. Akoz? Akoz en dimoun i kapab senser me i dan lerer. Alor, ganny konnesans egzakt lo Parol Bondye i tre enportan. (Romen 10:2, 3) Si nou pran konnesans egzakt e azir an armoni avek sa ki Labib i dir, sa pou permet nou fer Bondye plezir. (Matye 7:21) Alor, i kler ki en vre larelizyon i enplik annan bon motivasyon, krwayans baze lo konnesans egzakt e fer bon aksyon. Bon aksyon i vedir fer lavolonte Bondye tou le zour!—1 Zan 2:17.

Si ou ti a kontan konn plis konsernan sa ki Labib i dir nou lo Bondye, kontakte Temwen Zeova pour en letid Labib gratwit kot lakour.

[Portre lo paz 9]

En vre larelizyon i enplik annan bon motivasyon, krwayans baze lo konnesans egzakt e fer bon aksyon